Нэхэе Юрэ, ветеранхэм IэпыIэгъу языгъэгъотырэ респуб­ликэ фондэу «ТекIоныгъ» зыфи­Iорэм ипащэ, Советскэ Союзым и ЛIыхъужъэу Нэхэе Даутэ ыкъо «Адыгэ макъэм» къыдэгощагъ ТекIоныгъэм и Мафэ зэрэха­гъэу­нэфыкIыгъэм иеплъыкIэ­хэмкIэ:

«Къиныгъоу джырэ уахътэм къэралыгъор зыхэтым елъытыгъэу ТекIоныгъэшхом и Мафэ дэгъоу, дахэу хагъэунэфыкIыгъ, тызэмыжэгъэ хэкIыпIэхэр къагъотыхэзэ ветеранхэр агъэгу­шIуа­гъэх.

Анахьэу къыхэзгъэщы сшIоигъор ТекIоныгъэр къэзыгъэблэгъагъэхэр зэрагъэшIуагъэхэр, мэфэкI шъыпкъэ зэрафашIы­гъэр ары. АдыгеимкIэ филармонием иIофышIэхэр хьылъэзещэ машинэм исхэу зэо лъэхъаным иорэдхэр къаIохэзэ урамхэм къарыкIуагъэх, ветеранхэм яшъхьаныгъупчъэ чIэгъхэм джащ фэдэу къащаIуагъэх.

Бэмэ ябалконхэр, яшъхьаныгъупчъэхэр, яунэхэр ТекIоныгъэм итамыгъэхэмкIэ агъэпкIагъэх. Сэ зэрэслъытэрэмкIэ, ветеранхэр рыразэх ямэфэкI зэрафызэхащагъэм.

Анахь шъхьаIэр — ныбжьыкIэхэр, волонтёрхэр Iофтхьабзэхэм бэу зэрахэлэжьагъэхэр ары. Сыдми хэлажьэхэ къодыеу щымытхэу, агу етыгъэу, гуфэбагъэ хэлъэу, екIолIэкIэ гъэшIэгъонхэр къыфагъотыхэзэ яIофшIэн зэшIуахыгъ.

Онлайн шIыкIэм тетми, мыгъэ «ЕгъэшIэрэ полкым» икIо зэпагъэугъэп, сэ сянэ-сятэхэми якъэбар згъэхьыгъэ. Джащ фэдэу Мыекъуапэ щагъэуцугъэу ШIэжьым иэкрани ахэр тичIыгогъу зэолIмэ ахэтхэу къыщагъэлъэгъуагъэх.

Сэ зэрэслъытэрэмкIэ, бэ зэшIуахынэу игъо зыфифагъэ­хэр. Мыекъуапэ игупчэ саугъэт къыщызэIуахыгъ Адыгеим икIыгъэ дзэкIолIхэу ЛIыхъужъыцIэ къызыфагъэшъошагъэхэм янэпэеплъ шIэжь стелэ.

Джырэ охътэ къинэу тызыхэтым хэбзэ IофышIэхэми, общест­веннэ организациехэми алъэкI къэнагъэп къэралыгъом имэфэкI шъхьаIэ зэрифэшъуашэм тетэу хэгъэунэфыкIыгъэнымкIэ. ТелевидениемкIи къэтынхэу кIуагъэ­хэр, артистхэм якъэгъэлъэгъонхэр, Iофтхьэбзэ зэфэшъхьафхэр гуфэбэгъэ ин хэлъэу рекIокIыгъэх.

Республикэм ирайонхэмрэ икъалэхэмрэ яветеранхэм ясоветхэм зэпхыныгъэ адысиIагъ, сафытеуагъ. МэфэкIым ипэгъо­кIэу ветеранхэр агъэшIуагъэх, ахъщэ тынхэри, шIухьафтынхэри ахэм апагъохыгъэх. СыздэгущыIэгъэ пстэуми къэралыгъор гумэкIыгъоу зыхэтыр къагурэIо. Анахь шъхьаIэр лIэужхэм язэпхыныгъэ пытэу къагъэлъэгъуа­гъэр, зыч-зыпчэгъоу зэрэзэкъот­хэр ары. МэфэкIыр зэрифэшъуа­шэм фэдэу хэгъэунэфыкIыгъэ хъугъэ!»