Шэуджэн Руслъан Хьарунэ ыкъом ыныбжь илъэс 77-м итэу идунай ­ыхъожьыгъ. Ащ ищыIэныгъэ зэрэщытэу Адыгей гупсэм фигъэIорышIагъ. Октябрьскэ гъомылэпхъэшI комби­натым ирабочэу ригъажьи, партием и Адыгэ хэку комитет псэолъэшIынымкIэ иотдел ипэщэ IэнатIэ нэсыгъ. 1991-рэ илъэсым Шэуджэн Руслъан цIыфхэм IофшIэн къафэзыгъотырэ хэку Гупчэр зэхищагъ ыкIи ащ пэ­щэныгъэ дызэрихьагъ.

Мы лъэныкъомкIэ специалистхэр джыри зэрэщымыIагъэхэм къыхэкIэу ежь ышъхьэ закъу зыщыгугъын ылъэ­кIыщтыгъэр. КъулыкъукIэу зэхащагъэм ыпашъхьэ пшъэрылъ гъэнэфагъэхэр итыгъэх — IофшIэнмы­гъотыныгъэр къызэтегъэуцогъэныр, Iоф­шIапIэ зышIокIодыгъэхэр Урысые Федерацием и Конституцие диштэу къэухъумэгъэнхэр. Охътэ кIэкIым къы­кIоцI къыдезыгъэштэрэ коллектив дэгъу ащ зэхищэн ылъэкIыгъ. Ежьми зигъасэщтыгъ, иIофшIэгъухэри зыдигъасэщтыгъэх. Iофэу къафэгъэзагъэмкIэ пшъэдэкIыжь зэрахьырэр икъоу къызыгурыIохэрэм ащ уасэ афишIыщтыгъ, иопыткIэ ренэу адэгуащэщтыгъ, иIофшIэгъухэм яIэпэIэсэны­гъэрэ яшIэныгъэрэ зыкъягъэIэтыгъэнымкIэ амалэу щыIэхэр зэкIэ ыгъэфедэщтыгъэх.

Республикэм исоциальнэ-экономикэ Iофыгъо къызэрымыкIохэм язэшIохын иIахьышхо зэрэхишIыхьагъэм фэшI Адыгеим исхэм ащ лъытэныгъэ къыфашIыщтыгъ. Ахэм зэу ащыщ икъоджэ гупсэу Тэхъутэмыкъуае цIыфхэм IофшIэн къафэзыгъотырэ Гупчэу да­шIыхьагъэр. Шэуджэн Руслъан IофшIэн къафэзыгъотырэ къулыкъум иуцу­ни, изегъэушъомбгъуни иIахьышхо ахишIыхьагъ. Къулыкъур зыгъэпсы­гъэхэм зэращыщыгъэм имызакъоу, ащ иапэрэ пащэуи щытыгъ.

Шэуджэн Руслъан цIыф нэфынэу, ныбджэгъу цыхьэшIэгъоу щытыгъ. Хэти IэпыIэгъукIэ ащ зыфигъэзэн ылъэкIыщтыгъ. Ар ты, шъхьэгъусэ дэгъоу щытыгъ. Шэуджэн лIакъом чIэнэгъэшхо ышIыгъ. Игупсэхэм, иIахьылхэм, иIофшIэгъухэм, иныбджэгъухэм сыдигъуи шIукIэ Руслъан Хьарунэ ыкъор агу илъыщт.