Мыекъопэ районым икъоджэ псэупIэхэр ма­шIом щыухъумэгъэнхэм пае хэушъхьафы­кIыгъэ мэшIогъэкIосэ-къэгъэнэжьын постхэр ащ щагъэпсыгъэх.

Мэз ыкIи чIышъхьэшъо машIо­хэм ящынагъо зышъхьарыт псэупIэхэр (ащ хэхьэх поселкэу Гъозэрыплъ ыкIи селоу Хъымыщ­кIэй) къэухъумэгъэнхэм афытегъэпсыхьэгъэ лъыплъэн-пэшIорыгъэшъ ыкIи оперативнэ-тактическэ Iофтхьабзэхэм япланэу 2020-рэ илъэсым телъытагъэр Урысыем ошIэ-дэмышIэ IофхэмкIэ и Министерствэ и ГъэIорышIэпIэ шъхьаIэу АР-м щыIэм зэхигъэуцуагъ ыкIи Адыгеим и ЛIышъхьэ ащ кIэтхэжьыгъ.

Мы илъэсым гъэтхапэм и 31-м къыщегъэжьагъэу Дахъо къоджэ псэупIэр машIом пэ­шIуе­кIорэ хэушъхьафыкIыгъэ режимым техьагъ. Ащ епхыгъэу чэщи ма­фи къулыкъу щызыхьыщт мэшIо­гъэкIосэ пост ведомствэм Гъо­зэрыплъэ щигъэпсыгъ. Ащ ишIуа­гъэкIэ мэшIогъэкIосэ-къэгъэнэ­жьын подразделением икъэкIон текIодэщт уахътэр нахь макIэ хъущт ыкIи машIом зыкъыштэным ищынагъо изытет зэпымыоу лъыплъэнхэ алъэкIыщт.

Муниципальнэ образованиеу «Дэхъо къоджэ псэупI» зыфи­Iорэм шъхьафит мэшIогъэкIосэ командэу нэбгыри 5 зыхахьэрэр иI. ОшIэ-дэмышIэ Iоф къэхъумэ щыгъэзыегъэным фэшI машIом игъэкIосэн фытегъэпсыхьэгъэ техникэр ыкIи Iэмэ-псымэхэр, шъуашэхэр ахэм аIэкIэлъых.

УФ-м ошIэ-дэмышIэ IофхэмкIэ и Министерствэ АдыгеимкIэ и ГъэIорышIэпIэ шъхьаIэ ипресс­къулыкъу къызэриIуа­гъэм­кIэ, хэушъхьафыкIыгъэ му­ници­пальнэ образованиехэм ячIыпIэхэм машIом закъыщимыштэным ищынэгъончъагъэ гъэпы­тэгъэнымкIэ МЧС-м, чIыпIэ зыгъэIорышIэжьыпIэхэм ыкIи общественнэ объединениехэм акIуа­чIэ зэхэлъэу фагъэIоры­шIэным мыщ фэдэ постхэм ягъэпсын мэхьанэшхо иI.

(Тикорр.).