Дунэе мэфэкIым хэлажьэхэрэм яеплъыкIэхэр зэдгъашIэхэ тшIоигъоу гущыIэгъу тафэхъугъ.

— Адыгеир Краснодар краим къыхэкIыжьи республикэ зэрэхъу­гъэм, Парламентым адыгэ быракъыр щызыштагъэхэ депутатхэм тафэраз, — къытиIуагъ зэлъашIэрэ сурэтышI-модельерэу СтIашъу Юрэ. — 1993-рэ илъэсым США-м сыщыIэу адыгэу хэгъэгум исхэм мэзэ заулэрэ садэпсэугъ. Адыгэ шъуашэхэр, тхыпхъэхэр тыдыгъэх.

Нью-Йорк пэмычыжьэ къалэм зэхахьэу щыкIорэм лъэпкъ зэфэшъхьафхэр хэлэжьагъэх. США-м икъэралыгъо быракъ нэбгырабэмэ аIыгъыгъ. Тэ, адыгэхэм, тилъэпкъ шъуашэмкIэ тыфэпэ­гъагъ, адыгэ быракъ пчъагъэ дгъэбыбатэщтыгъ. Урамым ыбгъу­хэмкIэ щытхэу къытэплъыхэрэр, шъхьангъупчъэхэр къызэIузыхыгъэхэр Iэгу къытфытеощтыгъэх.

«Фантастик» ыIуи, бзылъфыгъэхэм ащыщ къызэрэтфэгушIогъагъэр, тибыракъ кIэлъырытхэу сурэтэу атырахыгъагъэхэр, зэIу­кIэгъухэр тщыгъупшэхэрэп…

Орэдыр къеIо

— Адыгэ быракъым фэгъэ­хьыгъэ орэдыр «Ислъамыем» концертхэм къащеIо. МэфэкIым игъэ­кIотыгъэу тыхэмылэжьэщтми, телефоныр, Интернетыр дгъэфе­дэщтых. Орэдхэр цIыфхэм къа­фэт­Iощтых, адыгэ быракъым фэ­гъэхьыгъэ къэбархэр зэхядгъэ­хыщтых, — къытиIуагъ ансамблэм ихудожественнэ пащэу, Урысыем, Адыгеим янароднэ артистэу, композиторэу Нэхэе Аслъан.

— Мыекъопэ къэралыгъо технологическэ университетым орэд къаIонэу ныбжьыкIэхэр щысэ­гъасэх. Урысхэр, адыгэхэр, ермэлхэр, нэмыкIхэри купым хэтых. ТелефонкIэ орэдэ къызэфаIозэ, мэфэкIым студентхэр хэлэжьэщтых, — тизэдэгущыIэгъу лъигъэкIотагъ «Ислъамыем» иорэдыIоу, Адыгэ Республикэм инароднэ артистэу Къумыкъу Щамсудинэ.

ЗэхэщакIу

— МэфэкI зэхахьэр мэлылъфэгъум и 25-м Мыекъуапэ щыредгъэкIокIыным тыфэхьазырыгъ, — къытиIуагъ зэхэщэкIо купым хэтэу, республикэм и Къэралыгъо академическэ ансамблэу «Нал­мэсым» ихудожественнэ пащэу, Адыгеим инароднэ артистэу Хъо­джэе Аслъан. — Концертым щыщ пычыгъохэр ИнтернетымкIэ цIыф­хэм ядгъэлъэгъущтых.

Хьакъуй Анжеликэ, Бэрзэдж Дианэ, Ахътао Бэлэ, Симболэтхэу Бислъанрэ Сусанэрэ, Шагудж Батурай, Хьаджэкъо Пщымафэ, Едыдж Гощнагъо, Къулэ Мурадин, Къулэ Алый, фэшъхьаф къэшъуакIохэри къэшIыгъохэм ахэ­лажьэх. ШIуфэс гущыIэхэр къэзыIощтхэри къыхахыгъэх.

ТызэфэгушIо

Бзэхэр зыщызэрагъашIэрэ гуп­чэу «Активым» ипащэу Едыдж Мэмэт Адыгеим имызакъоу, Тыр­куем, Иорданием, Сирием, Израиль ащыпсэухэрэ тилъэпкъэгъухэм телефонкIэ зэрафытеуагъэм, нэбгырабэ ежьи къызэ­рэфэгушIуагъэм тыщигъэгъозагъ. Быракъым и Мафэ тыди ща­гъэмэфэкIыщт.

Республикэм кушъхьэфэчъэ спортымкIэ и Федерацие итхьаматэу Анатолий Лелюк Урысыем ихэшыпыкIыгъэ командэ хэтхэу Елизавета Ошурковам, СтIашъу мамыр, Александр Евтушенкэм, нэмыкIхэм шIуфэс тхылъхэр афигъэхьыгъэх.

КIэлэцIыкIу купхэр, унагъохэр

Мэшэлахь, ахэр бэ мэхъух. Ансамблэхэу «Мыекъуапэ инэфылъэхэм», «Абрекхэм», «Казачатэм», «Ошъадэм», «Радугэм», театральнэ зыгъэсапIэу «Щыгъы­жъыем», фэшъхьафхэм шIуфэс гущыIэхэр къахьыщтых.

Унагъохэм ящагухэм, шъхьангъупчъэхэм быракъыр ащаIэтыгъ. Республикэ общественнэ движениеу «Адыгэ Хасэр» кIэща­кIо фэхъугъэу 2013-рэ илъэсым къы­щегъэжьагъэу мэлылъфэгъум и 25-м адыгэ быракъым и Мафэ дунэе мэфэкI хъугъэу хэтэгъэу­нэфыкIы.

Зэхахьэхэм Беданыкъо Замирэ къащиIорэ орэдым игущыIэхэр къыхэтэуты.

Адыгэ быракъ

Орэдышъор: Андзэрэкъо Чеслав

ГущыIэхэр: ЕмтIылъ Нурбый

Адыгэ лъэпкъыр бгъэпытэу Уцышъо дахэу, быракъ. Жъогъо пшIыкIутIур о къыпхэлыдыкIэу Огу къаргъом зыщыоIэт.

Быбатэ, быбатэ, тэ тибыракъ, Адыгэхэм тибыракъ, Быбатэ, быбатэ, тэ тибыракъ, Республикэм ибыракъ!

Лъэпкъыр дунаем щябгъашIэу Хэгъэгу тамыгъэу утиI. ЧIыр къекIокIыфэ о ташъхьагъы уитэу Тыгъэм игъунджэу къэшIэт.

Шыу бланэм джэгум ухещэ, Къашъом пчэгур зэлъекIу, Тибыракъ дышъэ ижьау пшъашъэр чIэтэу Унэгъо лъапсэ тфэрэхъу.

Адыгэр о къахэбгъэщэу, Батырмэ лIыгъэр ахэлъ. Адыгэ лъэпкъыр тэ зы тыхъужьынэу, Тигугъэ лъагэу тыщыI!