Урысые акциеу «Библионочь 2020» зыфиIорэр апэрэу онлайн шIыкIэм тетэу мы илъэсым кIуагъэ. Коронавирусым зызэриушъом­бгъурэм ыпкъ къикIыкIэ мыщ фэдэ екIолIакIэр зэхэщакIохэм къы­хахыгъ.

«Культура.РФ» зыфиIорэ порталым иофициальнэ нэ­кIубгъохэм шIоигъоныгъэ зиIэхэр ихьанхэшъ, Iофтхьабзэхэм яплъын­хэ амал яIагъ. Акцием къыдыхэлъытагъэу тхэкIо, режиссер, мультипликатор цIэ­рыIохэм зэIукIэгъухэр адыря­Iагъэх, спектаклэхэр онлайн шIыкIэм тетэу къагъэлъэгъуа­гъэх. Хэгъэгу зэошхом ТекIоныгъэр къызэрэщыдэтхыгъэр илъэс 75-рэ зэрэхъурэр ары темэ шъхьаIэу Iофтхьабзэхэм ащыпхырыщыгъэр.

Акциер гъэшIэгъонэу зэхищэным, къеплъыхэрэм япчъагъэ нахьыбэ хъуным тхылъеджапIэ пэпчъ пылъыгъ. Онлайн-марафонэу «#75словПобеды» зыфиIорэм къэралыгъом исхэр зэкIэ зэрипхыгъэх. Актерхэр, культурэм иIофышIэхэр, тхылъеджапIэхэм ащылажьэхэрэр, шIоигъоныгъэ зиIэ пстэури зэгъусэхэу заом къырагъэхьыкIыгъэ тхыгъэхэм, мыщ фэгъэхьыгъэ тхылъхэм къадэхьэгъэ пы­чыгъохэм, усэхэм къяджагъэх.

Адыгеим ит тхылъеджапIэхэри чанэу Iофтхьабзэм хэлэжьагъэх. Адыгэ Республикэм культурэмкIэ и Министерствэ къызэритырэмкIэ, Хэгъэгу зэошхом текIоныгъэ къызэрэщыдэтхы­гъэр илъэс 75-рэ зэрэхъурэм фэгъэ­хьыгъэ видеороликхэм нэбгырэ 31353-рэ яплъыгъ. Ар блэкIыгъэ илъэсым егъэпшагъэмэ, фэди­тIукIэ нахьыб. НэкIубгъохэм къа­рагъэхьэгъэ ролик 396-мэ нэбгырэ 50078-рэ яплъыгъэх. Культурэм илъэныкъо зэфэ­шъхьафхэм социальнэ нэкIубгъохэмкIэ яплъырэмэ япчъагъэ 18724-кIэ нахьыбэ хъугъэ. Къы­хэгъэщыгъэн фае онлайн-ма­рафоныр жъоныгъуакIэм и 9-м нэс зэрэкIощтыр.

Гъонэжьыкъо Сэтэнай.