БэмышIэу Адыгэкъалэ иадминистрацие ипащэу ЛIыхэсэ Махьмуд къэлэдэсхэм джыри зэ джэпсалъэкIэ зафигъэзагъ. Адыгэкъалэ, щыпсэурэ нэбгырэ пчъагъэм телъытагъэмэ, зэпахырэ коронавирусыр къызлъыIэсыгъэхэмкIэ республикэм ит псэупIэхэм апэ зэришъыгъэр, непэрэ мафэм сымаджэхэм япчъагъэ нэбгырэ 31-рэ зэрэхъугъэр иджэпсалъэ къыщиIуагъ. Махьмуд цIыфмэ къяджагъ зыфэсакъыжьынхэу, благъэу зэкIэрымыхьанхэу, ушъхьагъу имыIэу урамым къытемыхьанхэу, нэпцI гупшысэхэр зыхэлъ къэбархэу къырахьакIыхэрэр ашIошъ амыгъэхъунхэу.

ТапэкIэ тигъэзет игугъу къы­зэрэщытшIыгъагъэу Адыгэкъалэ идэхьапIэхэр зэфашIыгъэх, гъу­напкъэ зиIэ шапхъэхэр щагъэлъэшыгъэх. Ащ къыщегъэжьа­гъэу яIофхэр зэрэлъыкIуатэ­хэ­рэр, коронавирусыкIэу къежьагъэм зэребэныхэрэр, нэмыкI Iофыгъохэу зыгъэгумэкIыхэрэр электроннэ зэпхыныгъэхэр дгъэ­федэхэзэ ЛIыхэсэ Махьмуд кIэкIэу къедгъэIотагъэх.

— Махьмуд, хабзэ зэрэхъу­гъэу джэпсалъэкIэ къэлэдэс­хэм игъорыгъоу зафэогъазэ. УзэхашIыкIа?

— ЦIыфхэр пшъыгъэх, чIыпIэ зэжъоу зэрыуцуагъэхэм ящы­IэкIэ-псэукIэ лъэшэу къыгъэ­хьылъагъ. Ау щытми, тызэмыжэгъэ узэу къытфэкIуагъэм зэрэтфэлъэкIэу тыпэуцужьын ыкIи тыкъебгынэжьыфэ нэс зытIэжэн фае. Нахьыбэрэмэ ар къагурэIо, тызэхашIыкIы, ашIэ ежьхэм ямызакъоу ягупсэхэми, янэжъ- Iужъхэми амышIахэу яягъэ арагъэкIын зэралъэкIыщтыр, псауныгъэм нахь шъхьаIэ зэрэщымыIэр. Ахэм ятIуагъэр агъэ­цакIэ, рэхьатэу уахътэр унэм щагъакIо, гоIэгъу щымыIэу урамым къытехьэхэрэп. Ау зырызхэм джыри ашIошъ хъурэп узыр къызэрэомыблэщтыр, зэрарышхо, лIэныгъэм нэсэу къы­зэрэуихын ылъэкIыщтыр. Ащ фэдэхэр тиIофшIэнкIэ, ащ иза­къоп эпидемиологие зыпкъитыныгъэ тиIэнымкIэ пэрыохъу къытфэхъух.

— Махьмуд, джырэ уахътэм шъуиIофхэм язытет зэрэдэим тыщыгъуаз, аущытми нахь игъэкIотыгъэу къытфэпIотагъэ­мэ дэгъугъэ.

