УФ-м и Конституцие зэхъокIыныгъэхэр фэшIыгъэнхэ зэрэфаер УФ-м и Президентэу Владимир Путиным щылэ мазэм и 15-м Федеральнэ ЗэIукIэм къыщишIыгъэ Джэпсалъэм къыщиIуагъ. Нэужым мыщ зэрифэшъуашэу тегущыIагъэх, зэхъокIыныгъэу фэшIыгъэнхэ фаеу алъытагъэхэр агъэнэфагъэх, депутатхэми ащ дырагъэштагъ.

Урысые волонтер движением фэгъэхьыгъэ предложение къы­хьыгъ Урысые общественнэ движениеу «Волонтеры Победы» зыфиIорэм ипащэу, УФ-м и Общественнэ палатэ хэтэу Ольга Амельченковам. Ащ къы­зэрэхигъэщыгъэмкIэ, ыпэкIэ волонтер движение щыIагъэп, джырэ уахътэ ащ нахь зиушъом­бгъугъ ыкIи мафэ къэс хэхъоныгъэхэр ешIых.

Волонтер движением къэралыгъо IэпыIэгъу егъэгъотыгъэным фэгъэхьыгъэ фитыныгъэ тедзэхэр УФ-м и Правительствэ етыгъэнхэр Закон шъхьаIэм изэхъокIыныгъэхэм къадыхэ­лъытагъ.

— Адыгеим иволонтер движение зэрэхэтхэм дакIоу, ащ иIофшIэн шъхьаIэхэм пэщэныгъэ адызэрахьэу АР-м Къэралыгъо Совет — Хасэм и НыбжьыкIэ парламент хэтыр бэ. Обществэм ишIуагъэ езыгъэкIы зышIоигъохэм ахэр ащыщых. Республикэм волонтерэу исым ипчъагъэ мафэ къэс нахьыбэ мэхъу. Ахэр ныбжьыкIэ закъохэп, зы­ныбжь хэкIотагъэхэри мы купым ягуапэу къыхэхьэх. Социальнэ Iофыгъохэм язэшIохын, культурэм, спортым афэгъэ­хьыгъэ Iофтхьабзэхэм язэхэщэн, нэмыкI Iофыгъо­хэмкIи ыпкIэ хэмылъэу волонтерхэр IэпыIэгъу афэхъух. Непэ вирусым зызыщиушъом­бгъурэ уахътэм IэпыIэгъу зи­щыкIа­гъэхэм апэу афакIо­хэрэм ахэр ащыщых. Волонтер движением хэтхэм бэрэ къаIоу зэхэсэхы: «цIыфэу зыплъытэжьы­нэу уфаемэ — нэмыкIым IэпыIэгъу фэхъу». А гущыIэхэм гупшысэ куу ахэлъ ыкIи лъапIэх. Волонтерхэм мылъку горэ къаратыным щыгугъы­хэрэп, пстэуми апэу ежьхэмкIэ ар гуIэ­тыпI. Волонтер дви­жением цIыфхэр зэрепхых, обществэр нахь лъэшы ешIы, — къыIуагъ АР-м Къэралыгъо Совет — Хасэм идепутатэу Цэй Эдуард.

Социальнэ лъэныкъомкIэ ныбжьыкIэхэри, республикэм щыпсэухэрэри чанынхэм фэшI Адыгеим ипащэ IофшIэнышхо зэрэзэшIуихырэр джащ фэдэу ащ игущыIэ къыщыхигъэщыгъ. «Волонтеры Адыгеи» зыфиIорэ Ресурснэ гупчэм Мыекъуапэ Iоф щешIэ. Мы лъэныкъомкIэ гупшысэу, гухэлъэу щыIэхэр, проектхэр щыIэныгъэм щыпхырыщыгъэнхэм ар фэIорышIэ.

Гъонэжьыкъо Сэтэнай.