Переднеазиатскэ леопардхэр Кавказ биосфернэ заповедникым щыпсэухэу зэрэрагъэсэжьыщтхэм фэгъэхьыгъэ федеральнэ программэр гъэцэкIагъэ зэрэхъурэм бэмышIэу тегущыIагъэх.«Шъэчэ лъэпкъ паркым» идиректорэу Павел Хоценкэр, программэм къыдилъытэрэ Iофыгъохэм язэшIо­хынкIэ пшъэдэкIыжь зыхьырэ Умар Семеновыр, специалист зэфэшъхьафхэр ыкIи Урысые Федерацием чIыопсым ибайныгъэ­хэмрэ экологиемрэкIэ и Министерствэ ипащэ игуадзэу Елена Пановар зэIукIэм хэлэжьагъэх.

Кавказ заповедникым гъэмафэм нэс леопард ныбжьыкIэхэр джыри къызэрэхатIупщыхьащтхэр къаIуагъ. Урысыем шIэныгъэхэмкIэ и Ака­демие иIофышIэхэр ягъусэхэу лео­пардхэр шъхьафит ашIынхэу ты­раубытагъ. Ахэр зыхатIупщыхьащтхэ чIыпIэхэм апэблэгъэ псэупIэхэм адэс цIыфхэм леопардхэр алъэгъу­хэмэ амыгъэщтэнхэу, ежьхэри зыфэсакъыжьынхэу къяджагъэх. УФ-м ишъолъырхэм япащэхэр IэпыIэгъу къафэхъунхэм зэращыгугъыхэрэри къаIуагъ.