Дунэе акциеу «Сад памяти» зыфиIорэм Адыгеир хэлэжьагъ. Дви­жениеу «ТекIоныгъэм иволонтерхэр» зыфиIорэмрэ ТекIоныгъэм ипол­ководцэхэм яшIэжь и Фондрэ Iофтхьабзэм кIэщакIо фэхъугъэх.

Ащ пшъэрылъ шъхьаIэу иIэр заом хэкIодэгъэ тидзэкIолI нэбгырэ миллион 27-мэ яшIэжь гъэлъэпIэгъэныр ыкIи нэбгырэ пэпчъ чъыг фэгъэтIысыныр ары.

ТекIоныгъэм и Мафэ Адыгэ Республикэм и ЛIышъхьэу Къум­пIыл Мурат Мыекъопэ гупчэ мемориалым дэжь чъыг щи­гъэтIысыгъ. Пандемием ыпкъ къикIыкIэ акцием хэлэжьагъэр макIэ, ау къэралыгъо ыкIи хэ­бзэухъумэкIо къулыкъухэм ялIы­кIохэм ащыщхэр Iофтхьабзэм къекIолIагъэх. ПстэумкIи чъыг 12 агъэтIысыгъэх.

— Мыр акцие къодыеу щы­тэп, неущрэ мафэм щыIэкIэшIу тиIэным апсэ емыблэжьэу фэбэнагъэхэм яшIэжь дгъэ­лъэпIэным, тихэгъэгу итарихъ джыри зэ къыфэдгъэзэжьыным фытегъэпсыхьагъ. Республикэм щыпсэурэмэ ащыщыбэхэр акцием къызэрэхэлэжьэщтхэм сицыхьэ телъ. ТекIоныгъэр нахь благъэ зышIыгъэхэм ялIыхъужъныгъэ тщымыгъупшэным тыпылъын фае. Заом ижъалымагъэ зэхэзымышIагъэ унагъо щыIэп. «Сад памяти» зыфиIорэм ишIуагъэкIэ республикэм щыщхэу Хэгъэгу зэошхом щы­фэхыгъэхэм яшIэжь дгъэлъэпIэн тлъэкIыщт, — къыIуагъ КъумпIыл Мурат.

Акцием къыдыхэлъытагъэу чъыг мини 10-м ехъу Адыгеим щагъэтIысыгъ. Красногвардейскэ, Мыекъопэ районхэм, Мыекъуапэ «Сад памяти» зыфиIорэр ащыIэ хъугъэ. Пандемиер зытекIыкIэ республикэм ит муниципалитетхэр зэкIэ Iоф­тхьабзэм къыхэлэжьэщтых. Гъонэжьыкъо Сэтэнай.