Красногвардейскэ районым ит къутырэу Большесидоровскэм имэ­къумэщышIэ кооперативэу «Родина» зыфиIорэм илэжьакIохэм гъэтхэ лэжьыгъэм ихэлъхьан агъэцэкIагъ.

Механизаторхэм яIофшIэн хышIыкIэу фыряIэмрэ илъэс пчъагъэхэм опытышхоу зэра­гъэгъотыгъэмрэ къашъхьэпагъэх, охътэ кIэкIым тыгъэгъазэу — гектар 430-рэ, силос ашIыщт натрыфэу — гектар 294-рэ ыкIи илъэсыбэрэ къэ­кIыжьырэ (бы­лым Iусхэр) гектар 50 халъ­хьаныр афызэшIо­кIыгъ.

Кооперативым хэтхэу, къэ­кIощт лэжьыгъэм лъапсэ фэзы­шIыгъэхэм ацIэ къесIон: С. Ва­сильевыр, Н. Асеевыр, С. Паш­ковыр, В. Косиновыр, Н.Астаниныр, А. Тамбиир, Д. Сергеевыр, Ю. Блэгъожъыр.

Мыхэм мафэ къэс шIуагъэ къытэу, пчэдыжьым щегъэжьагъэу, пчыхьэр хэкIотэфэ нэс Iоф ашIэщтыгъ, мыщ дэжьым ом изытети IэпыIэгъу къафэ­хъугъ.

Жьэу агъэтэрэзыгъэ чIына­лъэхэм апэрэ лэжьыгъацэхэр къахэпсых. Хъызмэтым иагроном шъхьаIэу А. Дауным къызэриIорэмкIэ, механизаторхэм Iофышхо агъэцэкIагъ, чIыгур ажъуагъ, аулъэ­шъоугъ, аубэ­жьыгъ, ищыкIагъэр рагъэгъо­тыгъ. Ащ фэдэ агротехническэ IофшIэн пэпчъ мэ­хьанэшхо иI.

Агроном шхьаIэм зэрэхигъэу­нэфыкIырэмкIэ, мы уахътэм цIыфхэр чIыпIэ къин ифагъэхэми, адыгэ къуаджэхэм ащырэхьат, ащ къыхэкIэу шапхъэхэр зэрагъэцэкIэщтхэм пылъыгъэх. Iэшъхьэтетмэ зэрафэлъэкIэу лэ­жьакIомэ япсауныгъэ къы­зэраухъумэщтым пылъых.

Опытышхо зиIэ агрономым бжыхьэсэ лэжьыгъэм изытет елъэгъу, ащ гектар 670-рэ еубыты. Лэжьыгъэхэм кIымафэр дэгъоу рахыгъ, гъатхэм гъогогъуитIурэ минеральнэ чIыгъэшIухэр арагъэкIугъэх. Мэлылъфэгъум ахэр «химпрополкэ» ашIыгъэх ыкIи уз зэфэшъхьаф­хэм, зэрар къэзыхьырэ хьэцIэпIацIэхэм апэшIуекIорэ уцхэр ахалъхьагъэх. Ау щытми, агрономыр мэгумэкIы.

— Сыдэу зытшIыгъэми, тэрэп зэкIэ зэлъытыгъэр. Гъэтхэ огъум бжыхьасэхэм зэрар ари­хын ылъэкIыщт. Лэжьыгъэм ощх дэгъу ищыкIагъ, блэкIыгъэ блыпэм къещхыгъэ тIэкIум тэ тыз­фэе шIуагъэ къыздихьыгъэп. Джырэ уахътэ бжыхьасэхэм яхэхъогъу, ощх ящыкIагъ. Ау, сыдэу хъуми, шIум тыщыгугъыщт, сыда пIомэ, чIыгулэжь пэпчъ макIэп къарыоу, ахъщэу мыщ хилъхьагъэр, — къыIуагъ агрономым.

Унэм зи умышIэу уисыныр нахьышIоу зыIохэрэр щыIэхэми, лэжьэкIогур мэгумэкIы. А. Лукашенкэм зэриIуагъэу, «Тшхыщтыр сыда?».

Пщыкъэнэ Май.