Мыщ къыщытыгъэхэм яхьылIэгъэ унашъохэр организацием ыштагъэхэмэ дэгъугъэ. Шапхъэу щыIэхэр зэраукъуагъэм икъэбар IофшIэн къязытырэм къызыIэкIахьэкIэ, хэукъоныгъэ зышIыгъэ IофышIэхэм пшъэдэкIыжь ягъэхьыгъэным иIофыгъо ар хэплъэн фае.

1. Предприятием Iофхэр зэрэщызэхэщэгъэн фаер:

1.1. IофышIэхэм азыныкъо нахьыбэмэ Iудзыгъэ шIыкIэм тетэу, шэпхъэ гъэнэфагъэм диштэу Iоф ашIэн фае. Зы­ныбжь илъэс 65-м шъхьадэкIыгъэхэр, хэужъыныхьэгъэ уз зиIэхэр, зииммунитет къеIы­хыгъэхэр, бзылъфыгъэ лъэрымыхьэхэр уахътэ горэкIэ Iоф амышIэу щагъэсынхэ е Iудзыгъэ шIыкIэм тетэу агъэлэжьэнхэ фае.

1.2. Дезинфекцие режимыр къыдалъы­тэзэ, зыми IумыкIэхэу курьер къулы­къум иIофшIэн зэхащэнэу, корреспонденциехэр къазащаIахыщтхэ ыкIи защаратыщтхэ чIыпIэ гъэнэфагъэхэр къыхагъэкIынхэу.

1.3. Къэбархэм яIэкIэгъэхьанкIэ на­хьыбэрэмкIэ электрон амалхэр, телефонхэр, видеоконференциехэр агъэфедэнхэу.

1.4. Предприятием (организацием) цIыфхэр жъугъэу зыхэлэжьэрэ Iофтхьабзэхэр щызыхамыщэнхэу, IофышIэхэр нэмыкI коллективхэм яIофтхьабзэхэм ахамыгъэлэжьэнхэу.

1.5. IофышIэхэр командировкэ амыгъэкIонхэу.

1.6. Зэрэгъэнэфэгъэ шIыкIэм тетэу медицинэ уплъэкIунхэр акIунхэу.

Медицинэ уплъэкIунхэр зэхэзыщэщт медицинэ организациер къыхахы зыхъу­кIэ, коронавирусым ыпкъ къикIыкIэ шэпхъэ гъэнэфагъэхэр къызщызфагъэфедэрэ лъэхъаным цIыфхэр бэу зэIумы­кIэнхэмкIэ игъо афалъэгъухэрэр медицинэ организациехэм агъэцэкIэн алъэ­кIыщтмэ зэрагъэшIэн фае (2020-рэ илъэсым гъэтхапэм и 10-м Роспотребнадзорым ышIыгъэ унашъоу № 02/3853-2020-27-р зытетыр). Анахьэу къыхахын фаехэр мобильнэ медицинэ комплекс зиIэ медицинэ организациехэу пред­приятиер зыдэщыIэ чIыпIэм кIохэрэр ары.

Медицинэ организациехэм апэрэ чэзыоу медицинэ уплъэкIунхэм къахарагъэубытэн фаехэр зэпахырэ узыр къяутэлIэнымкIэ нахь щынэгъуапIэ итхэр ары, гъомылэпхъэшI промышленностым, общественнэ гъэшхэным, цIыфхэм яфэIо-фашIэхэм, псырыкIуапIэхэм япхыгъэ фэIо-фашIэхэм ягъэцэкIэн афэгъэзэгъэ организациехэм, гъэсэныгъэ языгъэгъо­тырэ организациехэм яIофышIэхэри ахэм къахеубытэх.

2. Предприятием иIофхэр зыщызэшIуихырэ лъэхъаным лэжьакIохэм макъэ аригъэIун фае:

2.1. Зэпахырэ узэу коронавирусыр зыщыщымкIэ, ар къызэрэхагъэщырэ шIыкIэмкIэ.

2.2. IофышIэм ыкIи (е) ащ иунагъо исхэм коронавирусыр къяутэлIагъэу загъэунэфыкIэ, ахэр унэм зэрэщызекIонхэ фаемкIэ:

• врачыр яунэ къыраджэнэу;

• медицинэ организацием ежьхэр мыкIонхэу;

• пэтхъу-Iутхъу къызяуталIэкIэ IофшIапIэм мыкIонхэу.

2.3. IофшIапIэм щыIэу коронавирусыр къеутэлIагъэу загъэунэфкIэ, зэрэзекIон фаемкIэ лэжакIом макъэ егъэIугъэныр:

• иунэ зэращэжьыщт транспортым икъэгъотын фэгъэзэгъэ IофышIэм зызэрэфигъэзэн фаемкIэ;

• зэращэжьыщт шIыкIэм ехьылIэгъэ унашъор аштэфэ шIоигъор ышIэу организацием дэмытынымкIэ.

