ЖъоныгъуакIэм и 9-м мэфэкI лъапIэр — Хэгъэгу зэошхом ТекIо­ны­­гъэр къызыщыдахыгъэр илъэс 75-рэ зэрэхъурэр Адыгеим щыха­гъэунэфыкIыгъ. Зэпахырэ узым зызэриушъомбгъурэм емылъытыгъэу республикэм мэфэкI Iофтхьэбзэ заулэ щызэхащагъ.

Мыекъуапэ и Гупчэ мемо­риал къэгъагъэхэр зэрэкIэлъыралъхьагъэхэмкIэ мэфэкI Iоф­тхьабзэхэр рагъэжьагъэх. Та­къикърэ зэшъыгъохэ нэуж Адыге­им и ЛIышъхьэу КъумпIыл Мурат ветеранхэмрэ респуб­ликэм зэкIэ щыпсэухэрэмрэ мэфэкIымкIэ къафэгушIуагъ.

Республикэм и ЛIышъхьэ цIыфхэм агу къыгъэкIыжьыгъ ТекIоныгъэм икъыдэхын Адыге­им иIахь зэрэхишIыхьагъэр, тихэку щыщ нэбгырэ мин 80 Хэгъэгу зэошхом зэрэхэлэжьагъэр, нэбгырэ мин пчъагъэ ты­лым зэрэщылэжьагъэр. ТичIыпIэгъу 52-мэ Советскэ Союзым и ЛIыхъужъыцIэ, нэбгырэ 13-мэ Щытхъум иорденэу степенищ зиIэр къафагъэшъошагъ. Со­ветскэ Союзым и ЛIыхъужъэу Андырхъое Хъусен ыцIэ Хэ­гъэгу зэошхом итарихъ хэхьагъ.

«Тиветеран лъапIэхэр! ЛIы­хъужъныгъэрэ псэемыблэжь­ныгъэрэ къызэрэзхэжъугъэфагъэмкIэ Урысыем илIэужыкIэхэм щысэтехыпIэу шъуряIэщт. Пыим утекIоным, ушэтыпIэ­шхо­хэр зэпыпчынхэм апае пытэу узэкъотын зэрэфаер шъушъхьэ­кIэ къэжъугъэлъэгъуагъ. Тызэгъусэу къинхэр дэдгъэзыжьынхэу, охътэ къызэрымыкIом IэпыIэгъу тызэфэхъужьынэу ты­жъугъэсагъ.

Непэ зыкIыныгъэ тхэлъэу тихэгъэгу имэфэкI шъхьа­Iэ —ТекIоныгъэм и Мафэ хэтэгъэунэфыкIы», — къыхи­гъэщыгъ КъумпIыл Мурат.

Республикэм исхэм амал яIагъ онлайн Iофтхьабзэу «МыкIодыжьыщт полк» зыфиIорэм хэлэжьэнхэу. Джащ фэдэу ­проектэу «Адыгеим идышъэ жъуагъохэр» зыфиIорэм къыды­хэлъытагъэу тичIыпIэгъу фрон­товикхэм, Советскэ Союзым и ЛIыхъужъхэм яхьылIэгъэ ви­део­роликхэр соцсетьхэмкIэ къа­гъэлъэгъуагъэх.

Проектэу «Памяти Героев» зыфиIорэми Советскэ Союзым и ЛIыхъужъхэм ацIэхэр къыщыраIуагъэх. Адыгеим щыщхэу Советскэ Союзым и ЛIыхъужъ хъугъэхэм ацIэхэр зытет мы­жъобгъу Гупчэ мемориалым дэжь щагъэуцугъ. Фашист техакIохэм псэемыблэжьэу язэогъэ тичIыпIэгъу 43-мэ ацIэ ащ тетхагъ.

Хэгъэгу зэошхом ТекIоны­гъэр къызыщыдахыгъэр илъэс 75-рэ зэрэхъурэм фэгъэхьыгъэу рес­публикэм имуниципалитет пстэу­ми мэфэкI Iофтхьабзэхэр ащыкIуагъэх. Культурэм иIофы­шIэ­хэм онлайн-флешмобэу «Орэд къызэдэтэжъугъаIу» зыфиIо­рэм­рэ концертхэмрэ зэхащагъэх.

«Фронтовой бригадэхэм» якъэ­тынхэр ветеранхэм агу ри­хьыгъэх. Фронтовикхэр зэрыс унэ­хэу фэтэрыбэу зэхэтхэм концерт цIыкIухэр къащатыгъэх.

Зэрэхэгъэгоу такъикърэ зэрэшъыгъорэр сыхьатыр 19:00-м къызагъэлъэгъо нэуж респуб­ликэм исхэм ветераным исурэт аIыгъэу балконым къытехьанхэшъ е шъхьангъупчъэм дэжь уцунхэшъ ТекIоныгъэм и Мафэ фэгъэхьыгъэ орэдыр къаIонэу амал яIагъ.

Сыхьатыр 22:00-м Адыгеим исхэр Урысые Iофтхьабзэу «ТекIоныгъэм иостыгъэжъыехэр» зыфиIорэм хэлэжьагъэх. МэфэкI Iофтхьабзэхэр мэшIо­устхъукIэ аухыгъэх.