Зэрэдунаеу непэ гумэкIыгъо шъхьаIэу иIэр коронавирусыкIэу «Covid-19»-кIэ зэджагъэхэр къагъэуцун зэрамылъэкIырэр ары. Нэ­бгырэ миллион пчъагъэмэ ар къяолIагъ, ыгъэлIагъэри макIэп...

Адыгее цIыкIум исэу мы уз мэхъаджэр къызэолIагъэм ипчъа­гъэ, псауныгъэм икъэухъумэнкIэ Министерствэм къызэритырэмкIэ, нэбгырэ 200-м къехъугъагъ. Нэбгырэ 70-м ехъумэ япсауныгъэ зэтеуцожьыгъэшъ, ащ тегъэгушIо. ГухэкIышхор, нэ­бгыри 7 зэрекIодылIагъэр ары.

Мы пчъагъэр къэпIонкIэ бэп, ау цIыфышъхьэм игугъу зэрэ­пшIырэр къыдэплъытэмэ, зыри бэ.

Адыгэ республикэ онкологическэ сымэджэщым иврачыгъэу КIэсэбэжъ Аслъан илъэс 46-рэ ныIэп ыныбжьыгъэр. Вирусым ытхьабылхэм иягъэ аригъэкIыгъэу, хьылъэу сымэджэщым бэрэ чIэлъыгъ. Медикхэм амалэу яIэ пстэур рахьылIагъ, ау, гухэкIыми, фырикъугъэхэп. Исэнэхьат шIу зылъэгъоу, ыгуи ыпси хэлъэу зыгъэцакIэрэ врачыгъ, Iэ­дэбрэ гукIэгъурэ зыхэлъ цIы­фыгъ. ТапэкIэ гухэлъыбэ иIагъ...

Аслъан ежь имызакъоу игу­псэхэми зэпахырэ узыр къяо­лIагъэу ебэных. Ау ятэу гууз хьылъэ зиIагъэм а къинышхохэр фэщыIагъэхэп, мэфэ заулэ на­хьы­бэ темышIагъэу дунаим ехы­жьыгъ.

Бибэ Мурат Адыгеим щызэлъашIэрэ предпринимателыгъ. Адыгэ лъэпкъым итарихъ, икультурэ, ишэн-хабзэхэр къэгъэнэ­жьыгъэнхэм, лъыгъэкIотэгъэнхэм зиIахьышхо хэзылъхьэгъэ цIыф. Адыгеим ичIыпIэ дахэхэр тыдэ­кIи щызэлъашIэнхэм, цIыфхэр нахьыбэу ащыIэнхэм, зекIоным зиушъомбгъуным ишIушIагъэ ахэлъ. ТапэкIи ащ фэдэ гухэ­лъыбэ иIагъ. Коронавирусэу къеолIагъэм ыпкъ къикIэу, нэмыкI узэу иIэхэр къытекIохи, жъоныгъуакIэм и 3-м ар дунаим ехыжьыгъ

Илъэс 59-рэ ныIэп ыныбжьыгъэр Хьахъукъо Сусаннэ. Адыгэ­къалэ исымэджэщ илъэсыбэ хъугъэу ар медсестрау щылажьэщтыгъ. Вирусыр ащ къыщеолIагъ. КъымышIэу иунагъо къы­хьыгъ. Сусанни ишъхьэгъуси уз мэхъаджэм къыIэпахыжьынхэ алъэкIыгъэп. Мыхэми уз гъэтIылъыгъэу яIэхэр коронавирусым къыгъэбырсырыхи, врачхэр фырикъугъэхэп. ШъэуитIоу зэдапIугъэр ибэу къэнагъэх.

Кушъу Симэ хьисапымкIэ ри­гъаджэщтыгъэх, Адыгэкъалэ икIэ­лэегъэджэ пэрытхэм ащыщыгъ, «Народнэ гъэсэныгъэм изаслуженнэ IофышI» зыфиIорэ цIэр къыфагъэшъошэгъагъэу щытыгъ. ЛIэшIэгъу ныкъо фэ­ди­зыр а сэнэхьатым ритыгъагъ, джыри Iоф ышIэщтыгъ.

Симэ коронавирусыр къы­зеуалIэм, ар хагъэкIыжьын алъэ­кIыгъ, ау нэмыкI уз гъэтIылъыгъэу иIэхэр къытекIохи, ахэм афырикъугъэхэп.

Мыхэми, зыцIэ къетымыIуагъэу Тэхъутэмыкъое ыкIи Теуцожь районхэм ащыщхэу коронавирусым ыпкъ къикIыкIэ дунаим ехыжьыгъэхэми анахьыбэхэм уз гъэтIылъыгъэхэр яIагъэх, ау илIэныгъэ дэгуIэу зиIоф дэй зыпари ахэтыгъэп. Неущырэ мафэмкIэ гухэлъхэр яIагъэх, IофшIапIэхэм аIутыгъэх, ялъфыгъэхэм, янэ-ятэхэм, яIахьылхэм, яныбджэгъухэм, яIофшIэгъухэм ахэтынхэу фэягъэх. Зэпахырэ узыр мыхъугъэмэ, джыри псэущтыгъагъэх.

Джэнэт лъапIэ Тхьам къарет. КъакIэныгъэхэу уз мэхъаджэм ебэныхэрэм япсауныгъэ зэтеуцожьынэу тафэлъаIо.

Коронавирусыр щымыIэу е ащ ымыгъалIэхэу зыIохэрэм зэрэхэукъохэрэр къятIомэ тшIои­гъу. Специалистхэм къыкIагъэтхъы, цIыфым уз гъэтIылъыгъэ иIэу коронавирусыр къызеуа­лIэкIэ, ахэр нахь къегъэбырсырых, хьылъэ къэхъу, медицинэр фырикъужьырэп. Ары «коронавирусым ыпкъ къикIыгъ» зыкIа­Iорэр. Ипсауныгъэ щыкIагъэ фэ­мыхъугъэу щыIэр бэп. Ар зэкIэми къагурыIонэу тыфай.

«Covid-19»-р зыфэдэр, зыкъы­зэришIыщтыр, узэребэныщтыр джыри специалистхэм агъэунэфыгъэп. Ар уз щынагъоу зэрэщытыр, о къыбнэмы­сыщтэу пIоныр зэрэмытэрэзыр, узщыгугъын зэрэщымыIэр АР-м псауныгъэр къэухъумэгъэнымкIэ иминистрэу Мэрэтыкъо Рустем шъхьаихыгъэу цIыфхэм закъыфигъазэзэ къыIуагъ. ХэкIыпIэ закъоу щыIэр зэхэмыхьанхэр, шъхьадж иунэ исынхэр ары.

ЖъоныгъокIэ мэфэкIхэр джы­ри текIыгъэхэп. Ахэр нахьыбэ­хэм игъэкIотыгъэу хагъэунэфыкI­хэу яхабз. Арэу щытми, мыгъэ щэIагъэ къызхэдгъэфэн фае. ТызэдеIэжьмэ тыфырикъущт.

ХЪУТ Нэфсэт.