Экономикэм ыкIи социальнэ лъэныкъом IэпыIэгъу афэхъугъэнымкIэ унашъохэр зэрагъэца­кIэхэрэм, коронавирусым пэшIуекIогъэнымкIэ щыIэ режимым игъорыгъоу текIыжьынхэм иIофыгъохэм афэгъэхьыгъагъ Урысыем и Президентэу Владимир Путиным тыгъуасэ видеоселектор зэхэсыгъоу зэхищагъэр. Ащ хэлэжьагъ Адыгеим и ЛIышъхьэу КъумпIыл Мурат.

Iофхэм язытет елъытыгъэу цIыфхэм ыкIи бизнесым IэпыIэгъу зэрафэхъущтхэ амалхэр ыпэкIэ зэрагъэнэфэгъагъэхэр къэралыгъом ипащэ зэхэсыгъом ипэублэ къыщыхигъэщыгъ.

— Унэшъо шъхьаIэу тшIы­гъэ­хэм ащыщых сабыйхэр зэрыс унагъохэм, медицинэм иучреждениехэм ыкIи IэпыIэгъу псынкIэм икъулыкъушIэ­хэм занкIэу тынхэр аIэкIэгъэ­хьэ­гъэнхэр. Джащ фэдэу гъэ­тха­пэм и 1-м ыуж охътэ гъэнэфагъэкIэ зиIофшIапIэ чIэзынагъэхэм аратырэ посо­бием хэгъэхъогъэныр, IофшIэпIэ чIыпIэхэр къызэтезыгъэ­нэгъэ предприятиехэм лэжьапкIэр атынымкIэ чIыфэхэр ятыгъэнхэр, хэбзэIахьхэмкIэ, кредит ыкIи бэджэнд тынхэмкIэ уахътэр афызэкIэхьэгъэныр, нэ­мыкIхэри къыдэтлъытагъэх, — къыIуагъ Владимир Путиным.

ЦIыфхэм ыкIи экономикэм IэпыIэгъу афэхъугъэнымкIэ Iофэу ашIэрэм къытегущыIагъэх профильнэ ведомствэхэм япащэхэр.

Роспотребнадзорым ипащэу Анна Поповар коронавирусым пэшIуекIогъэнымкIэ щыIэ режимым игъорыгъоу текIыжьынхэмкIэ ведомствэм анахьэу ынаIэ зытыридзэрэ лъэныкъохэм къа­тегущыIагъ.

Федеральнэ унашъоу щыIэхэм адиштэу жъоныгъуакIэм и 11-м ыуж зэрэзекIонхэ фаем иплан шъолъырхэм зэхагъэуцонэу УФ-м и Президент пшъэрылъ къафишIыгъ.

— Коронавирусым зызэриушъомбгъурэмкIэ Iофхэм язытет субъектхэм ащызэ­фэдэп. ЫпэкIэ къызэрэхэзгъэ­щыгъэу, ищыкIагъэ хъумэ пэшIорыгъэшъ Iофтхьабзэхэм язэхэщэн пытагъэ хэлъэу ты­къекIолIэн е ащ хэхъоныгъэ фэтшIын, ащ дакIоу амал щыIэмэ режимыр нахь «дгъэ­шъэбэн» фае. Мыщ дэжьым шIэныгъэлэжьхэм, специалистхэм яеплъыкIэхэр къыдэтлъы­тэнхэм мэхьанэшхо иI. ТыгуIэ, хэукъоныгъэ тшIы хъущтэп, — къыIуагъ къэралыгъом ипащэ.

Зэхэсыгъом ыуж КъумпIыл Мурат къызэрэхигъэщыгъэмкIэ, экономикэм илъэныкъо шъхьа­Iэхэм ыкIи мэкъумэщ хъызмэтым ипредприятиехэм яIофшIэн рагъэжьэжьынымкIэ лъэбэкъу гъэнэфагъэхэр ашIыгъэх. Ау ахэм санитар шапхъэхэр шIокI имыIэу агъэцэкIэнхэ фае.

— Шъолъырым иэкономикэ хэхъоныгъэ ышIыныр пшъэ­рылъ шъхьаIэхэм ащыщ, ау ащ дакIоу эпидемиологием ылъэныкъокIэ Iофхэм язытет нахь дэи тшIы хъущтэп. УФ-м и Президентэу Владимир Путиным ипшъэрылъкIэ жъоныгъуакIэм и 11-м ыуж экономикэм иIофшIэн игъорыгъоу зэрэригъэжьэжьыщтым къыдыхэлъытэгъэ Iофтхьабзэхэм яплан дгъэхьазырыщт, — къы­хигъэщыгъ Адыгеим и ЛIышъхьэ.

Шъугу къэдгъэкIыжьын, пандемием илъэхъан цIыфхэм яшIуагъэ арагъэкIыным фэшI республикэм ипащэ ипшъэрылъкIэ гъот макIэ зиIэ унэгъо 10886-мэ зэтыгъо ахъщэ IэпыIэгъу арагъэгъотыгъ. Джащ фэдэу гъомылапхъэхэр зэрылъ Iалъмэкъ мин 37,7-м ехъу зигъот макIэхэм, сэкъатныгъэ зиIэхэм ыкIи зыныбжь хэкIотагъэхэм атырагощагъэх. Бизнесым хэщагъэхэм къэралыгъо IэпыIэгъу арагъэгъотыным фытегъэпсыхьэгъэ федеральнэ ыкIи шъолъыр амалхэр агъэфедэх.

ТХЬАРКЪОХЪО Адам.