Коронавирусыр къызэузыгъэ сымаджэхэм Iоф адэзышIэрэ медикхэм аратыщт ахъщэ тедзэм хьакъулахьыр хамыубытыкIыным фэгъэхьыгъэ федеральнэ унашъом Урысые Федерацием и Президентэу Владимир Путиныр кIэтхагъ.

Коронавирусыр зиIэу агъэунэ­фыгъэхэм, ащ фэдэу зэгуцафэхэ­рэм IэпыIэгъу афэхъу­хэрэ ме­ди­цинэ IофышIэхэм хэу­шъхьа­фыкIыгъэ IофшIэнэу агъэцакIэ­рэм фэшI ахъщэ тедзэу аратыщтым процент 13 хэбзэIахьыр хамыубытыкIыныр а тхыгъэм къыщеIо.

Джащ фэдэу, COVID-19-м зыщыухъумэгъэным фытегъэпсы­хьэгъэ амалхэр къэзыщэфыхэрэ компаниехэм хэбзэIахь фэгъэ­кIотэнхэу яIэхэм яшапхъэ фэгъэхьыгъэ хэбзэгъэуцугъэр къы­­зыщыхаутыгъэм щегъэжьагъэу кIуачIэ иIэнэу ыкIи хэбзэ зэфыщытыкIэхэу 2020-рэ илъэсым щылэ мазэм и 1-м къежьагъэ­хэми ар алъыIэсынэу къыщеIо.

Шъугу къэдгъэкIыжьын, медикхэу пандемием ебэныхэрэм ара­тыщт ахъщэ тедзэр «къа­бзэу» аIэкIэхьан зэрэфаер къэ­ралыгъом ипащэ джыри мэлы­лъфэгъум и 15-м къыIуагъэу щытыгъ.

Коронавирусыр къызэузыгъэ сымаджэхэм Iоф адэзышIэрэ врачхэу сымэджэщым чIэтхэм ахъщэ тедзэу аратынэу агъэнэфагъэр сомэ мин 80, гурыт медицинэ IофышIэхэм — сомэ мин 50, ащ ыуж къикIыхэрэм — сомэ мин 25-рэ. IэпыIэгъу псынкIэм Iоф щызышIэрэ врач­хэм ахъщэ тедзэу мазэм сомэ мин 50, гурыт ыкIи младшэ медицинэ IофышIэхэм сомэ мин 25-рэ зырыз аратыщт. Iэшъынэ Сусан.