«#МыВместе» зыфиIорэ проектым къыдыхэлъытэгъэ Урысые акциеу «Тележка добра» зыфиIорэм Адыгеим ит гъомылэпхъэ тучанхэр хэлэжьэнхэу рагъэжьагъ. Мыекъуапэ щыпсэурэ цIыфхэм ащыщхэу IэпыIэгъу зищыкIагъэхэм гъомылапхъэхэр зэрылъ апэрэ Iалъмэкъхэр волонтерхэм алъагъэIэсыгъэх.

Урысые народнэ фронтым ишъолъыр къутамэу Адыгеим щыIэм иактивистхэм Адыгеим ит тучанхэм хэушъхьафыкIыгъэ боксхэр ачIагъэуцуагъэх. Ахэм шIоигъоныгъэ зиIэ пстэуми гъо­мылапхъэхэр ащэфынхэшъ, ралъхьан алъэкIыщт. Iалъмэ­къым изы зэрэхъурэм елъытыгъэу ОНФ-м иактивистхэм ахэр аугъоих ыкIи коронавирусым чIыпIэ къин ригъэуцогъэ цIыф­хэм афащэх.

Мыекъуапэ щыпсэухэрэ пенсионерхэмрэ сабыибэ зэрыс унагъохэмрэ гъомылапхъэхэр зыфащагъэхэм ащыщых. Дагъэ, щай, хьаджыгъэ, кIапхъэхэр, нэмыкIхэри аратыгъэх. Сабыищ зыщапIурэ унагъом ОНФ-м иактивистхэм IэшIу-IушIухэр афыхалъхьагъэх. — IэпыIэгъум щыкIэрэ цIыф­хэм тишIуагъэ ядгъэкIыным тэркIэ мэхьанэшхо иI. Ащ къы­хэкIэу цIыфхэр социальнэу къэухъумэгъэнхэмкIэ къулыкъу­хэм тадэлажьэ. Непэрэ мафэм чIыпIэ къин ифагъэр макIэп. Мыщ фэдэ Iофтхьабзэхэм яшIуа­гъэкIэ цIыфхэм IэпыIэгъу тафэхъун тэлъэкIы, — къыIуагъ Урысые народнэ фронтым ишъо­лъыр къутамэу Адыгеим щыIэм ипащэу Юрий Гороховым.

«Тележка добра» зыфиIорэм гъомылапхъэхэр къезыхьылIэн шIоигъоныгъэ зиIэхэр Мыекъуа­пэ иурамэу Краснооктябрьскэм тет унэу N 47-м къекIолIэнхэ алъэкIыщт. Телефон номерэу 8 (8772) 210-500-м нахь игъэкIотыгъэу къэбарыр къыщаIотэщт. Шъугу къэтэгъэкIыжьы, «#МыВместе» зыфиIорэ акциер къэ­ралыгъом ишъолъырхэм зэкIэми ащэкIо. Линие плъырым ителефон: 8 (800) 200-34-11. Гупчэм чэщ-зымафэм зэпымыоу Iоф ешIэ.

Гъонэжьыкъо Сэтэнай.