иушъхьагъу агъэунэфыгъ
Коммунальнэ пыдзэфэ пытэхэр зыщаугъоирэ чIыпIэу Мыекъуапэ дэтым бэмышIэу машIом зыкъыщиштагъ.
Ащ ушъхьагъоу фэхъугъэр мэшIогъэкIуасэхэм агъэунэфыгъ. Пыдзэфэ пытэхэр зэрэчIатIэхэрэм технологическэ шIыкIэу иIэр зэраукъуагъэм ар къыхэкIыгъ.
УФ-м ошIэ-дэмышIэ IофхэмкIэ и Министерствэ и ГъэIорышIэпIэ шъхьаIэу Адыгеим щыIэм къызэритыгъэмкIэ, коммунальнэ пыдзэфэ пытэхэр ыкIи мыстырэ материалхэр къатэу зэрэзэтыралъхьэхэрэр зэбладзызэ фэгъэзэгъэ субъектхэм ашIын фэягъ.
Шъугу къэдгъэкIыжьын, 2020-рэ илъэсым мэлылъфэгъум и 25-м ООО-у «Транссервис» зыфиIорэм коммунальнэ пыдзэфэ пытэхэр зыщиугъоирэ чIыпIэу Мыекъуапэ дэтым машIом зыкъыщиштагъ. Ащ гектари 2-м защиушъомбгъугъ ыкIи а 1-рэ «БИС» зыфиIорэ купым машIор ахалъытагъ.
Мэлылъфэгъум и 27-м мы чIыпIэм IофшIэгъу зэIукIэгъу щызэхащагъ. Iофым изытет уасэ фашIыгъ, тапэкIэ тхьамыкIагъор дэгъэзыжьыгъэнымкIэ зэрахьащт Iофтхьабзэхэр агъэнэфагъэх.
МашIор къэмыхъуным ишапхъэхэр объектым иадминистрацие зэриукъуагъэхэр уплъэкIунхэм къагъэлъэгъуагъ ыкIи ащ епхыгъэ административнэ протоколхэр зэхагъэуцуагъэх. Iэшъынэ Сусан.