Коронавирусым пэуцужьыгъэнымкIэ Iофышхо зыгъэцакIэ­хэрэм волонтерхэр ащыщых. Ахэр чIыпIэ къин ифэгъэ цIыфхэм IэпыIэгъу афэхъух, нахьыжъхэм ящыкIэгъэ гъомы­лап­хъэхэр аIэкIагъахьэх, яфэIо-фашIэхэр афагъэ­цакIэх.

Урысые Народнэ фронтым ишъолъыр къутамэу Адыгеим щыIэм иволонтерхэри шIушIэ Iофтхьабзэхэм чанэу ахэлажьэх, цIыфхэм яшIуагъэ арагъэкIы.

Надежда Цой Мыекъуапэ дэт кIэлэцIыкIу IыгъыпIэу «Золотой ключик» зыфиIорэм Iоф щешIэ. ИцIыкIугъом къыщегъэжьагъэу цIыфхэм амалэу иIэмкIэ IэпыIэгъу афэхъузэ къэтэджыгъ. Ышыпхъурэ ежьыррэ зэгъусэхэу гъунэгъу нэжъ-Iужъхэм яшIуагъэ арагъэ­кIыщтыгъэ, гъомылапхъэхэр къафащэфыщтыгъэх.

— СицIыкIугъом къыщегъэжьагъэу шIушIэным сесагъ. Ащ къыхэкIэу джырэ уахъти мыщ сыкъэкIоным бэрэ сегупшысагъэп, чIыпIэ къин ифагъэхэм сиIэпы­Iэгъу зэрапэзгъохыщтым сыпылъ, — къытфеIуатэ Надеждэ. — Вирусым ыпкъ къикIыкIэ гумэкIыгъо хэфэгъэ цIыфхэм гущыIэгъу къафэхъун амыгъотэу, ащ щыкIэу ахэтыр макIэп. ЧIыпIэ къин ифагъэхэри, гъомылапхъэхэр зыфи­мыкъухэрэри къахэкIых. Ащ фэдэу рес­публикэм исхэр «линие плъырым» теох, зыгъэгумэкIыхэу, хэкIыпIэ зыфамыгъотырэ упчIэхэр специалистхэм афагъазэх. ГумэкIыгъохэр къызфаIуатэхэрэ волонтерхэм сэри сащыщ.

ЦIыф пэпчъ ежь екIолIэкIэ гъэнэфагъэ къыфэбгъотын фае. Зыр гущыIэгъу къыфэхъунхэм кIэхъопсы, нэмыкIыр ыгу еIэжьыгъэу къытео. Нэбгырэ пэпчъ уфы­зэIухыгъэу, пIэ къихьэрэмкIэ Iэпы­Iэгъу уфэхъуныр псынкIэп. Ау тигущыIэгъу пшъэрылъэу зыфигъэуцужьыгъэр зэрифэшъуашэу зэригъэцэкIэщтым пылъ.

— Сабыитф сэпIу. IэпыIэгъу зищыкIагъэхэм аIэ къихьащтымкIэ яшIуагъэ арагъэкIыным силъфыгъэхэр фэзгъэ­сэнхэм сыпылъ, — игущыIэ лъегъэкIуатэ Надеждэ. — ТапэкIи шIушIэныр зыщызгъэгъупшэщтэп.

Мыекъуапэ дэт гурыт еджапIэу N 11-м Iоф щызышIэрэ Светлана Сабельниковар гузэжъогъу чIыпIэ ифэгъэ цIыфхэм рэхьатэу аблэкIын зылъэкIыщтхэм ащыщэп, ишIуагъэ къызэригъэкIощтым пылъ. Апэрэ мафэхэм ОНФ-м иштаб чIэсэу телефоным къытеохэрэм адэгущыIэщтыгъ, IэпыIэгъу зищыкIагъэу къяолIагъэхэм яспискэхэр ытхы­щтыгъэх. Нэужым социальнэ Iалъмэкъхэр къезыщэкIыхэрэм ахэхьагъ.

— Мэфэ заулэм телефоным къытеохэрэм садэгущыIэ, мэфэ заулэм во­дителым сыригъусэу IэпыIэгъу зищы­кIагъэхэм гъомылапхъэхэр афэтэщэх, — къытфеIуатэ Светланэ. — Сабыибэ зэ­рыс унагъохэм е нэжъ-Iужъхэм уишIуа­гъэ зэрябгъэкIыгъэр, ахэм IэпыIэгъу горэ уафэхъун зэрэплъэкIыгъэр зэхэп­шIэным осэ ин иI. СицIыкIугъом къыщегъэжьагъэу ащ фэдэу сыкъэхъугъ. Амалэу сиIэмкIэ цIыфхэм сишIуагъэ ясэгъэкIы.

Вирусым ыпкъ къикIыкIэ предприя­тиехэр зэкIэ зызэфашIыхэм, Дмитрий Пенкиныр унэм исын фаеу хъугъэ. Автомобильхэр зыщашIыжьырэ псэуа­лъэу иIэр ригъэтыгъ, ау ежь гупсэфэу тIысыжьыгъэп. ОНФ-м иштаб волонтерхэм зэращыкIэрэр иныбджэгъу- хэм къаIоу зэхихыгъ ыкIи ащ кIоныр ежь-ежьырэу ыгукIэ къыхихыгъ.

— Волонтер движениехэм шIогъэ ин къахьэу сэлъытэ. IэпыIэгъу щыкIэу рес­публикэм исыр макIэп. Ахэм амалэу иIэмкIэ цIыф пэпчъ ишIуагъэ аригъэкIын фаеу сэлъытэ, — къытфеIуатэ Дмитрий Пенкиным. — Мы Iофтхьабзэм ишIуагъэкIэ унагъоу къэскIухьагъэр бэ. Ахэм зэкIэми ящыIакIэ зэфэшъхьаф, ау зэфэдэу IэпыIэгъум щэгушIукIых ыкIи агукIэ нахь зыкъашIэжьы. ГукIэгъуныгъэр макIэ зыщыхъугъэ, вирусым зызщиушъомбгъурэ уахътэм цIыфхэм уишIуагъэ ябгъэкIыным мэхьанэшхо иIэу сэлъытэ.

Дмитрий нэжъ-Iужъхэм, нэмыкIхэм гъомылапхъэ къафещэ, аптекэм афакIо. Амалэу иIэм елъытыгъэу ыпкIэ къаIимыхыжьэуи къыхэкIы. ТапэкIи волонтер лъэныкъор ымыгъэтIылъыжьэу, цIыфхэм ишIуагъэ аригъэкIыныр игу-хэлъ шъхьаIэхэм ащыщ.

Гъонэжьыкъо Сэтэнай.