Ныбджэгъу лъапIэхэр, зэ­кIэхэми шъузэрэщыгъуазэу мэлылъфэгъум и 14-м, 2020-рэ илъэсым врачэу, хирург-онко­логэу КIэсэбэжъ Аслъан Нурбый ыкъом игъонэмысэу идунай ыхъожьыгъ. А къэбар гухэкIыр зэхэзыхыгъэу зыгу лъэш дэдэу къемыуагъэ Адыгеим цIыф къи­нагъэп пIоми ухэ­у­къощтэп. Адыгеим чылагъо къинагъэп, къутыр цIыкIухэм анэсыжьэу, къысфэмытхьаусыхагъэ. СМС бэдэдэ къыс­IукIагъ. Ау зэкIэми ятхьаусыхэ макъэ зэхэ­схыгъэп, непэ къызнэсыгъэми къызэ­дэсымыхы­гъэу сызэмы­джагъэу телефоным къытена­гъэр гъу­нэнчъ. Ахэр чIыпIэ зэфэшъхьаф­хэм къарыкIыгъэх: Испанием, Италием, Тыркуем, Израиль, Абхъазым, Осетием, Щэщэным, Ингушетием, Дагъыстан ыкIи нэмыкIыбэхэм. ЦIы­фэу къыс­фытеуагъэ­хэу, къысфэтхагъэхэу, зимылъку къызнэзгъэсыгъэхэм игъом джэуап зэрясымытыжьыгъэр къысфарэгъэгъу. КIуачIэрэ гущыIэрэ зэзгъотылIэжьыгъэп… Нэужым сафытеожьын. КъытфэгумэкIыгъэхэшъ «Тхьаегъэ­псэух».

ТиунагъокIэ а зы къинихьагъум тыкъыщыуцугъэп. Ари Тхьэ Iоф. Ащ хэпшIыхьан щыIэп. Аслъан ятэу КIэсэбэжъ Нурбый Джыраслъанэ ыкъом икIалэ игъонэмыс зэрэхъугъэр ыгукIэ фэщэчыгъэп — хьадэгъу фэ­хъугъ. Нурбыйи икIалэ ыуж бэкIэ къимынэу мэлылъфэгъум и 25-м идунай ыхъожьыгъ. Лъфы­гъэр уапэ хъуным нахь тхьамыкIагъо щыIэп… Ар цIыфмэ бэшIагъэу агъэунэфыгъэу щыт.

Ятэрэ ыкъорэ ядунай зыща­хъожьыгъэр охътэ къызэрыкIоп. Дунаир зэрэдунаеу уз щына­гъом зыщызэлъиштэгъэ лъэхъан. Ау щытми, зидунай зыхъо­жьы­гъэ­хэм яфэIо-фашIэхэр агъэтэрэз­хи, ячIыIахь игъом арагъэгъотыжьыгъэшъ, ар зымы­уасэ щыIэп. ТиIахьылхэу, тиблагъэ­хэу, анахьэу Пщыжъхьаблэхэм къатенагъэ щыIэп. Адыгэхэм сыдигъокIи зэдеIэжьыныр яхэбзагъ, ар непи дэгъоу тхэлъ. ЦIыфхэр хэмытэу сыдэущтэу къиныр пщэчыщта? Тхьаегъэ­псэу ясэIо цIыфэу къапе­кIо­кIыгъэхэм. Тхьэм щыIэкIэ дахэ яIэу, бэгъашIэ ешIых.

Ныбджэгъу лъапIэхэр! Тиуна­гъокIэ тхьамыкIагъоу къытэкIугъэм пае Адыгэ Республикэм и ЛIышъхьэу КъумпIыл Мурат Къэралбый ыкъомкIэ къебгъэ­жьэнышъ, Адыгеим псауныгъэр къэухъумэгъэнымкIэ имини- стрэу Мэрэтыкъо Рустем Батыр­бый ыкъом, Адыгэ Респуб­ли- кэм шIэныгъэмрэ гъэсэны­гъэмрэкIэ иминистрэу КIэрэщэ Анзаур Аслъанбэч ыкъом, Адыгэ республикэ онкологическэ сымэджэщым ипащэу Бэрэтэрэ Сэфэр Хьамидэ ыкъом, ащ иIо­фшIэгъухэм, сэнэхьатхэм за­щыхагъахъорэ Адыгэ респуб­ликэ институтым ипащэу Тхьагъо Фа­тимэ Рэмэзан ыпхъум (зэкIэмэ ацIэ къэпчъыгъуай), ныбджэгъухэу, шъэогъухэу, Iахьылхэу, благъэхэу, цIыф къы­зэрыкIохэу зигущыIэ къызнэзгъэсыгъэхэм, къызнэзгъэсымэ зышIоигъуагъэхэми лъэшэу тиунагъокIи, тилIакъокIи тафэраз. «Тхьашъуегъэпсэу» ятIомэ тшIоигъу. Тхьам хэтрэ цIыфи къиным пэчыжьэ ешI. Ящагу къэлапчъэ­хэр хъяркIэ къызэ­Iуаххэу, хъярыр къябэкIэу, ма­мыр щыIакIэ яIэу, узынчъэхэу псэунхэу афэтэIо.

КIэсэбэжъ Нэфсэт, икIалэхэу Заур, Азэмат, инысэхэу Русет, Марет, Аид.