Адыгеим ичIыгулэжьхэм гъэтхэсэ лэжьыгъэхэм яхэлъхьан гъунэм рафылIагъ.

АР-м мэкъу-мэщымкIэ и Ми­нистерствэ жъоныгъуакIэм и 12-м тызэрэщигъэгъозагъэмкIэ, агъэ­нэфэгъэ гектар 102657-м ипроцент 94-р апхъыгъах. Кощхьэблэ, Тэхъутэмыкъое, Мыекъопэ ыкIи Шэуджэн районхэм гъэтхасэхэм яхэлъхьан ащаухыгъ, Джэджэ ыкIи Красногвардейскэ районхэм ячIыгулэжьхэм къафэнагъэр мэкIэдэд.

Зэряхабзэу, гъэтхасэхэм яна­хьыбэр тыгъэгъазэм рагъэубытыгъ. Ащ пае къэмынэу агъэнэфэгъэгъэ гектар 52134-м къырагъэхъуи 52683-рэ халъхьагъ. Чылапхъэ ашIыщт натрыф гектар 25832-рэ апхъынэу гухэлъ яI, 22407-р чIыгум рагъэкIугъах. Адрэхэм зэнтхъ, хьэ, былымIус ашIыщт уцхэр атырапхъагъэх, хэтэрыкIхэр — нашэ, хъырбыдз, къэбжъый ахалъхьагъ.

Пынджыр тиреспубликэкIэ зыщалэжьырэр Красногвардейскэ, Тэхъутэмыкъое, Теуцожь ыкIи Шэуджэн районхэр ары. Ахэми ащ ипхъын гъунэм ащырафылIагъ. Анахьыбэу Тэхъутэмыкъое рай­оным ичIыгулэжьхэр ары мы культурэм пылъхэр. Мыгъэ гектар 6254-рэ агъэнэфэгъагъ, ар халъхьэгъах. Адрэ муниципальнэ образованиехэми къафэнагъэр макIэ.

Ом ымыгъэохъухэмэ, мы тхьамафэм ыкIэм нэс гъэтхасэхэм япхъын аухынэу тичIыгулэжьхэр мэгугъэх.

ХЪУТ Нэфсэт.