Адыгэ Республикэм щыщ кIалэхэм дзэ къулыкъур Къырым щахьы.

Апшъэрэ еджапIэхэр, колледжхэр къэзыухыгъэхэ кIалэхэр шIэжьымрэ щытхъумрэ я Илъэ­сэу Урысыем щыкIорэм нэIуасэ щызэфэхъугъэх. Дзэм къулы­къур щахьызэ язэфыщытыкIэхэр пытэ хъугъэх.

ГъукIэлI Астемир, ЦIэгъошIу Амир, Цуужъ Азэмат, Къэбэртэе Андзаур, Къумыкъу Руслъан, Аулъэ Руслъан, Иванов Ильяс, Чон Имрей, Головин Роман, нэмыкIхэм присягэр аштэ зэ­хъум, яIахьылхэр, ныбджэгъу­хэр къафэгушIуагъэх. Къулыкъур зыщахьырэ чIыпIэм къакIохи, зэхахьэм хэлэжьагъэх.

— Къэлэ-лIыхъужъэу Севастополь дзэ къулыкъур щытэхьы, — къытиIуагъ Цуужъ Азэмат. – Хэгъэгу зэошхом илъэхъан тянэ-тятэхэм ятэжъхэм Севастополь, Къырым къаухъума­гъэх, фашист техакIохэр зэха­къутагъэх. Тинахьыжъ лъапIэхэм тарэгушхо.

ТекIоныгъэм ия 75-рэ илъэс Адыгеим щыщ кIалэхэм гъэхъагъэхэр пагъохых. ЯдзэкIолI сэнэхьат аIэ къырагъэхьагъ, спортым пылъхэу япсауныгъэ агъэпытэ.

НыбжьыкIэ гъэсагъэхэр тиIэх. Революционнэ лIыхъужъ ыкIи лэжьэкIо щытхъум янэшанэхэм ахэр афэшъыпкъэх. Къулыкъур цыхьэшIэгъоу ахьы.

Сурэтым итхэр: присягэр зыштэгъэ кIалэхэу дзэ къулыкъур зыхьыхэрэр.