Урысыем псауныгъэр къэухъумэгъэнымкIэ и Министер­ст­вэрэ Адыгеим щыIэ ведомствэмрэ цIыфхэм коронавирус узыр нахь макIэу зэпахыным фэшI медицинэ IэпыIэгъу зэрарагъэкIыщт шIыкIакIэр агъэнэфагъ.

Гъэтхапэм игузэгум къыщегъэжьагъэу пэшIорыгъэшъ медицинэ уплъэ­кIунхэр, диспансеризациер къызэтырагъэуцуагъэх, джащ фэдэу сымэджэщым гъолъынэу зипIалъэ къэсыгъэхэми ащ фэдэ амал­хэр яIагъэхэп. Ау ащ къи­кIырэп цIыфхэм медицинэ IэпыIэгъу ямыIэу къэнагъэхэу.

— Медицинэ IэпыIэгъур унэм кIохэзэ арагъэ­гъоты.

— ЦIыфхэр врачым къеджэнхэм фэшI яучастковэ врач-терапевтым е поликлиникэу зэпхыгъэхэм ятелефон номерхэм афытеонхэ алъэ­кIыщт. Врачыр унэм къэ­кIощт, сымаджэм еплъыщт, ищыкIагъэ хъумэ нахь игъэкIотыгъэу ыуплъэ­кIущт ыкIи нэмыкI специалистхэри къыригъэплъыщтых.

— ЦIыфым ипсауны­гъэкIэ гумэкIыгъо горэ щыIэ хъумэ, ар сымэджэщым агъэгъолъыщт.

— ФэгъэкIотэныгъэ зиIэ купхэм ахахьэрэ цIыфхэм ящыкIэгъэщт Iэзэгъу уцхэр медицинэм иIофышIэхэм аIэкIагъэхьащтых.

— Сымаджэхэр гъунэгъоу зэкIэрымыхьанхэм фэшI, сымэджэщхэм зэкIэми зэпахырэ узым пэшIуе­кIорэ режимыр ащагъэлъэ­шыгъ. Медицинэм иIофы­шIэхэри сымаджэхэри узыр къямыолIэнымкIэ къэзы­гъэ­гъунэхэрэ пкъыгъохэмкIэ зэтегъэпсыхьагъэх.

— ОРЗ ыкIи пневмоние уз зиIэхэр перинатальнэ гупчэм агъэгъолъыхэрэп. ГущыIэм пае, ­бзылъфыгъэм ОРЗ ыкIи пневмоние иIэу къыхагъэщымэ, ар Мые­къопэ район сымэджэщым хэтэу агъэпсыгъэ обсервационнэ отделениеу бзы­лъфыгъэ лъэрымыхьэхэм зыщяIазэхэрэм ащэщт.

— Сабыим унэм врач укъыфеджэным фэшI педиатрэм е кIэлэцIыкIухэм зыщяIэзэхэрэ поликлини­кэм уафытеон плъэкIыщт. Педиатрэхэр унэм къэкIох ыкIи ящыкIэгъэ IэпыIэгъур кIэлэцIыкIухэм арагъэ­гъоты.

— Щынэгъончъэу ме­дицинэ IэпыIэгъу арагъэ­кIыным фэшI кIэлэцIыкIу­хэм зыщяIэзэхэрэ сымэ­джэщым «зонитIу» щагъэ­псыгъ — пневмоние ыкIи ОРЗ уз зиIэхэмрэ адрэ отделением чIэлъхэмрэ зэнэмысынхэм фэшI.

— КъэхъугъэкIэ сабый­хэм адэжь врачхэр макIох, алъэплъэх.

— Зыгъэпсэфыгъо ма­фэхэм IэпыIэгъу псынкIэм шъуфытеон шъулъэкIыщт. Станцием гъэлъэшыгъэ шIы­кIэм тетэу, джащ фэдэу щынэгъончъэным иамал­хэр къызфигъэфе­дэхэзэ Iоф ешIэ.

Адыгэ Республикэм псауныгъэр къэухъумэгъэнымкIэ и Министерствэ «илиние плъыр» 8(8772) 53-49-97 Iоф ешIэ.

Ащ иофициальнэ ак­каунтэу «@minzdrav_ra» зыфиIорэмкIэ цIыфхэм къа­гъэхьыгъэ тхыгъэхэм специалистхэм защагъэ­гъуазэ.

КIАРЭ Фатим.