Акциеу «Врачхэм тафэраз» зыфиIорэр Адыгеим щылъагъэкIуатэ. ТапэкIэ ащ къыдыхэлъытагъэу партиеу «Единэ Россием» ишъолъыр къутамэ хэтхэм республикэ инфекционнэ госпиталым иIофышIэхэм автомобилэу «Лада Веста» къафащэфыгъ ыкIи аратыжьыгъ.

Джы партием хэтхэм унашъо ашIыгъ щай зыде­шъощтхэ гъомылапхъэхэр врачмэ къафащэфынхэу ыкIи медицинэм иIофышIэхэм аратынхэу. «Единэ Россием» ишIушIэ Iофтхьабзэ къыхэлажьэ «Магнит» зыцIэ тучан зэхэтхэр. Къэмлан 1500-рэ къаугъоигъ, ащ хэхьэх IэшIу- IушIухэр ыкIи печенье зэфэшъхьафхэр, кофе, щайуцхэр.

— Мы мафэхэм пар­тиеу «Единэ Россиемрэ» социальнэ лъэныкъор къыдэзылъытэрэ бизнесымрэ шIогъабэ зыпылъ Iофхэр агъэцакIэх. БэмышIэу партием хэтхэм ягукъэкIкIэ гъот макIэ зиIэ цIыфхэм апае гъомылапхъэхэр зэ­рылъ къэмланхэр агъэхьазырыгъэх. Волонтермэ ахэр цIыфмэ аIэкIагъахьэх. Джы непэ врачхэу гъэпсэфыгъо зимыIэу лажьэхэрэмэ щай зыдешъощтхэ гъомылапхъэ­хэр аIукIэщтых. Эпидемием апэ итхэу ебэныхэрэ медикхэм фыщытыкIэшIоу афыряIэр мы акцием къегъэлъагъо, — къыIуагъ Адыгеим и ЛIышъхьэу, партием ишъолъыр къутамэ и Cекретарэу КъумпIыл Мурат.