Урысые Федерацием и Президентэу Владимир Путиным жъоныгъокIэ мазэм и 11-м федеральнэ минист­рэ­хэмрэ шъолъыр пащэхэмрэ адишIыгъэ видеозэпхыныгъэм ягугъу къыщишIыгъ цIыфхэм къэралыгъо IэпыIэгъоу къа­ратыщтхэм.

Зыныбжь имыкъугъэхэм апае

Унагъохэу зыныбжь имыкъугъэ сабыйхэр зэрысхэм мылъкоу къаIэкIахьэрэм ыкIи IофшIэнэу яIэм ямылъытыгъэу IэпыIэгъу арагъэкIыщт — зыныбжь илъэс 16-м нэмысыгъэ кIэлэцIыкIу пэпчъ телъытагъэу зэтыгъоу сомэ мини 10 къаратыщт. Ащ пае ны-тыхэм е сабыир зыIыгъым электроннэ лъэIу тхылъ къэралыгъо фэIо-фашIэхэм япортал е Пенсионнэ фондым атхын фае. ЗэкIэмкIи мыщ фэдэ IэпыIэгъу зыIукIэщтхэм япчъагъэ кIэлэцIыкIу миллион 27-рэ.

Къыхэгъэщыгъэн фае мы ахъщэ IэпыIэгъум нэмыкI тынхэу афагъэнэфэ­гъагъэхэр зэрэтыримыхыжьхэрэр:

— илъэси 3-м нэс зыныбжь сабыйхэм сомэ мини 5 зырыз афэкIощт, ны мылъку къызэратыхэрэм ямызакъоу, мыщ фэдэ ныбжь зиIэ сабый зэрыс унэгъо пстэуми ар алъыIэсыщт (мэлылъфэгъум къыщыублагъэу мэкъуогъу мазэм нэс). Тыныр къызтефэхэрэм чъэпыогъу мазэм нэс зарагъэтхын фае;

— щыIэкIэпкIэ анахь макIэм ызыныкъо хъурэ мылъку гъот макIэ зиIэ унагъохэм ясабыйхэу илъэси 3-м къыщыублагъэу 7-м нэс зыныбжьхэм афагъэ­кIощт (мэлылъфэгъу мазэм и 1-м къыщыублагъэу ащ ыпэрэ мазэхэм къатефэрэр зэтыгъоу — гурытымкIэ мин 33-рэ зы сабыим пае, нэужым — мазэ къэс) ыкIи мазэм сомэ мини 3 — зыныбжь имыкъугъэ сабыйхэм апае унагъохэу, ным е тым, е тIуми IофшIэныр зыщычIанагъэхэм (мэлылъфэгъу мазэм къыщыублагъэу мэкъуогъум нэс).

Ащ нэмыкIэу сабыим пае къатыщтыгъэ ахъщэ тыныр фэдитIукIэ нахьыбэ ашIыгъ — сомэ 3375-рэ хъущтыгъэмэ, джы сомэ 6751-рэ.

Проценти 2 чIыфэр атырахыжьышъущт

ХъызмэтшIапIэхэу узэу къежьагъэм пае зиIофшIэн зэрар ехыгъэ хъугъэхэм лэжьапкIэм пэIуагъэхьанэу ахъщэ чIыфэ проценти 2 нахь темыгъэхъуагъэу 2021-рэ илъэсым имэлылъфэгъу мазэ нэс атыжьынэу къаратышъущт. Мы уахътэм къыкIоцI хъызмэтшIапIэм иIофышIэхэм япроцент 90-р къыгъэнэжьы­шъумэ, ахъщэ чIыфэри, процентэу те­хъуагъэри къэралыгъом фигъэгъужьыщт. IофышIэхэм япроцент 80 къыIуигъэнэ­жьышъумэ, фитыжьыщтыр чIыфэу хъыз­мэтшIапIэм ыштагъэм ызыныкъу.

ЫпэкIэ лэжьапкIэхэм апаIуагъэхьанэу зи процент пымылъэу чIыфэхэр ара­тыгъэх, джащ фэдэу зэрар зэхыгъэ хъугъэ хъызмэтшIапIэхэм яIофышIэхэм зы лэжьэпкIэ анахь макIэ хъурэ мылъку афатIупщыгъ.

