ЦIыфыр зыщыпсэурэ чIыпIэм емылъытыгъэу медицинэ IэпыIэгъур Iэры­фэгъоу ыкIи икъоу ыгъотыным ифитыныгъэ Конституцием щыгъэ­пытэгъэн фае.

Урысыем и Президент илъэс къэс Федеральнэ ЗэIукIэм фигъэхьырэ Джэпсалъэм анахьэу ынаIэ зытыридзагъэр социальнэ лъэныкъор, демографием изытет, гъэсэныгъэм иIоф, цIыфхэм ящыIэкIэ-псэукIэ зыкъегъэIэтыгъэныр, экономикэм хэхъоныгъэ ышIыныр ыкIи нэмыкIхэр.

Анахьэу ынаIэ зытырадзагъэ­хэм медицинэр ащыщ. Хэбзэгъэуцугъэ шъхьаIэм ащ епхыгъэ зэхъокIыныгъэу фашIыщтхэр едзыгъуитIу мэхъу. Апэрэр: «Псауныгъэр къэухъумэгъэным иIофыгъохэр зэдэштэгъэнхэр. Ащ къыхеубытэх медицинэ IэпыIэгъур Iэрыфэгъоу ыкIи ­икъоу ягъэгъотыгъэныр, общественнэ псауныгъэр къызэтегъэнэгъэныр ыкIи гъэпытэгъэныр, псау­ныгъэм зэрар езыхыщт шIыкIэхэр щыгъэзыегъэнхэм фэIорышIэрэ амалхэр гъэпсыгъэнхэр, цIыфхэм япсауныгъэкIэ пшъэдэ­кIыжьэу ахьырэр зэхя­гъэшIы­кIыгъэныр». ЯтIонэрэр: «ЧIыпIэ зыгъэIорышIэжьыпIэхэм ямуниципальнэ мылъку ежь-ежьы­рэу агъэIорышIэ, агъэпсы, чIыпIэ бюджетыр аштэ ыкIи агъэцакIэ, чIыпIэ хэбзэIахьхэр ыкIи угъоинхэр хагъахьэх, чIыпIэ мэхьанэ зиIэ Iофыгъохэр зэшIуа­хых, джащ фэдэу федеральнэ законым диштэу медицинэ Iэпы­Iэ­гъур Iэрыфэгъоу арагъэгъоты».

Мы гъэтэрэзыжьынхэм афэгъэхьыгъэу Адыгэ Республикэм и Къэралыгъо Совет — Хасэм идепутатэу, Мыекъопэ къэлэ сымэджэщым иврач шъхьаIэ игуадзэу Елена Любченкэр къэгущыIагъ.

— Урысые Федерацием и Конституцие гъэтэрэзыжьынэу фашIыщтхэм афэгъэхьыгъэу не­пэ тиеплъыкIэхэр къитIотыкIынхэ амал тиI. Мэхьанэ зиIэ лъэныкъохэм медицинэр ащыщ. А гъэтэрэзыжьынхэм тикъэралыгъо щыпсэурэ цIыфхэм медицинэ IэпыIэгъур зэфэдэу, Iэ­рыфэгъоу, икъоу ягъэгъотыгъэным иIоф зэшIохыгъэныр хабзэм иорганхэм (шъолъыр ыкIи муниципальнэ) апшъэ ралъхьэ.

Урысыем изакон ШъхьаIэ мыгъэцэкIэгъэныр укъоныгъэу алъытэщт. КъасIомэ сшIоигъу пандемием ыпкъ къикIыкIэ ти­къэралыгъо чIыпIэу зэрыуцуагъэм къыгъэнэфагъ псауныгъэр къэухъумэгъэным пстэуми анаIэ зэрэтырадзагъэр ыкIи медицинэм изытет лъэгэпIэшIухэм зэратетын фаер. Непэ медицинэм иIофышIэ нэбгыришъэ пчъагъэмэ япсауныгъэ зэрар зэрекIын ылъэкIыщтыр ашIэзэ, мафэ къэс лIыхъужъныгъэ зэрахьэ, сымаджэхэм япсауныгъэ фэбанэх. Арышъ, дэгъугъэ, Конституцием гъэтэрэзыжьынэу фашIыщтхэм медицинэм ыкIи цIыфхэм япсауныгъэ къэухъу­мэгъэным къэралыгъо шапхъэм тетэу хабзэм ынаIэ тыригъэтыным фэIорышIэныр, цIыфхэм медицинэ IэпыIэгъу агъотынымкIэ фитыныгъэ яIэным щыгу­гъынхэр.

(Тикорр.).