Къоджэ псэупIэхэм хэхъоныгъэхэр ягъэшIыгъэнхэм фэгъэхьыгъэ къэралыгъо программэм къыщыдэлъытагъэу Мыекъопэ районым мыгъэ щызэшIуахыщтхэм апае блэкIыгъэ илъэсым тхылъэу агъэхьазырыгъэхэр федеральнэ Гупчэм щыпхырыкIыгъэх.

АР-м мэкъу-мэщымкIэ и Министерствэ ащкIэ IэпыIэгъу афэхъугъ. Джы мары мы илъэсым проект 24-рэ муниципальнэ образованием щыпхыращыщт. Ахэм федеральнэ, республикэ ыкIи район бюджетхэм къахэхыгъэу сомэ миллион 310-рэ апэIухьащт. 2020-рэ илъэсым иапэрэ мэзищ сомэ миллион 50-м ехъур агъэфедагъ, псэолъи 8 ашIыгъ. Мы ахъщэмкIэ поселкэу Тульскэм ипсыкIуапIэхэр агъэцэкIэжьыгъэх, зарагъэушъомбгъугъ, псэупIэ гупчэм, псыхъоу Шъхьэгуащэ шъхьапырыдзыгъэ районым, поселкэхэу Каменномостскэм, Победэм гъэстыныпхъэ шхъуантIэм икIуапIэхэр ащызэбгыращыгъэх. Джащ фэдэу кIэлэцIыкIу IыгъыпIитIу, культурэм иунитIу агъэцэкIэжьыгъ. ГухэкIми, коронавирусым иягъэ къэкIуагъ, ащ зызэриушъомбгъурэм къыхэкIыкIэ IофшIэнхэр къызэтырагъэуцуагъэх.

Къэралыгъо программэм къызэрэщыдэлъытагъэмкIэ, бюджетхэм къахэмыхыгъэу проектхэм апэIухьэрэр цIыфхэм къаугъои е бизнесым пылъхэм къыхалъхьэ. Зэрэдунаеу зэлъызыкIугъэ зэпахырэ узэу Covid-19-м къиныгъуабэ экономикэм къыфихьыгъэ нахь мы­шIэми, Мыекъопэ районым инвестиционнэ проект заулэ щыпхырызыщырэ ООО-у «Рубин» зыфиIорэм ахъщэ къы­тыгъ.

Район администрацием ипресс-къулыкъу къызэрэщаIуагъэмкIэ, охътэ благъэм подрядчикхэм яIофшIэн падзэ­жьыщт, вирусым зимыушъомбгъуным ищыкIэгъэ санитар шапхъэхэр агъэцакIэзэ лъагъэкIотэщт.