Апэ игугъу къашIы зэхъум къызэрэтшIошIыгъэм фэмыдэу къычIэкIыгъ — Iофым изытет нахь къэхьылъагъ, Iофыгъоу къэуцугъэм зиушъомбгъугъ.

ЦIыфыбэмэ ядунай зыщахъожьыгъэ къэралыгъохэм ямызакъоу, зэпахырэ узым уигъэщынэу зэрэдунаеу зыщиушъом­бгъоу ригъэжьагъ. Пандемием пэшIуе­кIогъэным фэшI щынэгъончъэ Iофтхьабзэхэр Урысыем щызэхащагъэх. Гъэтхапэм и 31-м къыщегъэжьагъэу мэлылъфэгъум и 30-м нэс зекIоныр зыгъэмакIэрэ Iофтхьабзэхэу шъолъырхэм ащагъэнэфагъэхэр хышIуцIэ Iушъом щыпсэурэ адыгэхэми алъыIэсыгъэх.

Мы уахътэм ехъулIэу къызэратыгъэм­кIэ, Шъачэ нэбгырэ 59-мэ коронавирусыр къяузыгъ, ТIопсэ районым — 36-рэ, хышIуцIэ Iушъом Iус адыгэ къуаджэхэм ащагъэунэфыгъэп.

— Мафэ къэс Iофым изытет тылъэп­лъэ, къоджэ псэупIэхэм адэт хасэхэм япащэхэм гущыIэгъу тафэхъу, Iофыгъоу къэуцухэрэр зэшIотэхых. Шъыпкъэр пIощтмэ, цIыфхэр чIыпIэ къин ифагъэх, арэущтэу щыт нахь мышIэми, Iофхэр зыпкъ итых. Адыгэ къуаджэхэм ащырэ­хьат, шапхъэхэр агъэцакIэх, къин къащыхъурэ закъор зекIонхэ зэрэфимытхэр ары. Шъхьадж ежь иунэгъо хъызмэт ыуж ит, хатэхэр агъэкъабзэх, агъэтIысых, бжьахъохэм гъатхэм яIофшIэн ижъо­тыпI, — къыIуагъ хышIуцIэ Iушъом щыIэ «Адыгэ Хасэм» итхьаматэу КIакIыхъу Мэджыдэ.

Шапсыгъэхэм яобщественнэ парламент хэтхэм Iофым изытет къыдалъытэзэ, ашIэн фаеу агъэнэфагъэхэм ахэплъэ­жьыгъэх. Карантиныр къемыжьэзэ, адыгабзэмрэ тхыбзэмрэ я Мафэ хагъэу­нэфыкIынэу игъо ифагъэх, Дунэе Iоф­тхьабзэу «ШIэжьым ичъыг» хэлэжьа­гъэх, хэшъэе чъыгишъэ пчъагъэ къуаджэу ШэхэкIэй щагъэтIысыгъ. Джы адыгэ быракъым и Мафэ зэрэхагъэунэфы­кIыщт шIыкIэм егупшысэх.

Хэгъэгу зэошхом ТекIоныгъэр къызыщыдахыгъэр илъэс 75-рэ зэрэхъурэм фэгъэхьыгъэу Хэшх Руслъан зипэщэ адыгэ культурэм и Гупчэ Шъачэ ыкIи ТIопсэ районым якъоджэ псэупIэхэм къащигъэлъэгъощт концертхэр ыгъэхьазырыгъэх.

— Адыгэ музыкальнэ Iэмэ-псымэхэмкIэ ансамблэу «Насып» зыфиIорэм концерти 10-м ехъу ыгъэхьазырыгъэу щытыгъ, — къеIуатэ Хэшх Руслъан. —ЖъоныгъуакIэм и 9-р къэмысызэ зыгъэ­псэфыгъо мафэхэм ахэр къатынхэу щытыгъ, ау коронавирусым ыпкъ къи­кIыкIэ итхъухьагъэхэр зэщыкъуагъэх. Джы ахэр пIэлъэ гъэнэфагъэкIэ зэкIэтхьагъэх. КонцертитIу ШэхэкIэй цIыкIурэ Нэджыгорэ къащыттынэу игъо тифагъ. Фэбагъэ хэлъэу къызэрэтпэгъокIыгъэ­хэмкIэ пстэуми тафэраз.

ЦIыфхэм къиныгъоу зэпачыхэрэм ямылъытыгъэу сэмэркъэур ыкIи чэфыгъор чIанэхэрэп. Шапсыгъэ шъолъырым зэкIэми къыщызэдаIо: «Коронавирусыр тэ къытщэрэщын!»

Ныбэ Анзор.