Зэпахырэ узэу коронавирусым ебэныгъэнымкIэ мэхьанэ зиIэхэм зэу ащыщ ар пасэу къыхэбгъэщыныр.

Джащ пае Адыгеим цIыфхэм уплъэкIунхэу арашIылIэхэрэм япчъагъэ щыхагъэхъуагъ. Мы узым икъыхэгъэщынкIэ тишъолъыр ушэтын мин 22-м ехъу щызэхащагъ, ащ щыщэу чэщ-зымафэм мин 1,2-м ехъу ашIыгъ. Мы къэгъэлъэгъонымкIэ пэрытныгъэ зыIыгъ регионхэм Адыгеир ащыщ.

— Мы уахътэм чIыпIэу тызэрыуцуагъэм тест уплъэкIунхэм мэхьанэ зэ­ряIэр республикэм щы­псэухэрэм къагурыIон фае. Ахэм яшIуагъэкIэ узыр нахь пасэу къыхэбгъэщын, цIыфым ипсау­ныгъэ куоу зэщимыгъа­къозэ игъом уеIэзэн ыкIи цIыфэу зэпызыхыхэрэм япчъагъэ нахь макIэ пшIын олъэкIы, — къы­Iуагъ КъумпIыл Мурат.

Пэтхъу-Iутхъум инэша­нэхэу — плъыр-стырыр, чый хъупцIыр, жьы къэщэн хьылъэр, пскэр — къызэутэкIыхэрэм зэу ме­дицинэ IэпыIэгъум зыфарэгъаз.