ХэбзэIахь шъхьаIэхэмрэ страховой тынхэмрэ атырахыжьыщтых

2020-рэ илъэсым иятIонэрэ мэзищ телъытэгъэ хэбзэIахь шъхьаIэхэмрэ (НДС-м нэмыкIхэр) страховой тынхэмрэ ямыгъэтыгъэнхэр бизнес цIыкIумрэ гурытымрэ, джащ фэдэу социальнэ лъэ­ныкъомкIэ лажьэхэрэ мысатыу организациехэм IэпыIэгъоу арагъэгъотыщтхэм ащыщ. Мы шIыкIэм ыпэкIэ фэгъэкIотэныгъэу аратыгъагъэр, тынхэмкIэ афызэкIахьэгъэгъэ уахътэр, ыгъэлъэшыщт. ХъызмэтшIэпIэ миллион 1,5-мэ IэпыIэгъур алъыIэсыщт.

Зыфэлэжьэжьыхэрэм

къафызэкIагъэкIожьыщт 2019-рэ илъэсым хэбзэIахьэу аты­гъэхэр зыфэлэжьэжьыхэрэм (самозанятые) къафызэкIагъэкIожьыщтых. Уры­сыем ицIыфхэу зыфэлэжьэжьыхэу зязыгъэтхыгъэхэу ясэнэхьат Iофэу агъэцакIэрэмкIэ хэбзэIахь зытыщтыгъэхэм икIыгъэ илъэсым атыгъэ хэбзэIахьхэр къэралыгъом и Президент иунашъокIэ къафызэкIагъэкIожьыщтых. Ащ нэмыкIэу зы лэжьэпкIэ анахь макIэ хъурэ хэ­бзэIахь ахэм афатIупщыщт.

Социальнэ IофышIэхэм апае

Мэлылъфэгъу мазэм и 15-м къы­щыублагъэу бэдзэогъум и 15-м нэс ахъщэ тедзэу къаратыщтхэр мыщ фэдэх:

врачхэу социальнэ учреждениехэм ащылажьэхэрэм тхьамэфитIу IофшIэгъу пIалъэм телъытагъэу сомэ мин 40 аратыщт. Коронавирусыр къызэолIагъэхэм IэпыIэгъу арагъэкIымэ, мы пчъагъэр сомэ мин 60 хъущт;

социальнэ IофышIэхэм ыкIи кIэлэегъаджэхэм, гурыт медицинэ ыкIи административнэ IофышIэхэм — сомэ мин 25-рэ. Узэу къежьагъэр къызпыхьагъэхэм Iоф адашIэмэ, сомэ мин 35-рэ; IофшIэкIо къызэрыкIохэм — сомэ мин 15 ыкIи 20;  техническэ IофышIэхэм — сомэ мини 10 ыкIи 15 Iоф зыдашIэрэ лъэны­къохэм ателъытагъэу.

Урысыем и Президент къызэриIуа­гъэмкIэ, коронавирусым пэшIуекIорэ врачхэм атефэрэ мылъкур жъоныгъокIэ мазэм и 9-м ехъулIэу зыIукIагъэр зыфатIупщыгъэхэм азыныкъу. Мы мазэм и 15-м ехъулIэу мэлылъфэгъу мазэмкIэ къатефэрэр зэкIэ аратынэу къэралы-гъом ипащэ пшъэрылъ афишIыгъ.

Президентым зэхищэгъэ зэIукIэгъум ыуж Адыгеим и ЛIышъхьэу КъумпIыл Мурат оперативнэ штабым хэтхэм видеозэпхыныгъэкIэ адэгущыIагъ. Къэралыгъом ипащэ къыгъэуцугъэ пшъэрылъхэр хэз фэмыхъоу гъэцэкIэгъэнхэ зэ­рэфаер ащ афигъэпытагъ.

«Урысыем и Президент къыгъэнэфэгъэ Iофыгъо пстэури дгъэцэкIэн фае. Iэпэдэлэл зи тшIы хъущтэп. Сабый зиIэ унагъохэм къащыублагъэу сатыу цIыкIум­рэ гурытымрэ анэсыжьэу къэралыгъо IэпыIэгъу щыкIэхэрэм ягъэгъотыгъэныр анахь шъхьаIэхэм ащыщ. Коронавирусыр къызэузыгъэхэм яIазэхэрэм къатефэрэ мылъкур мы мазэм и 15-м шIомыкIэу алъыгъэIэсыгъэн фае.

Шъхьафэу шъунаIэ атежъугъэтын фае медицинэм иIо­фы­шIэхэм къатефэрэ страховой тынхэм. Мы зэпстэури зэрэжъугъэцакIэрэм сэ сшъхьэкIэ сылъыплъэщт», — афигъэпытагъ КъумпIыл Мурат.

Къэбарыр хэутыным къыфэзыгъэхьазырыгъэр МэщлIэкъо Саид.