Зэпахырэ узэу коронавирусым цIыфхэр щыухъумэгъэнхэм пае Адыгеим, Краснодар краим ыкIи Къэрэщэе-Щэрджэс Республикэм ячIыгу шъолъырхэу Кавказ биосфернэ заповедникым хахьэхэрэр зэфашIыгъэх. Джащ фэдэу зыгъэпсэфыпIэ чIыпIэу тиIэхэми цIыфхэр ахэхьанхэ фитхэп.

Зэпахырэ узэу зыкъэзыIэтыгъэр къызыуцущтыр хэти ышIэрэп. Арышъ, ащ ищынагъо щэIэфэкIэ за­поведникым узэрэхэхьащт билетхэр цIыфхэм къащэфынхэ зэрамылъэкIыщтыр Адыгэ Республикэм зекIонымрэ зыгъэпсэфыпIэ­хэм­рэкIэ и Комитет къыIуагъ.

Унашъохэр зымыгъэцакIэхэу зыгъэпсэфакIо къакIохэрэр заповедникым иIофышIэхэм къу­шъхьэхэм къахащыжьых. Ахэм ешъуа­гъэхэр, зы­дэщыIэхэ чIыпIэр хабзэм къызэриухъу­мэрэр зымышIэхэрэр ахэтых. За­поведникым машIо щашIэу, пыдзафэхэр бэу къы­ханэхэу къыхэкIы.

Заповедникыр зэфашIыгъэми, иIофышIэхэр ренэу къыдэкIых. Гъэмафэу къэ­благъэрэм, зыгъэпсэфыгъо уахътэм зекIо лъагъо­хэр, къэуцупIэхэр тыра­гъэпсыхьэх.

ЦIыфхэр заповедникым хэмыхьэхэмэ, тыдэкIи щы­кIым-сым. Макъэхэр зэхэзымыхырэ псэушъхьэхэр лъагъохэм къатехьэхэу мэхъух, заповедникым иIо­фышIэхэм алъэгъухэу е апэ къифэхэу къыхэкIы.

— ЦIыфхэм чIыопс къа­бзэм уахътэр щагъэкIонэу зэрэфаехэр къыдгурэIо, — еIо Кавказ заповедникым идиректорэу Сергей Шевелевым. — Ау зэпа­хырэ узым зыщаухъумэнэу заповедникым къы­зэлъиубытырэ чIыпIэхэм ахэхьанхэ зэрэфимытхэр, ар къэралыгъом къызэриухъумэрэр зымышIэ­хэ­рэр макIэп. Заповедникыр къызэIутхыжьынэу фитыныгъэ къызытатыкIэ, зыгъэпсэфакIохэм макъэ ядгъэIущт.