Адыгеим и ЛIышъхьэу, партиеу «Единэ Россием» ирегион къутамэ и Секретарэу КъумпIыл Мурат «Единэ Россием» ифракциеу Адыгэ Респуб­ликэм и Къэралыгъо Совет — Хасэм щыIэм изэхэсыгъо хэлэжьагъ. Парламент фракцием ипащэу, Адыгэ Респуб­ликэм и Къэралыгъо Совет — Хасэм и Тхьаматэу Владимир Нарожнэм ар зэрищагъ.

Iофыгъо шъхьаIэу мыщ зыщыхэплъа­гъэхэр партиеу «Единэ Россием» и Тхьаматэу Дмитрий Медведевыр кIэщакIо зыфэхъугъэр ары. Партием къы­дыхэтхэм ар къяджагъ коронавирусыр къызэтегъэуцогъэным ямэзэ лэжьапкIэрэ янэмыкI гупыкI ахъщэ IэпыIэгъурэ апэIуагъэхьанэу.

«Дмитрий Медведевым игъо ылъэ­гъугъэм икъоу къыдесэгъаштэ, мэхьанэшхо зиIэ ащ фэдэ IофтхьэбзэшIум шъукъыхэлэжьэнэу сышъоджэ. Мылъкоу аугъоищтым щыщ гъот макIэ зиIэ унагъохэм арыс кIэлэеджакIохэр яунэхэм арысхэу еджэнхэ зэралъэ­кIыщт электрон техникэм икъэщэфын пэIуагъэхьан фае. Мылъкоу къэнэжьырэмкIэ зызэраухъумэщтхэ пкъыгъохэр медицинэ учреждениехэм къафащэфын фае», — къыIуагъ Адыгэ Респуб­ликэм и ЛIышъхьэ.

Джащ фэдэу КъумпIыл Мурат къызэрэхигъэщыгъэмкIэ, зэпахырэ уз Iаем зыкъызиштагъэм щегъэжьагъэу партиеу «Единэ Россием» хэтхэм пенсионерхэм, сэкъатныгъэ зиIэхэм, медицинэ Iофы­шIэхэм, чIыпIэ къин ифагъэхэм IэпыIэгъу арагъэгъоты. ГущыIэм пае, партиеу «Единэ Россием» ирегион къутамэ АРКБ-м иинфекционнэ госпиталь автомобилэу «Лада Веста» ритыгъ. Ар кIэщакIо зэрэхъугъэм тетэу коронавирусым епхыгъэу чIыпIэ къин ифагъэхэм IэпыIэгъу афэхъугъэх, гъомылапхъэхэр зэрылъ Iалъмэкъ мин 23,5-рэ ахэм афагощыгъ.

«Коронавирусым республикэм иэконо­микэ чIэнагъэу ригъэшIыгъэр зыпкъ игъэуцожьыгъэнымкIэ, цIыфхэм ящыIэкIэ-псэукIэ зэтегъэуцожьыгъэнымкIэ федеральнэ гупчэм амал гъэнэфагъэхэр зэрехьэх. Зэпахырэ узым цIыфхэм нахь макIэу зэрар арихынымкIэ кIуачIэу, амалэу щыIэхэр зэрагъэуIугъэх. Джыдэдэм хэбзэ Iэшъ­хьэтетхэм зэрахьэрэ Iофтхьабзэхэм анэмыкIэу, цIыфхэр чIыпIэ къинхэм къарызыщыжьыщт сыд фэдэрэ IэпыIэгъуи мэхьанэшхо иI. «Единэ Россием» хэтхэм мы лъэныкъомкIэ яшIогъэшхо къагъэкIуагъ», — хигъэунэфыкIыгъ Адыгеим и ЛIышъхьэ.

ТекIоныгъэм и Мафэ зэрэхагъэунэфыкIыщтми зэхэсыгъом щытегущыIа­гъэх. Коронавирусым зыкъызэриштагъэм мэфэкIым имэхьанэ къыригъэIыхынэу зэрэщымытыр республикэм и ЛIышъхьэ къыIуагъ. Ветеран пэпчъ фэгушIонхэ, волонтерхэм ащ къэгъагъэхэмрэ шIухьафтынхэмрэ ратынхэ фае.

Джащ фэдэу госпитальхэм чIыпIа­кIэхэр къащызэIухыгъэнхэмкIэ, медицинэ учреждениехэм ящыкIэгъэ оборудованиер къафэгъотыгъэнымкIэ, гъот макIэ зиIэхэм IэпыIэгъу ягъэгъотыгъэнымкIэ республикэм Iофтхьабзэу щызэрахьэхэрэм зэхэсыгъом КъумпIыл Мурат къащытегущыIагъ.

Адыгэ Республикэм и ЛIышъхьэ партиеу «Единэ Россием» хэтхэм къя­джагъ цIыфхэм IэпыIэгъу ягъэгъотыгъэ­нымкIэ Iофэу ашIэрэр лъагъэкIотэнэу, цIыфхэм яфэныкъоныгъэхэм ягъэцэкIэн анаIэ тырагъэтынэу.