Коронавирусым зимыушъомбгъуным фэбэнэгъэныр, цIыфхэм ящыIэ­ныгъэ, япсауныгъэ къэгъэнэжьыгъэныр, IофшIэпIэ чIыпIэхэр чIамы­нэн­хэм, гъотэу яIэм къыщымыкIэным Iоф дэшIэгъэныр республикэм ипащэхэм пшъэрылъ шъхьаIэу зыфагъэуцужьыхэрэм ащыщых.

Мары етIупщыгъэу медицинэм иучреждениехэм кIуачIэу, амалэу яIэхэм ахагъахъо, Iэзэгъу уцэу, оборудованиеу ящыкIагъэр аIэкIагъахьэ, цIыфэу ко­ронавирусыр къызэолIагъэхэм пыщэгъоу яIагъэхэм якъыхэ­гъэщын лъэшэу пылъых, лабораториехэм яIофшIэн агъэлъэшыгъ, бизнесым щылажьэу зэ­пахырэ узым иягъэ зэригъэ­кIыгъэхэм IэпыIэгъу ятыгъэнымкIэ шIыкIакIэхэр къаугупшысых, щыIагъэхэм япхырыщын агъэ­псынкIэ. ЦIыфхэм вирусым къиныгъуабэ къызэрэзыдихьыгъэр къагурыIоу, зэхэмыхьэхэу, яунэхэм зэрарысхэм яшIуагъэ­кIэ, узыр зэтыраIэжэн алъэкIы.

АР-м и ЛIышъхьэ япащэу фе­деральнэ ыкIи шъолъыр ведомствэхэр, къулыкъухэр, рес­публикэ ыкIи район депутатхэр зэдеIэжьхэзэ коронавирусым зи­мыушъомбгъуным зэдыфэбанэх.

АР-м и Къэралыгъо Совет — Хасэм идепутатэу, нэбгырэ 500-м ехъу зыщылажьэрэ хъыз­мэтшIэпIэшхоу ЗАО-у «Картонтара» зыфиIорэм ипащэу Сергей Погодиным социальнэ лъэныкъомкIэ Iофыгъоу щыIэ хъугъэхэм ядэгъэзыжьын иIахь мымакIэу хелъхьэ. Ар зипэщэ коллективым щыщыбэхэм пэIудзыгъэу мы уахътэм Iоф ашIэ, ау предприятием къакIохэрэри ахэтых. ЗэкIэми коронавирусым зимыушъомбгъуным ищыкIэгъэ шапхъэу Роспотребнадзорым къыгъэнэфагъэхэр хэзыгъэ имыIэу агъэцакIэх.

IофшIапIэм къакIохэрэр транспорт афэгъэзагъэу къещэх, ещэжьых. ПэIудзыгъэу лажьэ­хэрэм ащ ищыкIэгъэ пстэур аIэкIэлъыным япащэ ынаIэ тет. ЦIыфхэр зэхэмыхьанхэу зыщашIыгъэ уахътэм, гъэтхапэм и 30-м ыуж мэфэ заулэм къы­кIоцI зэкIэ хъызмэтшIапIэм Iут­хэм ялэжьапкIэ фэдиз те­гъэхъуагъэу къаратыгъ. Джыри мы мазэр икIымэ къалэжьы­гъэр ащ ипроцент 30 фэдизкIэ нахьыбэу къафатIупщыщт. Ахъщэ IэпыIэгъу тедзэ ищыкIагъэу лъэIу тхылъ зытыгъэхэм зэкIэми аде­Iагъэх. Ащ пстэумкIи сомэ мини 150-рэ пэIуагъэхьагъ. Зи­гъот макIэу Мыекъуапэ щы­псэухэрэм ащыщэу нэбгырэ 50-мэ гъомылапхъэхэмкIэ IэпыIэгъу афэхъугъэх.

Мы уахътэм IофшIэкIэ амалэу яIэм къыщыкIагъ нахь мышIэми, ТекIоныгъэм и Мафэ ипэгъокIэу Хэгъэгу зэошхом иветеранхэм адэжь еблэгъэнхэу, афэгушIонхэу гухэлъ яI.

Ащ тетэу мы уахътэм Iоф ешIэ АР-м и Парламент идепутатэу Пэнэшъу Къэплъан зипэщэ ООО-у «Мыекъопэ пивэшI заводыми».

Поселкэу Инэм исымэджэщрэ Адыгэ республикэ кIэлэцIыкIу клиническэ сымэджэщымрэ япащэхэр Къэралыгъо Советым — Хасэм и Тхьаматэу Владимир Нарожнэмрэ ащ игуа­дзэу Шъэо Аскэррэ зэпахырэ узым ущызыухъумэрэ пкъыгъо­хэр къызэращэфыгъэхэм пае лъэшэу къафэразэх.

Шэуджэн районым инароднэ депутатхэм я Совет хэтхэу Зэ­фэс Аслъанрэ Олег Сергеен­кэмрэ вирусыр зыукIырэ веществоу общественнэ чIыпIэхэм, фэтэрыбэу зэхэт унэхэм ащытыраутхэщтхэр сомэ мини 110-рэ ауасэ районым фащэфыгъ.

Тэхъутэмыкъое районым ина­роднэ депутатхэм я Совет хэт­хэр зигъот макIэхэм IэпыIэгъу афэхъугъэх. Пенсионерэу, иза­къоу псэурэ нэжъ-Iужъэу е щы­­IэкIэ къин зиIэ унагъоу пстэум­кIи 300-мэ гъомылапхъэ­хэр афащагъэх. Сомэ мин 200 ащ тырагъэкIодагъ.

— Непэ къиныгъоу тызыхэтым цIыфыгъэшхо къыщызы­хэдгъэфэн фае. Коронавирусым пэшIуекIогъэным къыхэлэжьэныр республикэ ыкIи район депутат пэпчъ ипшъэрылъ. Зэ­кIэми тызэдеIэжьмэ ары зэпа­хырэ узым тызытекIощтыр, — къыIуагъ АР-м и Къэралыгъо Совет — Хасэм и Тхьаматэу Владимир Нарожнэм.

ХЪУТ Нэфсэт.