Адыгэ Республикэм псауныгъэр къэухъумэгъэ­нымкIэ и Министерствэ къызэритыгъэмкIэ, ты­гъосэрэ мафэм ехъулIэу зэпахырэ узэу коронавирусыр къяузыгъэу ушэтынхэмкIэ къа­гъэшъыпкъэжьыгъэхэм япчъагъэ 117-рэ мэхъу.

Мы аужырэ чэщ-зымафэм сымэджэщым къычIэфагъэр нэ­бгыри 9, зы нэбгырэ чIатхыкIыжьыгъ. Реанимацием илъыр нэбгыри 8, ахэм ащыщэу тIур тхьабылым жьы езыгъэгъотырэ аппаратым пышIагъэх.

Уз щынагъор Адыгеим къыз­щежьагъэм къыщыублагъэу ар къызыхагъэщыгъэу агъэхъужьыгъэр нэбгырэ 32-рэ, яунэхэм арысхэу зэIэзэжьхэрэм япчъагъэ — нэбгырэ 34-рэ. Ахэм зэкIэми япсэупIэхэмкIэ япхыгъэ терапевтхэр алъэплъэх, уплъэкIунэу шапхъэхэм къады­хэлъытэгъэ пстэури арагъэкIу.

Министрэу Мэрэтыкъо Рустем игущыIэ къызэрэщыхи- гъэ­щы­гъэмкIэ, гурытымкIэ Урысыем щысымэджагъэхэм япчъа­гъэ егъэпшагъэмэ, Адыге­им икъэгъэлъэгъонхэр нахь макIэх.

Республикэм имуниципальнэ псэупIэхэр тштэхэмэ, анахьыбэ къызщысымэджагъэу агъэунэфыгъэхэр къалэу Мыекъуапэрэ (нэбгырэ 52-рэ) Адыгэкъа­лэрэ (нэбгырэ 31-рэ).

Псауныгъэр къэухъумэгъэнымкIэ министрэм къызэриIуагъэмкIэ, джырэ уахътэм узы­гъэ­щынэн пчъагъэхэр щыIэхэп, ау анахь дэир къэхъуным уфэ­хьазырымэ нахьышIу. Ау зы­хъу­кIэ, оборудованиеу ищыкIагъэм фэдиз щэфыгъэным, уц Iэзэгъу­хэм ягъэтIылъын, тхьабылхэм жьы ягъэкIугъэныр зи­щыкIэ­гъэщтхэм апае ар зэ­бгы­рыщы­гъэным джырэ уахътэм игъэкIотыгъэу адэлажьэх, мы мазэм и 28-м ехъулIэу пстэури проценти 100-м нэсэу хьазырыщт.

Къэбарыр хэутыным къыфэзыгъэхьазырыгъэр

МэщлIэкъо Саид.