Урысые Федерацием и Президентэу Владимир Путиным федеральнэ хэбзэ къулыкъухэм ыкIи шъолъырхэм япащэ­хэм адыриIэгъэ зэдэгущыIэгъум ыуж коронавирусым зи­мыушъомбгъунымкIэ Оперативнэ штабым изэхэсыгъо Адыгеим и ЛIышъхьэу КъумпIыл Мурат зэхищагъ.

Къэралыгъом ипащэ игукъэкIхэр шIуагъэ къы­тэу гъэцэкIэгъэнхэм ыкIи зэпахырэ узым пэшIуе­кIогъэнымкIэ пшъэрылъэу къыгъэуцугъэхэр зэшIо­хыгъэнхэм пстэуми анаIэ тырагъэтын зэрэфаер Адыгеим и ЛIышъхьэ пэублэм къыIуагъ.

— Урысыем и Президент зигугъу къышIыгъэ IэпыIэгъум къыдилъытэрэ лъэныкъо пстэури дгъэ­цэкIэн фае. Сабыйхэр зэрыс унагъохэм ­къащегъэжьагъэу, предприятие цIыкIухэм ыкIи гурытхэм анэсэу, къэралыгъо IэпыIэгъу ядгъэгъо­тыныр пшъэрылъ шъхьаI. Коронавирусым пэшIуе­кIохэрэ медицинэм иIофышIэхэм къатефэрэ ахъ­щэ тынхэр жъоны­гъуакIэм и 15-м нэс аIэ­кIэдгъэхьанхэ фае. Ана­хьэу тынаIэ зытетын фаер медикхэм ястраховой тын­хэр ары. Мы Iофыгъор зэшIохыгъэ зэрэхъурэм сэ сылъыплъэщт, — къыIуагъ КъумпIыл Мурат.

УФ-м и Правительствэ, Роспотребнадзорым, УФ-м и Къэралыгъо Совет иIоф­шIэкIо куп яеплъыкIэхэр къыдалъытэзэ непэ щыIэ режимым игъорыгъоу те­кIыжьынхэм фытегъэ­псыхьэгъэ шъолъыр планыр къагъэхьазырынэу АР-м и Премьер-минист­рэу Александр Наролиным пшъэрылъ фишIыгъ.

Республикэм ивице-­премьерэу Наталья Широковам къызэриIуагъэмкIэ, зы мэфэ закъом (жъо­ныгъуакIэм и 11) узыр къыхэзгъэщырэ тест 1105-рэ ашIыгъ. Минист­рэу Мэрэтыкъо Рустем АР-м и ЛIышъхьэ зэрэ­щигъэгъозагъэмкIэ, мы мафэхэм ПЦР-р ушэтынхэм афытегъэпсыхьэгъэ зы аппарат джыри шъо­лъырым къыIукIэщт.

Режимэу щыIэм игъорыгъоу текIыжьыгъэным фэшI щынэгъончъэным ишапхъэхэр зэкIэ гъэцэ­кIэгъэнхэ зэрэфаер рес­публикэм ипащэ хигъэу­нэфыкIыгъ.

— СатыушIыным фэ­гъэзэгъэ предприятиехэм зэкIэми дезинфекцием ирежим ыкIи санитар шапхъэхэр агъэцэкIэнхэ фае. Хэукъоныгъэ за­шIыкIэ, тучаныр е сатыу­шIыпIэ чIыпIэр шIокI имыIэу зэфашIын фаеу хъущт. Ащ дакIоу санитар щынэгъончъэным ишапхъэхэр цIыфхэм агъэ-цэ­кIэныр агурыгъэIогъэн фае, — къыхигъэщыгъ КъумпIыл Мурат.

Оперативнэ штабым хэтхэм къэбарэу аIэ­кIэ­лъым­кIэ, республикэм ибэдзэрхэр IофшIэныр рагъэжьэ­жьыным фэхьазырых.

Къыхэгъэщыгъэн фае, жъоныгъуакIэм и 12-м щегъэжьагъэу бэдзэрхэм ыкIи ермэлыкъхэм адакIоу, машинэхэр зыщатхьакIыхэрэ чIыпIэхэм яIоф­шIэн рагъэжьэжьын алъэкIыщт. Iофхэм язытет елъытыгъэу салонхэр ыкIи парикмахерскэхэр къызэIухыжьыгъэнхэм фагъэ­хьазырых. Троллейбусхэри рагъэжьэжьынхэ гу­хэлъ щыI.

Адыгеим щашIыгъэ унашъохэм адиштэу зыныбжь илъэс 65-м ехъугъэхэр ыкIи хэужъыныхьэгъэ уз зиIэхэр джыри унэхэм арысыщтых. Предприятиеу Iоф зышIэхэрэм аIутхэм маскэхэр ыкIи Iалъэхэр агъэфедэнхэ фае. Шап­хъэу щыIэхэр зыгъэца­кIэхэрэм жьым хэтхэу къакIухьан амал яIэщт.

— Ащ дакIоу щагу площадкэхэм сабыйхэр бэу ащызэрэугъоихэ хъущтхэп. Тестхэр зыщакIухэрэ мобильнэ пунктхэм яIофшIэн лагъэкIотэн, Iофхэм язытет зыфэдэм муниципалитетхэм яхэбзэ къулыкъу­хэр лъыплъэнхэ фае, — къыIуагъ КъумпIыл Мурат. ЦIыфхэм IэпыIэгъу афэхъугъэнымкIэ ящэнэрэ уцугъор зэхэщагъэ зэрэхъущтым зэхэсыгъом хэлэжьагъэхэр тегущыIагъэх. ЗэрагъэнэфагъэмкIэ, гъомылапхъэхэр зэ­рылъ Iалъмэкъхэр мы ма­зэм ыкIэм нэс агъэхьазырыщтых.

ТХЬАРКЪОХЪО Адам.