Мы лъэхъаным коронавирусым пэуцужьын зылъэкIыщт вакцинэхэмрэ препаратхэмрэ зэрэдунаеу ащылъэхъух, Урысыери ахэм ащыщ.

Iэзэгъу уц пстэури къыхэпхыныр ыкIи уушэтыныр сыдигъуи псынкIагъоп. КIэу къаугупшысыхэрэр апэ цыгъохэм, етIанэ псэушъхьэхэм, ахэм ауж цIыфым ахалъхьэхэзэ яшIуагъэ къакIомэ ауплъэкIух. Ушэтынхэм илъэс пчъагъэхэр ахьых.

Коронавирусыр зыгъэкIодыщт вакцинэм икъыхэхын зэралъэкIэу Iоф дашIэ. США-м псауныгъэмкIэ илъэпкъ Институтрэ биотехнологиякIэхэм адэлэжьэрэ компаниеу «Moderna» зыфиIорэмрэ къагъэхьазырыгъэ вакцинэр цIыфхэм ахалъхьэу рагъэжьагъ, ахэр зэкIэ волонтерых, нэбгырэ 45-рэ мэхъух.

Вакцинэм цIыфым ишIуагъэ къекIымэ ауплъэкIуным пае ушэтынхэр мэзэ 12-м къыкIоцI ашIыщтых, ащ ыуж ары цIыф жъугъэхэм ар ахаплъхьэ хъущтмэ къызылъэгъощтыр.

Коронавирусыр ыгъэкIодынэу зыщыгугъыхэрэ вакцинэр апэрэ цIыфэу зыхалъхьагъэр илъэс 43-рэ зыныбжь бзылъфыгъэу Дженнифер Холлер, ар Сиэтл щэпсэу. Къэралыгъо пстэумэ яшIэныгъэлэжьхэмрэ яэкспертхэмрэ Америкэм щырагъэжьэгъэ ушэтыным лъыплъэщтых.

ВакцинакIэр егъэзыгъэкIэ зыми халъхьащтэп, ежь-ежьырэу къезэгъыхэрэмрэ волонтерхэмрэ агъэфедэщтхэр. Ахэр нэбгырэ 45-рэ хъухэу къыхахыгъахэх. Iэзэгъу уцыр зыхалъхьагъэм мэфэ 28-рэ зытекIыкIэ ары ятIонэрэ хэлъхьэгъур зырагъэкIокIыщтыр. АуплъэкIурэ вакцинэм ишIуагъэ къэкIонэу, коронавирусым ар фырикъунэу зэрэщыгугъыхэрэр американскэ шIэныгъэлэжьхэм къаIо.

Дженнифер къызэриIуагъэмкIэ, гриппыр цIыфхэм къапымыхьаным пае уколхэр зэрашIырэм фэд вакцинакIэр зэрахалъхьэрэри. Апэрэ мафэм зыхалъхьэгъэ чIыпIэр къэуплъыжьы, ятIонэрэм — цIыфым ыIэ мэузы, ящэнэрэм — щегъэтыжьых.

Вирусологхэмрэ экспертхэмрэ зэрэхагъэунэфыкIырэмкIэ, вакцинакIэм ишIуагъэ къызэрыкIорэр агъэунэфыми, заушэтыгъэм илъэсрэ ныкъорэ темыкIэу ар цIыф жъугъэхэм ахалъхьащтэп.

Гупчэхэм IофшIэныр зэпагъэурэп

Тэ тикъэралыгъуи коронавирусым пэуцужьын зылъэкIыщт вакцинэм икъы­хэхын Iоф щыдашIэ. Вице-премьерэу Татьяна Голиковам гъэтхапэм икъихьагъум къыIогъагъ специалистхэм яамалхэр рахьылIэнхэшъ нахь псынкIэу препаратыр къагъотынэу пшъэрылъ зэрафагъэуцугъэр.

Урысыем и Федеральнэ биологическэ академие инаучнэ-ушэтэкIо институтэу Санкт-Петербург дэтым испециалистхэм бжыхьэм нэс зишIуагъэ къэкIощт вакцинэр къагъотынэу, илъэсым ыкIэм ар псэушъхьэхэм ахалъхьэзэ аушэтынэу къаIуагъ.

ЦIыфхэм япсауныгъэ къэухъумэгъэным пылъ Дунэе организацием ипащэу Терос Аданом Чебреиссус къызэриIорэмкIэ, джынэс зэпахырэ узхэм джырэ фэдэу къэралыгъуабэмэ защаушъомбгъугъэу къыхэкIыгъэп. Джащ фэдэу пандемиер ежь-ежьырэу мыIэсэжьэу, цIыфхэм къы­зэтырагъэуцуагъэуи хъугъэп.

Мы лъэхъаным коронавирусыр къыз­пыхьагъэхэм ар къызэратемыкIонэу яиммунитет зыкъырагъэIэты. УФ-м псауныгъэр къэухъумэгъэнымкIэ и Министерствэ ипащэ бэмышIэу къыIуагъ тикъэралыгъо имедицинэ гупчиблымэ коронавирусыр къызэрэзэтырагъэуцощт вакцинэм икъэгъотын зэращыдэлажьэ­хэрэр. Мэлылъфэгъум и 13-м Iудзыгъэ шIыкIэм тет зэIукIэгъоу УФ-м и Президентэу Владимир Путиным зэхищэгъа­гъэм препаратыкIэу къыхахыгъэр аушэтынэу зэрэрагъэжьэщтыр къыщиIуагъ.

Джащ фэдэу вирусологием и Гупчэ идиректорэу Ренат Максютовыми вакцинэ лъэпкъ 26-у Iоф зыдашIэхэрэм анахь дэгъухэр къыхахынхэшъ, яшIуагъэу къакIорэр мэкъуогъум и 22-м аушэтынхэу зэрэрагъэжьэщтыр къыхигъэщыгъ. ТхьамафэкIэ нэбгырэ 60-мэ ар ахалъхьащт, Iэзэгъу вакцинэм цIыфым ишIуагъэ къекIымэ ауплъэкIущт.

(Тикорр.).