— Адыгэкъалэ щыщэу нэбгырэ 31-мэ коронавирусыр къяузыгъ. Непэрэ мафэм ехъу­лIэу Мыекъуапэ къыщыхагъэщыгъэ сымаджэм ар нахьыб. Тикъалэ щыпсэурэ нэбгырэ пчъагъэм телъытагъэмэ, ар бэ- дэд. Сымаджэхэм ащыщ нэбгырэ 14-р Адыгэкъалэ дэт сым­джэщэу К.Батмэным ыцIэ зы­хьы­рэм иIофышIэхэу къычIэ­кIыгъ. Джары Роспотребнадзорым къытфигъэнэфэгъэ унашъо­хэм такъыпкъырыкIызэ къэлэ дэхьэгъухэр зыкIызэфэтшIыгъэ­хэр, сымэджэщыр карантин шIыкIэм тетэу Iоф ышIэнэу зыкIэтшIыгъэр ыкIи гъунапкъэ зиIэ шапхъэхэр зыкIэдгъэпхъэшагъэхэр. Сымаджэхэм ащыщ­хэу зиуз къызэмыхьылъэкIырэ нэбгыриймэ яунэхэм арысхэу загъэхъужьы, адрэхэр Мыекъуа­пэ иинфекционнэ сымэджэщ чIэлъых. Сымаджэ хъугъэхэр зыхэхьагъэхэр, зигъусагъэхэр къыхэдгъэщыгъэх, ахэр нэбгырэ 255-рэ мэхъу. Ахэмэ анализхэр аIахыгъэх, шъхьаф-шъхьа­фэу мэпсэух, мэфэ пшIыкIуплIым къыкIоцI унэм къикIыщтхэп.

— Урамхэм, унэ чIэхьапIэхэм ягъэкъэбзэн фэгъэхьыгъэ Iофтхьабзэхэр решъогъэ­кIокIыха?

— Урамхэм, унэ чIэхьапIэхэм язакъоп, цIыфхэр нахьыбэу зыщызэуалIэхэрэ чIыпIэхэр зэкIэ ятэгъэукъэбзых, дезинфекцие ятэгъэшIых. Роспотребнадзорым иунашъохэр зэкIэ тэгъэцакIэх, псэупIэ-коммунальнэ хъызмэтым иIофхэри дэтэгъэцакIэх.

— Iудзыгъэ шIыкIэм тетэу егъэджэнхэр тыди щызэхащагъэх. Техникэм ылъэныкъокIэ ащ фэдэ амал зимыIэхэм шъуадэIэпыIа?

— Компьютерхэу, нэмыкI псэуалъэхэу зэпхыныгъэ шIыкIэхэмкIэ бгъэфедэн плъэкIынэу еджапIэхэм агъэфедэщтыгъэхэри, гъэсэныгъэм и ГъэIорышIапIэу Адыгэкъалэ дэтым чIэтыхэри ащ фэдэ амал зимыIэ кIэлэеджакIомэ мы пIалъэм телъы­тагъэу яттыгъэх. ЗэкIэхэри етэгъаджэх, ау интернетымкIэ гумэкIыгъохэр тиIэхэу бэрэ къыхэкIы, зэпыухэр егъэджэным фэхъухэу мэхъу. А гумэкIыгъом идэгъэзыжьыни ыуж тит.

— Гъот макIэ зиIэ унагъо­хэм арыс кIэлэеджакIохэм гъомылапхъэкIэ шъуадеIэн шъолъэкIа?

— Ары, тикъалэкIэ кIэлэ­еджэкIо 447-рэ тиI фэгъэкIотэныгъэ зыфэтшIыхэу. Тхьамэфи­тIум зэ гъомылапхъэхэр зэрылъ Iалъмэкъхэр ахэм афятэгъэгощых. А Iалъмэкъхэр дэгъоу тэушъэх, чэтыли, нэмыкI шхыныгъохэри къыщыдэтэлъытэх. КIэлэеджакIомэ язакъоп, гъомылапхъэ щыкIэхэу къытфытеохэрэм, интернет зэпхыныгъэ­хэр къызфагъэфедэхэзэ къытфатхэрэмэ зэкIэмэ IэпыIэгъу тафэхъу. Спонсорхэм ямылъку­кIэ Iалъмэкъ 400-м кIахьэу дгощыгъэ. Ащ ыпэкIэ респуб­ликэм иIэпыIэгъукIэ гъомылапхъэхэр зэрылъ Iалъмэкъ мин аIэкIэдгъэхьагъ нэжъ-Iужъхэм, сэкъатныгъэ зиIэхэм, зизакъо­хэм ыкIи амалынчъэхэм. Джыри тыхьазыр тишIуагъэ цIыфмэ ядгъэкIынэу. АР-м и ЛIышъхьэу КъумпIыл Мурат тищысэу, ар цIыфхэм зэрафэгумэкIырэм фэдэу тэри шIукIэ тазэрэпэгъо­кIыщтым тыпылъ, тфэшIэщтыр тэшIэ.

— Тхьауегъэпсэу гущыIэгъу укъызэрэтфэхъугъэмкIэ.