Адыгеим социальнэ ыкIи экономикэ хэхъоныгъэхэр егъэшIыгъэнхэм фытегъэпсыхьэгъэ программэу 2020 — 2024-рэ илъэсхэм ателъытагъэр УФ-м и Правительствэ ыштагъ. Ащ фэгъэхьыгъэ унашъом УФ-м и Премьер-министрэу Михаил Мишустиныр кIэтхагъ.

АР-м и ЛIышъхьэ мы программэр зэраштагъэм субъектымкIэ мэхьэнэ ин зэриIэм къыкIигъэтхъыгъ. Ащ къыщыдэ­лъытагъэхэр икъоу гъэцэкIэгъэнхэм пае унэшъо гъэнэфагъэхэр планернэ зэхэсыгъом къыщишIыгъэх.

— Программэр республикэм социальнэ ыкIи экономикэ хэхъоныгъэхэр нахь псынкIэу егъэшIыгъэнхэм фытегъэпсыхьагъэу джыри зы хэкIыпI, — къыIуагъ КъумпIыл Мурат.

Субъектым непэ хэхъоныгъэу ышIы­хэрэр, ахэр къызэтезыIэжэрэ лъэныкъо­хэр, Адыгеим амалэу иIэхэр, федэ- къэкIуапIэхэр анализ шIыгъэхэу тхы­лъым щыгъэнэфагъэх. Аужырэ илъэсхэм рес­публикэм ипромышленность, псэолъэшIыным нахь заушъомбгъугъ, инвестициеу къыхалъхьэрэм хэхъуагъ, товарэу щапIэхэм IуагъэкIырэр нахьыбэ хъугъэ.

Джыри Адыгеим хэхъоныгъэхэр ышIынхэм пае анахьэу ищыкIагъэхэр программэм къыщыдэлъытагъэх. Ахэм зэу ащыщ энергетикэм ылъэныкъокIэ амалхэр зэрэмакIэхэр. Ащ иинфраструктурэ зегъэушъомбгъугъэным пае Iоф­тхьабзэу щыгъэнэфагъэхэр пхыращы­хэмэ, социальнэ псэуалъэхэр, унакIэхэр нахьыбэу ашIыщтых, атIупщыщтых, инвесторхэр нахьыбэу къеблэгъэщтых.

Транспортым епхыгъэ инфраструктурэм зегъэушъомбгъугъэным, бизнес цIыкIум ыкIи гурытым хэхъоныгъэхэр ягъэшIыгъэнхэм апае зэшIохыгъэн фаехэри, мэкъу-мэщым, предпринимательствэм IэпыIэгъоу агъотыщтыри, фэгъэ­кIотэнхэр зиIэ кредитхэр къызIэкIэгъэ­хьэгъэшIу шIыгъэным ищыкIагъэхэри программэм щыгъэнэфагъэх.

Промышленностым, мэкъу-мэщым, зекIоным алъэныкъокIэ инвестиционнэ проектхэр пхырыщыгъэхэ зыхъукIэ, Iоф­шIэпIэ чIыпIэхэм ахэхъощт, экономикэм зиушъомбгъущт, цIыфхэм ящыкIагъэр нахь къызIэкIэгъэхьэгъэшIу афэхъущт.

Псауныгъэм икъэухъумэн, культурэм, спортым яфэIо-фашIэхэр цIыфхэм нахьыбэу къаIэкIэхьанхэм фытегъэпсыхьэгъэ Iофтхьабзэхэри къыщыдэлъытагъэх. Щы­IакIэр нахьышIу хъуным, зигъот макIэхэм япчъагъэ къеIыхыным апае зэхэубытагъэу зэшIохыгъэн фаехэри щыгъэнэфагъэх.

Программэм ипхырыщын пэIухьанэу 2020 — 2024-рэ илъэсхэм федеральнэ бюджетым къыхэхыгъэу сомэ миллиарди 5 Адыгеим къыфэкIощт.

— Лъэныкъо пстэумкIи хэхъоныгъэ­хэр тшIынхэу федеральнэ гупчэм амал къы­титыгъ, — къыIуагъ АР-м и ЛIышъхьэ. — Тэ типшъэрылъыр Iофтхьабзэу къагъэнэфагъэхэр федэ къатэу зэшIо­хыгъэнхэр ары. ТапэкIи ащ тетэу гупчэм Iоф датшIэмэ, респуб­ликэм иэкономикэ зэрэхэхъощтым, социаль­нэ пшъэрылъэу тиIэхэр зэ­кIэри зэрэдгъэцэкIэшъущтым, цIыфхэм ящыIакIэ нахьышIу зэрэхъущтым сицыхьэ телъ.

Программэм игъэпсынкIэ республикэм УФ-м мэкъу-мэщымкIэ и Министерствэ, ащ ипащэу Дмитрий Патрушевым, нэмыкI министерствэхэм чанэу Iоф ади­шIагъ.

Планернэ зэхэсыгъом Лъэпкъ проект­хэм япхырыщын епхыгъэ Iофхэми ащытегущыIагъэх. Зэпахырэ узэу дунаир зэлъызыкIугъэм Iофыгъуабэ къызди­хьыгъ нахь мышIэми, ахэм къащыдэлъытагъэ­хэм ягъэцэкIэн пстэумэ анахь шъхьаIэу къызэрэнэжьырэм республикэм ипащэ къыкIигъэтхъыгъ. Лъэпкъ проектхэм япхыгъэ Iофтхьабзэхэр апэ рагъэ­шъын­хэу, игъом ахэр гъэцэкIэгъэнхэм ыуж итынхэу къафигъэпытагъ. Анахьэу ар зэхьылIагъэр социальнэ проектхэр, рес­публикэмкIэ мэхьэнэ ин зиIэ псэуалъэ­хэм яшIын.

ХЪУТ Нэфсэт.