Коронавирусым къыхэкIэу IэпыIэгъу зищыкIагъэхэм афытегъэпсыхьэгъэ зичэзыу шIушIэ Iоф­тхьабзэ Адыгеим щаублагъ. Ащ изэхэщакIор Урысые политическэ партиеу «Единая Россия» зыфиIорэм ишъолъыр къутамэу республикэм щыIэр ары. КIэщакIо фэхъугъэр АР-м и ЛIы­шъхьэу, партием ишъолъыр къутамэ и Секретарэу КъумпIыл Мурат.

Iофтхьабзэм къыдыхэлъытагъэу, мыбюджет мылъкукIэ гъомылэпхъэ Iалъмэкъ мин 23,5-рэ фэдизэу ашIыгъэхэр зигъот мэкIэ унагъохэм, сэкъатныгъэ зиIэхэм, пандемием изэрар анахьэу зэкIыгъэхэм афагощыщтых.

Ушъхьагъу гъэнэфагъэхэм апкъ къикIыкIэ IэпыIэгъу зищыкIагъэхэм шIушIэ Iофтхьабзэр икъу фэдизэу алъагъэIэсын фаеу КъумпIыл Мурат пшъэрылъ афигъэуцугъ. Джащ пае, коммуникацие амал зэфэшъхьафхэр къызфагъэфедэзэ лъэIу къэзытыхэрэм, IэпыIэгъу ящыкIагъэу партием зы­къыфэзгъазэхэрэм муниципалитетхэм япащэхэм анаIэ лъэшэу атырагъэтынэу унашъо афишIыгъ.

— Непэ цIыфыбэхэр щыIэныгъэм чIыпIэ къин ригъэуцуагъэх. Мы уахътэм амалэу щыIэм елъытыгъэу ахэм IэпыIэгъу ягъэгъотыгъэн фае. Ащ пае федеральнэ, шъолъыр, спонсор ыкIи партийнэ амалхэр къызфэдгъэфедэщтых, — къыIуагъ АР-м и ЛIышъхьэ.

Партием иотделениехэм къызэратыгъэмкIэ, гъомылэпхъэ Iалъмэкъхэм яугъоин зэкIэ районхэм ащаухыгъ. «Единэ Россием» иволонтер купхэм IэпыIэгъу зищыкIагъэу агъэнэфагъэхэм Iалъмэкъхэр къафырагощэкIынхэу рагъэжьагъ. Iэшъынэ Сусан.