Ящэнэрэу аратыщт
Адыгеим коронавирусым зыщимыушъомбгъуным фэшI зекIоныр зыгъэмэкIэрэ Iофтхьабзэхэр зэрэщагъэнэфагъэхэм къыхэкIэу республикэм щыпсэухэу чIыпIэ зэжъу ифагъэхэм ящэнэрэу шIушIэ IэпыIэгъу аратыщт.
Адыгеим и ЛIышъхьэ ащ фэгъэзэгъэ министрэхэм Iофыр зэхэщэгъэнымкIэ унашъо афишIыгъ. Оперативнэ штабым къызэритыгъэмкIэ, тызхэт мазэм ыкIэ гъомылэпхъэ Iалъмэкъхэм яугъоин аухыщт.
Шъугу къэдгъэкIыжьын мэлылъфэгъум ыкIэм зигъот макIэхэм апае гъомылэпхъэ зэфэшъхьафхэр зэрылъ Iалъмэкъ мин 24-рэ, жъоныгъокIэ мазэм икъихьагъуи джащ фэдиз Iахь (партиеу «Единэ Россиер икIэщакIоу) зэрафагощыгъэр.
КъэIогъэн фае ветеранхэм ахъщэ тынэу аратыгъэхэм республикэ бюджетым къыхэхыгъэ сомэ миллион 24,5-рэ зэрэпэIухьагъэр. Джащ фэдэу кIэлэцIыкIу зиIэхэу зигъот мэкIэ унэгъо мин 11 фэдизмэ аратыгъэ IэпыIэгъоу сомэ миллион 40 хъурэр республикэм къытIупщыгъ. Илъэси 3 — 7 зыныбжь кIэлэцIыкIухэр зиIэхэу зигъот мэкIэ унагъохэм джыри ахъщэ IэпыIэгъу аратынымкIэ лъэIу тхылъхэр жъоныгъуакIэм и 20-м къыщегъэжьагъэу атынхэ алъэкIыщт. Iэшъынэ Сусан.