IофшIапIэ зимыIэу къэнагъэхэм пособие къаратынымкIэ ыкIи цIыфхэм IофшIэн языгъэгъотырэ гупчэм иучет хэуцонхэ алъэкIынымкIэ Уры­сые Федерацием цифрэ хэхъоныгъэмкIэ, зэпхыныгъэмкIэ ыкIи комму­никацие жъугъэмкIэ и Министерствэ и ЗыкI къэралыгъо портал (ЕПГУ) хэушъхьафыкIыгъэ нэкIубгъо къыщызэIуихыгъ.

А нэкIубгъор къызфагъэфедэн алъэкIыщт:

— IофшIапIэм къыIуагъэкIыгъэхэм;

— унэе предпринимательствэр, очыл ыкIи нотариальнэ IофшIэныр къэзыгъэуцугъэхэм;

— зыми емыпхыгъэу зышъхьэ Iоф фэзышIэжьхэу ре­гистрациер щызыгъэтыгъэхэм;

— апэрэу IофшIэн лъыхъурэм.

2020-рэ илъэсым гъэтхапэм и 1-м къыщегъэжьагъэу ыкIи ащ къыкIэлъыкIоу IофшIапIэм къы­IуагъэкIыгъэхэм пособиеу сомэ мин 12130-рэ, ащ нэмыкIэу ны-тыхэм язым ясабый пэпчъ (илъэс 18-м емыхъугъэхэм) сомэ мини 3 зырыз аратыщтых. Джащ фэдэу шъолъырхэми ябюджет щыщ ахъщэ тедзэхэри мыхэм аратынхэ алъэкIыщт.

Гъэтхапэм и 1-м ыпэ IофшIапIэм къыIуагъэкIыгъэхэм ыкIи мэзэ 12-м къыкIоцI тхьэмэфэ 26-м нахь мымакIэу Iоф ышIа­гъэу къыIуагъэкIыгъэмэ е илъэ­сым къехъугъэмэ къызыIуагъэ­кIыгъэр мазэм пособиеу ара­ты­щтыр район коэффициентымкIэ хэгъэхъуа­гъэу сомэ 1500-рэ мэхъу.

Джащ фэдэу район коэффициентымкIэ хэгъэхъуагъэу сомэ 1500-р аратынэу атефэ пред­принимательхэу унэе предпринимательскэ IофшIэныр къэзыгъэуцугъэхэм, апэрэу IофшIапIэ лъыхъухэрэм, IофшIэным пылъ шапхъэхэр зыукъуагъэхэу Iоф­шIапIэм къыIуагъэкIыгъэхэм ыкIи нэмыкI зекIуакIэхэм апкъ къикIэу агъэтIысыгъэхэм.

Мыщ епхыгъэ къэбарыр нахь игъэкIотыгъэу къижъугъотэн шъу­лъэкIыщт порталым инэкIубгъоу «IофшIапIэ зимыIэхэм пособие зэраратыщтыр ыкIи цIыфхэм Iоф­­шIэн языгъэгъотырэ гупчэм иучет узэрэхэуцощтыр» зыфи­Iорэм.

КIАРЭ Фатим.