Коронавирусым къиныгъоу къыздихьыгъэхэр цIыфхэм нахь псынкIэ къафэхъуным фэшI кIэлэцIыкIоу зыныбжь илъэсищым емыхъугъэхэм къаратынэу агъэнэфэгъэ ахъщэ тедзэм фэгъэхьыгъэ упчIэхэр ПенсиехэмкIэ фондым къыфэкIох. Ахэм джэуапхэр къяттыжьыхэмэ тшIоигъуагъ.

Хэта ахъщэ тедзэ сомэ 5000-р къы­ратынэу къызтефэрэр?

Унагъоу 2020-рэ илъэсым ибэдзэогъу мазэ и 1-м шIомыкIэу сабый къызэры­хъухьагъэу, ны мылъкум исертификат къызтефэхэрэм (ар зэрэщытэу агъэфедагъэми) ахъщэ тедзэр къафэкIонэу агъэпсын фит.

Зыныбжь илъэсищым шIокIыгъэ сабыим къыратыщта?

УФ-м и Президент блэкIыгъэ мэлылъфэгъу мазэм и 7-м унашъоу къышIы­гъэм къызэрэщыдэлъытагъэмкIэ, илъэсищым зыныбжь емыхъугъэхэр ары къызэ­ратыщтыр. Ахэм къахеубытэх мэлылъфэгъу-мэкъуогъу мазэхэм зыныбжь ащ нэсыхэрэри. КIэлэцIыкIур мэкъуогъум ыкIэм къэхъугъэмэ?..

Ащ а мазэмкIэ къыратыщт. ГущыIэм пае, мэкъуогъум и 30-м къэхъугъэми, унагъом лъэIу тхылъыр ытынэу фитыныгъэ иI. Сабыим ыныбжь жъоныгъокIэ мазэм илъэсищ мэхъумэ?..

Ахьщэ тедзэр мэлылъфэгъуми, жъо­ныгъуакIэми къыфэкIощт. Сабыир илъэ­сищ зыщыхъурэ мазэри къыхеубытэ.

Ны мылъкум исертификат унагъом къытефэу, ау ымыгъэпсыгъэмэ къыратыщта?

Ары. Сертификатыр хьазырми мы­хьазырми ПенсиехэмкIэ фондым испециалистхэм агъэунэфынышъ, тхылъхэр агъэпсыщтых.

Ахъщэ тедзэр ны мылъкум къыщыдэлъытагъэм къыхэхыгъэщта?

Мыр IэпыIэгъу тедзэу федеральнэ бюджетым къыхахыщт. Ащ пае ны мылъкум къыщыкIэщтэп.

Унагъом гъотэу иIэм елъытыгъэу ахъщэ тедзэр фагъэнэфэщта?

Хьау. Мы ахъщэ IэпыIэгъур унагъом къыIэкIахьэрэм емылъытыгъэу къатыщт.

ЛъэIу тхылъыр сыдэущтэу птын плъэкIыщта?

Ахъщэ тедзэр къыуатыным пае ПенсиехэмкIэ фондым иинтернет нэкIубгъо е къэралыгъо фэIо-фашIэхэм япортал лъэIу тхылъыр ащыптын плъэкIыщт. Ар чъэпыогъум и 1-м шIомыкIэу бгъэцэкIэн фае.

Джащ фэдэу фондым ичIыпIэ органэу узпэблагъэм уекIуалIэми пIахыщт, ау ащ пае пэшIорыгъэшъэу чэзыум зыхябгъатхэмэ нахьышIу.

Узщытхыгъэм (место прописки) нэмыкI чIыпIэ лъэIу тхылъыр щыптын уфита?

Ары. Узщыпсэурэм пэблэгъэ чIыпIэ органым уекIуалIэмэ пIахыщт.

Сыд фэдизырэ ахъщэ тедзэр унагъом къыфэкIощта?

Мы IэпыIэгъур мэзищым, мэлы­лъфэгъу, жъоныгъокIэ ыкIи мэкъуогъу мазэхэм къатыщт.

Илъэсищым аныбжь шIомыкIыгъэу сабыитIу, щы унагъом исымэ, нэбгырэ пэпчъ лъэIу тхылъыр фэптын фая?

Хьау. СабыитIу, щы, нахьыбэ исыми зы лъэIу тхылъ птымэ икъущт.

Ахъщэр бгъэпсыгъэу, къыпфэкIощтмэ сыдэущтэу зэбгъэшIэн плъэ­кIыщта?

ЛъэIу тхылъыр ПенсиехэмкIэ фондым иинтернет нэкIубгъо е къэралыгъо фэIо-фашIэхэм япортал щыптыгъэмэ, джэуа­пыр ащ къихьащт. Ау фондым ичIыпIэ орган уекIолIэгъагъэмэ, макъэ къамыгъэIоу счетэу бгъэлъэгъуагъэм къырагъэхьащт. Ахъщэр таущтэу унагъом къыIэ­кIэхьащта?

Банкым счетэу щигъэпсыгъэм къи­хьащт. Коронавирусым зимыушъомбгъу­ным фэшI, почтэм е нэмыкIэу ахъщэхэр цIыфхэм аIэкIэзгъахьэрэ организациехэм къахьынэу къыдэлъытагъэп.

УФ-м ПенсиехэмкIэ ифонд и Къутамэу АР-м щыIэм ипресс-къулыкъу.