1945-рэ илъэсым ижъоныгъуакIэ ТекIоныгъэр къызыдахы­гъэм ыуж илъэс 75-рэ тешIэжьыгъэми, тицIыфхэм лIыхъужъныгъэу зэрахьагъэр тщыгъупшэрэп. Зэманхэр зэблэкIых, лIэужыкIэхэр къэхъух, ау Хэгъэ­гум ишъхьафитыныгъэ зэкIэми апшъэ зыгъэу­цурэ нэбгырэ пэпчъ мы мафэр сыдигъуи ишIэжь хэлъыщт. Тихэгъэгушхо щыпсэу­хэрэмкIэ ТекIоныгъэм и Мафэ лъэпкъ зыкIыныгъэм, дзэ щытхъум, лIыблэнагъэм ятамыгъэу щыт.

Нахьыжъхэм я Совет хэтхэр Хэгъэгу зэошхом иветеранхэу, тылым щылэжьагъэхэу заом илъэхъан ушэтыпIабэ зэпызычыгъэхэм афэгушIох. ЛIыхъужъныгъэрэ пытагъэрэ къызэрэзхэжъу­гъэфагъэм фэшI шъхьащэ къышъуфэтэшIы, тхьашъуегъэпсэу шъотэIо. ЩыIэныгъэм щызэфэшъухьысыгъэ опытышхор къызыфэжъугъэфедэзэ, ныбжьыкIэхэм япIункIэ, лъэпкъ зэгурыIоныгъэр республикэм щыгъэпытэгъэнымкIэ непи Iофышхо шъошIэ.

Псауныгъэ пытэ, щыIэкIэ-псэукIэ дэгъу шъуиIэнэу, мамыр огур ренэу шъуашъхьагъ итынэу, шъуигупсэхэм яфэбагъэ зэхашъушIэзэ илъэсыбэрэ шъущыIэнэу, Урысыем пае гъэхъэгъакIэхэр шъушIынэу тышъуфэлъаIо!

ГъукIэлI Нурбый. Адыгэ Республикэм инахьыжъхэм я Совет итхьамат.