2.4. Коронавирусыр къямыутэлIэнымкIэ амалэу щыIэхэм, къэбзэныгъэмкIэ амалхэр къыдэлъытэгъэнхэ, псыунэм къикIыжьхэ къэс, шхэнхэм ыпэкIэ сабынкIэ аIэ атхьакIын, IофшIэгъу мафэм къыкIоцI антисептикхэр агъэфедэн зэрэфаем яхьылIэгъэ къэбархэр аIэкIэгъэ­хьагъэнхэр.

2.5. Хэгъэгухэу, Урысые Федерацием ишъолъырхэу коронавирусым зызыщиушъомбгъугъэхэм яотпуск щагъэкIонэу рамыхъухьанэу.

2.6. Зызэраухъумэрэ щыгъынхэр, маскэхэр, Iалъэхэр зэрагъэфедэнхэ фэе шIыкIэмкIэ, сыхьатищ тешIэ къэс маскэхэр зэблахъун зэрэфаемкIэ макъэ ягъэIугъэныр.

2.7. Врачыр къыраджэным ыкIи ящыкIэгъэ консультациехэр къаратынхэм пае «линие плъырым» ителефонхэм яхьылIэгъэ къэбархэр аIэкIэгъэхьагъэнхэр.

2.8. Официальнэ информационнэ къэкIуапIэхэм (псауныгъэм икъэухъу­мэнкIэ Дунэе организацием, Урысые Федерацием ишъолъырхэм якъэралыгъо хабзэ икъулыкъухэм, Роспотребнадзорым ичIыпIэ къулыкъухэм ясайтхэм) яхьылIэгъэ къэбархэр аIэкIэгъэхьагъэн­хэр.

2.9. Къэбар нэпцIхэр аIэкIэзыгъа­хьэхэрэм пшъэдэкIыжь зэрарагъэхьыщтымкIэ макъэ ягъэIугъэныр.

3. IофшIапIэм зэращэхэрэр ыкIи къызэращэжьыхэрэр

3.1. Унэе транспорт зимыIэхэр нахь макIэу цIыфхэм аIукIэнхэм пае предприятием итранспорткIэ IофшIапIэм щэгъэнхэу ыкIи къищыжьыгъэнхэу игъо алъэгъу.

3.2. Шапхъэхэм адиштэу (2020-рэ илъэсым мэзаем и 13-м Роспотребнадзорым ышIыгъэ унашъоу № 02/2120-2020-32-р зытетым) ащ фэдэ транспортыр игъорыгъозэ дезинфекцие ашIын фае.

3.3. Заводхэм (предприятиехэм) яихьапIэхэм/яикIыпIэхэм адэжь цIыфхэр бэу щызэрэмыугъоинхэм фэшI игъо алъэгъу:

• магнитнэ картэхэр зыхэт автоматическэ пкъыгъохэр пропускной пунктхэм ащагъэфедэнхэу;

• ахэм адэкIыхэ зыхъукIэ азыфагу метрэрэ ныкъорэ нахь макIэ имылъынэу;

• пропускной пунктым иджэхашъо IофышIэхэр зыдэщытынхэ фэе чIыпIэхэр щыгъэтхъыгъэнхэу;

• IофшIэгъу сменэхэр зырагъажьэ­рэмрэ заухырэмрэ пIэлъэ заулэкIэ зэ­теутыгъэнэу; ахэм къадэфэрэ уахътэр икъун фае чэзыум хэмытхэу сменэм иIофышIэхэр зэкIэ КПП-м блэкIынхэмкIэ;

• производственнэ подразделение зэфэшъхьафхэм яIофышIэхэу сменэм къыкIоцI зэIумыкIэхэрэр ихьапIэ зэфэшъхьафхэмкIэ унэхэм арыхьэхэу шIыгъэнэу.

3.4. Мафэ къэс IофшIэныр римыгъа­жьэзэ лэжьакIом ипсауныгъэ изытет уплъэкIугъэныр, итемпературэ зынэсырэр зэгъэшIэгъэныр.

3.5. IофышIэм ыкIи ащ иунагъо исхэм япсауныгъэ изытет кIэупчIэгъэныр, сымаджэхэм, нэмыкI хэгъэгу е Урысые Федерацием инэмыкI шъолъыр къарыкIыжьыгъэхэм ар аIукIагъэмэ зэгъэшIэгъэныр.

3.6. Предприятием иихьапIэ дэжь антисептикхэмкIэ (дозаторхэмкIэ) е дезинфекционнэ салфеткэхэмкIэ аIэ зыщаукъэбзыщт чIыпIэхэр щагъэнэфэнхэу.

3.7. Производственнэ процессхэм япхыгъэ IофшIэнхэр (технологическэ оборудованием игъэцэкIэжьынрэ ифэIо-фашIэхэм язэхэщэнрэ) хэмытхэу, ащ иIофшIэн емыпхыгъэхэр предприятием (организацием) дамыгъэхьанхэу.

4. Технологическэ процессыр

4.1. Цеххэм, участкэхэм, отделхэм яколлективхэу зы пшъэрылъ зымыгъэцакIэхэрэр, производственнэ процессхэмкIэ зэмыпхыгъэхэр нахь макIэрэ зэIукIэнхэу. IофышIэхэр этаж зэфэшъхьафхэм атегъэтIысхьэгъэнхэу, кабинет зэфэшъхьафхэр къафыхэгъэкIыгъэнхэу, сменэ заулэкIэ IофшIэныр зэхэщэгъэнэу.

