Адыгэ Республикэм и ЛIышъхьэу КъумпIыл Мурат муни­ципальнэ образованиехэм япащэхэм тыгъуасэ адишIыгъэ зэдэгущыIэгъур видеоселектор шIыкIэм тетэу кIуагъэ. Iофтхьабзэм хэлэжьагъэх АР-м иминистрэхэм я Кабинет хэтхэр.

Адыгеим и Премьер-министрэу Александр Наролиным къызэриIуагъэмкIэ, илъэсэу тызыхэтым ищылэ ыкIи мэзэе ма­зэхэм гухэлъэу щыIэм диштэу бюджетыр гъэцэкIагъэ хъугъэ. Ащ дакIоу непэ чIыпIэ къинэу тызэрытым къыхэкIыкIэ экономикэм илъэныкъо­хэм ащыщхэм, блэкIыгъэ илъэсым мыщ фэдэ иуахътэ егъэпшагъэмэ, якъэгъэлъэгъонхэм къащы­кIагъ. Ащ къыхэкIыкIэ чIы­пIэ бюджетхэм яхъардж­хэм зэхъокIыныгъэхэр афэ­шIыгъэнхэм атегущы­Iэгъэныр игъоу алъытагъ.

Мыщ дэжьым социальнэ пшъэрылъхэр, федеральнэ программэхэр ыкIи проектхэр зэкIэ гъэцэ­кIэ­гъэнхэ зэрэфаер анахь шъхьаIэу Адыгеим и ЛIы­шъхьэ хигъэунэфыкIыгъ. Ащ хэхьэ гъогу хъыз­мэтри.

— Коронавирусым иегъэшхо къакIо нахь мышIэми, гъогу псэуа­лъэхэм ягъэцэкIэжьын, чIыпIэхэм язэтегъэпсы­хьан епхыгъэ IофшIэнхэр игъом ыкIи шэпхъэ­шIухэм адиштэу дгъэцэ­кIэнхэ фае. Итхъухьа­гъэр щыIэныгъэм щыпхырыщыгъэ зымыхъу­кIэ, бюджетым ихахъохэм ягъэпсынкIэ гумэкIыгъо­хэм тяолIэн тлъэкIыщт. Анахьэу ар зыфэгъэхьыгъэр лъэпкъ проектхэм ягъэцэкIэн ары, — ­къы­Iуагъ КъумпIыл Мурат.

Лъэпкъ проектхэм къадыхэлъытагъэу гухэлъэу щыIэхэр ыкIи финансхэр гъэнэфэгъэнхэм мэхьанэшхо зэриIэр республикэм ипащэ хигъэунэфыкIыгъ. Илъэсищым телъытэгъэ бюджетым къызэригъэ­нафэу, шъолъырхэм зэзэгъыныгъэхэр ашIынхэ ыкIи уахътэр къэмысыгъэу лимитхэр агъэфедэнхэ амал яI.

Гъогу хъызмэтым хэ­хъоныгъэ ышIыным ыкIи шэпхъэшIухэм адиштэрэ къэлэ щыIакIэр гъэпсы­гъэным афытегъэпсыхьэгъэ лъэпкъ проектхэм къа­ды­хэлъытэгъэ IофшIэнхэр шышъхьэIум и 1-м ехъу­лIэу ухыгъэнхэ фае.

Шъугу къэдгъэкIыжьын, мы илъэсым республикэм общественнэ чIыпIэ 14 ыкIи щагу 35-рэ щызэтырагъэпсыхьанхэу агъэ­на­фэ. КъэкIощт илъэсым Мыекъуапэ иобщественнэ чIыпIи 2-мэ ыкIи щагу 26-мэ гъэцэкIэжьынхэр ащыкIощтых. Джащ фэдэу Адыгеим имуници­палитет пэпчъ зы общественнэ чIыпIэрэ зы щагурэ нахь мымакIэу ащызэтырагъэпсыхьанхэ гу­хэлъ щыI. Мыекъуапэ, Красногвардейскэ рай­оным ыкIи Яблоновскэ къэлэ псэупIэм чIыпIэхэм язэтегъэпсыхьан ащырагъэжьагъ.

Шъолъыр проектэу «Дорожная сеть» зыфиIорэм къыдыхэлъытагъэу мы илъэсым гъогу псэолъэ 41-мэ гъэцэкIэжьынхэр ыкIи гъэкIэжьынхэр ащыкIощтых, ащ якIыхьагъэ километрэ 47-рэ мэхъу. 2021-рэ илъэсым километрэ 65,1-рэ зэрылъ объект 47-мэ мыщ фэдэ IофшIэнхэр ащызэхащэщтых.

ЧIыпIэхэмкIэ Iофхэм язытет зыфэдэм ианализ муниципалитетхэм къа­гъэхьазырынэу Адыгеим и ЛIышъхьэ пшъэрылъ къафишIыгъ. АР-м иминистрэхэм я Кабинет охътэ благъэм зэхэсыгъоу иIэщтым а Iофыгъом щытегущыIэщтых.

ТХЬАРКЪОХЪО Адам. Сурэтыр А. Гусевым тырихыгъ.