Адыгеим имэзпромышленникхэм я Союз хэтхэм ягукъэкIкIэ Мыекъопэ районым ит еджапIэхэм ыпкIэ хэмылъэу ащышхэн фитыныгъэ зиIэ кIэлэеджакIохэм аратырэ гъомылапхъэхэм нахь ахагъэхъуагъ.

Шъугу къэтэгъэкIыжьы, коронавирусым зызэриушъомбгъурэм ыпкъ къикIыкIэ Адыгеим ит гурыт еджапIэхэр Iудзыгъэ шIыкIэм зэрэтырагъэхьагъэхэр.

Мыекъопэ районым ит гъэсэныгъэм игупчэхэм зэкIэми Союзым зэзэгъыныгъэ дашIыгъ. Ащ ишIуагъэкIэ гъомылапхъэ зэрылъ Iалъмэкъхэр зэратыхэрэ сабыибэ зэрыс унагъохэм япчъагъэ район администрацием нахьыбэ ышIын ылъэкIыгъ.

Мы уахътэм районым щыпсэурэ кIэлэеджэкIо нэбгырэ 1000-мэ IэпыIэгъур аIэкIагъэхьагъ. Союзым хэтхэм ягукъэкI предпринимательхэм ащыщхэми адырагъэштагъ ыкIи къоджэ- псэупIэхэм адэт гурыт еджапIэхэм ахъщэ IэпыIэгъу афа­гъэхьыгъ. Къыхэтэгъэщы, Адыгеим имэзпромышленникхэм я Союз мыкоммерческэ организациеу щыт. Республикэм ит мэзпромы­шленнэ комплексым хэт предприятиехэр зэкIэ зэрепхых. Ахэм янахьыбэм Мыекъопэ районым Iоф щашIэ.

Гъонэжьыкъо Сэтэнай.