Красногвардейскэ районым коронавирусыр къызэузыгъэхэм япчъагъэ нахьыбэ щыхъугъ.

ЖъоныгъуакIэм и 11-м чIыпIи 3-мэ а узыр ащагъэ­унэ­фыгъ, нэбгырэ 12-мэ алъы­Iэсыгъ.

— Зэпахырэ узэу къежьагъэм шъори шъукъэзыуцу­хьэ­хэрэми зыщышъуухъум. Бэрэ шъуIэхэр шъутхьакIых, спирт салфеткэхэмкIэ шъу­лъэкIых, шъунэгу шъукIэмыIэбэжь. Маскэхэр ыкIи Iалъэхэр жъугъэфедэх, — районым иоперштаб къыкIэлъэIу.

Шъугу къэдгъэкIыжьын, жъо­ныгъуакIэм и 11 чэщ-зымафэм а узыр нэбгырэ 19-мэ къяутэкIыгъэу респуб­ликэм щагъэунэфыгъ: 2-р — сымэджэщым чIагъэгъолъхьагъэх, 17-мэ — амбулаторнэ шIыкIэм тетэу яIазэх. Мы илъэсым жъоныгъо­кIэ мазэр ары коронавирусыр къызыпыхьэгъэ пчъагъэр зыщы­нахьыбэу агъэунэфыгъэр.

ЖъоныгъуакIэм и 12-м Iофым изытет нахь зыпкъ иуцуагъ. РеспубликэмкIэ сы­мэджэщым нэбгыри 2 ащагъ, амбулаторнэ шIыкIэмкIэ нэбгыри 3-мэ яIэзэщтых, 5-мэ яIэзэгъу уахътэ аухыгъ.

ПстэумкIи COVID-19-р иIэу зэгуцафэхэрэ нэбгыри 166-мэ яIазэх, 88-р — сымэджэщым чIэлъых, 78-мэ — амбулаторнэ шIыкIэкIэ Iэзэгъу арагъэ­гъоты.

Iэшъынэ Сусан.