Коронавирусым зимыушъомбгъуным, экономикэм зыпкъ итэу хэхъоныгъэхэр егъэшIыгъэн­хэм афытегъэпсыхьэгъэ Iофтхьабзэхэм япхырыщын фэгъэхьыгъагъ АР-м и Къэралыгъо Совет — Хасэм зимычэзыу зэхэсыгъоу блэкIыгъэ бэрэскэшхом иIагъэр. Ар я L-рэ хъугъэ. Къэралыгъо Советым — Хасэм и Тхьаматэ игуадзэу Шъэо Аскэр зэрищагъ.

Парламентым ипресс-къулыкъу тызэрэщигъэгъозагъэмкIэ, зимычэзыу зэхэсыгъом АР-м и ЛIышъхьэу КъумпIыл Мурат кIэщакIо фэхъугъэр. Видео­конференцие шIыкIэм тетэу ар зэхащагъ. Ащ пае ыпэрапшIэу пэIудзыгъэу зэхэсынхэу фитыныгъэ къязытырэ зэ­хъокIыныгъэхэр Къэралыгъо Советым — Хасэм и Регламент фашIыгъэх.

— Парламентариехэр пэIудзыгъэ шIы­кIэр агъэфедэзэ хэбзэIахьхэм адэлэжьэнхэр шIокI зимыIэ Iофэу зэрэщытыр зэпахырэ узэу зэрэдунай зэлъы­зыкIугъэм къиныгъоу къыздихьыгъэхэм къыдгурагъэIуагъ, — къыщеIо Къэралыгъо Советым — Хасэм и Тхьаматэ игуадзэу Шъэо Аскэр ипсалъэу къыт­лъагъэIэсыжьыгъэм. — Охътабэ темышIэу а чIыпIэм законэу ищыкIагъэхэр тштэнхэу ащ фэдэ шIыкIэм амал къеты.

Зэпахырэ узым къыздихьыгъэ къи­ныгъохэм ялъэхъан цIыфхэм IэпыIэгъу ятыгъэным пае УФ-м и Президент къы­шIыгъэ унашъохэр гъэцэкIэгъэнхэм фэшI, республикэм ипащэ кIэщакIо афэхъуи закон зэфэшъхьафхэр депутатхэм аштагъэх. ГущыIэм пае, хэбзэIахьхэм ятын фэгъэхьыгъэ хэбзэгъэуцугъэм бизнес цIыкIум ыкIи гурытым ащылажьэхэу коронавирусым зэрар къызфихьыгъэхэм IэпыIэгъоу агъотыщтыр щыгъэнэфагъ. КъызэрыкIо шIыкIэр зыгъэфедэхэрэм хэбзэIахьэу атыщтыр зыфэдизыщтыр ащ къыщеIо.

АР-м ихэбзэгъэуцугъэхэм ащыщхэм зэхъокIыныгъэхэр афэшIыгъэнхэм фэгъэхьыгъэ законым предпринимателэу мылъкум ыкIи транспортым апае хэ­бзэIахьхэр зымытыщтхэр щыгъэнэфагъэх. Ахэр зэкIэри УФ-м хэбзэIахьхэмкIэ и Кодекс ыкIи федеральнэ хэбзэ­гъэуцугъэхэм адештэх.

Шъэо Аскэр мыхэм къатегущыIэзэ, бизнесыр непэ чIыпIэ къин зэрифагъэр, ащ фэшI предприятиехэр зэтемызынхэм, цIыфхэм IофшIэпIэ чIыпIэхэр чIамынэнхэм афытегъэпсыхьэгъэ Iофтхьабзэхэр республикэм зэрэщызэшIуахы­хэрэр къыхигъэщыгъ.

— Предпринимательхэм нахь макIэу чIэнагъэхэр ашIынхэм, цIыфхэр аIуа­мыгъэкIынхэм тыпылъын фае, — къыщеIо ипсалъэ. — Непэ зэхъокIыныгъэу тштагъэхэр бизнесым щылажьэу, коронавирусым ыпкъ къикIыкIэ къызэтеуцуагъэ­хэм IэпыIэгъу афэхъущтых, нэужым яIофшIэн лъагъэкIотэнымкIэ адеIэщтых.

Илъэси 3 — 7 зыныбжь кIэлэцIыкIу­хэм мазэ къэс ахъщэ тын афэгъэкIогъэ­ным фэгъэхьыгъэ республикэ закоными депутатхэм зэхъокIыныгъэхэр фашIы­гъэх. Унагъом гъотэу иIэр ащ исхэм атебгуа­щэу, зы нэбгырэм тефэрэр цIыфыр зэ­рэпсэун ылъэкIыщт ахъщэ анахь макIэу субъектым щагъэнэфагъэм кIэмыхьэрэмэ ары къызыратыщтыр. АдыгеимкIэ ахъщэ анахь макIэр сомэ 9474-рэ мэхъу. Илъэ­си 3 — 7 зыныбжь кIэлэцIыкIоу исыр нэ­бгырэ 7483-рэ.

Законым къызэрэщыдэлъытагъэмкIэ, ным е тым лъэIу тхылъ ытынэу ары ныIэп ищыкIагъэр. Ар къэралыгъо фэIо-фашIэхэм яинтернет нэкIубгъо, цIыфхэр социальнэу къэухъумэгъэнхэм фэгъэзэгъэ учреждением е МФЦ-м ащыптын плъэкIыщт. ЖъоныгъокIэ мазэу къихьащтым и 20-м ыуж тхылъхэр заштэщтхэр, къыкIэлъыкIощт мэкъуогъум ахъщэр къатынэу рагъэжьэщт.

АР-м и Къэралыгъо Совет — Хасэм ипресс-къулыкъу къызэрэщытаIуагъэмкIэ, коронавирусым зимыушъомбгъуным фэшI, мы уахътэм цIыфхэр зэхэмыхьанхэу ашIыгъэми, депутатхэм яхэдзакIохэр гум ранэхэрэп. Ахэри пэIудзыгъэ шIыкIэм тетэу цIыфхэм ягумэкIыгъохэм ахаплъэх, амалэу щыIэмкIэ афызэ­шIуахых. Шъхьадж округэу зэпхыгъэм иIофхэм язытет щылъэплъэ.

ХЪУТ Нэфсэт.