Зэпахырэ узэу коронавирусыр къызыпыхьагъэхэм ягъэхъужьын нахь шIуагъэ къытэу зэрэзэшIопхыщтым къэралыгъо пчъагъэмэ яшIэныгъэлэжьхэр еусэх. Аужырэ уахътэм къыхагъэщыгъэхэм ащыщ лъыр къэзыгъэпсыхэрэм ащыщэу плазмэр сымэджагъэхэу хъужьыгъэхэм аIахэу, узыр зиIэхэу зэIазэхэрэм ахакIэмэ ишIуагъэ къызэрэкIорэр. Мы шIыкIэр Адыгеими щыпхыращыным фэхьазырых.

Плазмэр зыщаIахыщт, зыщыдэлэжьэщтхэ, зыщаIыгъыщт ыкIи зищыкIагъэхэм атезыгощэщт чIыпIэ Мыекъопэ къэлэ сымэ­джэ­щым къыщызэIуахыгъ. Блыпэ мафэм ащ коронавирусыр къызэузыгъахэхэу, агъэхъужьыгъэ нэбгыри 2-мэ плазмэр щаIахыгъ.

Дунаим щаушэтырэ IэзэкIэ амалхэр яIэубытыпIэхэу, Урысыем ушэтынхэр щашIых. ШIэныгъэ-ушэтын институтэу Склифосовскэм ыцIэ зыхьырэр, гущыIэм пае, коронавирускIэ сымэджагъэхэу хъужьыгъэхэм къяджэ плазмэр джы сымаджэ­хэм апае атынэу.

Узыр къыоузыгъахэу ухъу­жьыгъэмэ, ащ ебэнышъущт иммунитет уиIэ мэхъу. Зы цIыфым плазмэу ытырэм нэбгыритIу рыбгъэхъужьышъущтэу институтым макъэ къегъэIу. Плазмэр сымаджэхэм ахэкIэгъэнымкIэ апэрэ Iофтхьабзэхэр тхьамафэкIэ узэкIэIэбэжьмэ мы институтым щырагъэкIокIыгъэх.

Адыгеим псауныгъэр къэухъу­мэгъэнымкIэ и Министерствэ зэпхыныгъэ дыриIэу институтым иIофышIэхэр упчIэжьэгъу ешIых.

Министрэм игуадзэу Максим Коробко къызэрэтиIуагъэмкIэ, узыр цIыфым къызеузыгъэм иятфэнэрэ мафэ къыщыубла­гъэу тхьамэфищым нэсэу плазмэр хэбгъэхъон плъэкIыщт. Ау мы шIыкIэр джыри дэгъу дэдэу зэгъэшIагъэу, шIуагъэу къытырэр зэхэфыгъапэу щытэп. Адыгеим щыпсэухэу ар къызэузыгъэхэм янахьыбэм хьылъэ ахэтэп ыкIи плазмэр зэпхьылIэн фае джыри щыIэгоп.

— Узым игъэхъужьынкIэ нэмыкI шIыкIэхэу щыIэхэм яшIуагъэ къэмыкIо зыхъукIэ, сымаджэр хьылъэмэ ары плазмэр зыхэдгъэхъощтыр. Джырэ уахътэм ащ щыкIэрэ зи тиIэп, — къытфиIотагъ Максим Коробко. — Ау щытми, коронавирусыр къызыхагъэщыгъэхэу плазмэ зыты зышIоигъохэм ар аIытхыщт, тимыщыкIагъэу щытэп.

Сыд фэдэ шапхъэхэмкIэ къы­хахыхэра плазмэр зыIахыщтхэр? АпэрэмкIэ, коронавирускIэ сымэджагъэу, ар агъэхъужьыгъа­хэу щытын фае. IэзэкIэ амалыр джыри икъоу зэрэзэмыгъэшIагъэм къыхэкIэу лъыр зэрагъэтыхэрэм якъыхэхыни агъэпхъэ­шагъ — ар ныбжьыкIэн фае, хэужъыныхьэгъэ уз иIэнэу, сымэджэнэу щытэп.

ШIэныгъэ-ушэтын институтэу Склифосовскэм ыцIэ зыхьырэм ипащэ къызэрэхигъэщыгъэмкIэ, плазмэм игъэфедэн шIуагъэу къытырэр джыри икъоу зэгъэшIагъэп, ар зы мэфэ Iофэп. Ау яIофшIагъэхэм къызэрагъэлъэгъуагъэмкIэ, ар зыхакIагъэхэм тхьабылхэм жьыр языгъэгъотырэ аппаратхэм апашIэнхэм яIоф нэсыгъэп.

МэщлIэкъо Саид.