4.2. Цеххэм, участкэхэм, отделхэм материалхэр, пкъыгъохэр, документхэр зэIэкIагъэхьанхэмкIэ пшъэдэкIыжь зыхьырэ IофышIэхэр гъэнэфэгъэнхэу, зызэраухъумэрэ пкъыгъохэр ахэм аIэкIэгъэхьэгъэнхэу.

4.3. Щэджэгъошхэ лъэхъаным ыкIи зыгъэпсэфыгъо уахътэхэм IофышIэхэр предприятием (организацием) дэмыкIынхэу, яIэнэтIэ пшъэрылъхэм ягъэцэкIэн емыпхыгъэу нэмыкI участкэхэм, отделхэм мыкIонхэу.

4.4. Промышленнэ предприятиехэм вентиляциемкIэ, сапэм зыкъимыIэтынымкIэ ясистемэхэм тэрэзэу Iоф ашIэным, технологическэ процессхэр механизацие, автоматизацие шIыгъэнхэм, промышленнэ аэрозольхэм, пахъэхэм, гъозхэм адэлажьэхэрэр нахь макIэ шIыгъэнхэм нахь лъэшэу анаIэ тырагъэ­тынэу.

4.5. Социальнэ дистанцированиемкIэ шапхъэхэр къыдэлъытэгъэнхэм тегъэ­псыхьагъэу а зы уахътэм нэбгырэ пчъагъэу зы унэм зэдитын ылъэкIыщтыр зыфэдизыр:

• квадрат метрэ 50-м нэс зиинагъэм – нэбгыри 5-м емыхъоу;

• квадрат метри 100-м нэс зиина­гъэм – нэбгыри 10-м емыхъоу;

• квадрат метрэ 200-м нэс зиина­гъэм – нэбгырэ 25-м емыхъоу;

• квадрат метрэ 200-м ехъу зиинагъэм – нэбгырэ 50-м емыхъоу.

4.6. ЦIыфхэр зыщызэтырихьанхэ ылъэ­кIыщт чIыпIэхэм (производственнэ псэуалъэхэм, шхапIэхэм ыкIи нэмыкIхэм) IофышIэхэм азыфагу метрэрэ ныкъорэ нахь макIэ ащыдэлъынэу щытэп.

4.7. IофышIэхэм пэтхъу-Iутхъу узхэр къяутэлIагъэхэмэ ауплъэкIун, IофшIэгъу мафэм къыкIоцI сыхьатиплI тешIэ къэс ахэм ятемпературэ зынэсырэр зэрагъэ­шIэн фае.

4.8. Мафэ къэс (сменэ къэс) производствэм епхыгъэ псэуалъэхэр, зыщы­шхэхэрэ, зызыщагъэпсэфырэ чIыпIэхэр, псыунэхэр дезинфекцие шIыгъэнхэр. Сыхьати 2 — 4 тешIэ къэс пчъэкъопсхэр, выключательхэр, дэкIояпIэхэм яубытыпIэхэр, столхэр, пхъэнтIэкIухэр, оргтехни­кэр дезинфекцие шIыгъэнхэр.

4.9. IофышIэхэр ренэу зэрыс унэхэм бактерициднэ облучательхэр ащыгъэфедэгъэнхэр. СыхьатитIу тешIэ къэс кабинетхэм, нэмыкI IофшIэпIэ чIыпIэхэм жьы къабзэ арыгъэхьэгъэныр.

4.10. Сыхьатищ тешIэ къэс IофышIэхэм маскэхэр IофшIэпIэ чIыпIэхэм ащызэблахъунэу амал яIэнэу, джащ фэдэу антисептикхэм, дезинфицирующэ салфеткэхэм, Iалъэхэм язапас щыIэнэу. Зигугъу къэтшIыгъэ пкъыгъохэр зэрагъэ­федэхэрэм гъунэ лъафынэу.

4.11. IофышIэхэр агъашхэхэ зыхъукIэ, графикым щыгъэнэфэгъэ уахътэм тефэу цеххэм, участкэхэм, отделхэм яколлективхэр шхапIэм кIонхэу.

ШхапIэ ямыIэмэ, IофшIэпIэ чIыпIэхэм ащышхэхэ хъущтэп, ащ пае унэ шъхьаф е зытхьакIыпIэрэ дозаторрэ зэрыт унэ къыхагъэкIын фае.

Коронавирусым зимыушъомбгъунымкIэ пэшIорыгъэшъ, дезинфекционнэ Iоф­тхьабзэхэр общественнэ гъэшхэным фэгъэзэгъэ организациехэм зэращызэрахьанхэ фэе рекомендациехэм адиштэу шхапIэхэм Iоф ашIэн фае.

Общественнэ чIыпIэхэм зытхьакIыпIэхэмрэ дозаторхэмрэ арытын фае.