ЖъоныгъуакIэм и 1-м къыщегъэжьагъэу предприятиехэм ыкIи унэе предпринимательхэм зэкIамыгъэкIожьыщт ахъщэ къаратынымкIэ тхьа­пэхэр Федеральнэ хьакъулахь къулыкъум ыштэнхэу ригъэжьэщт. Ащ фэгъэхьыгъэ къэбарыр УФ-м и Премьер-министрэу Михаил Мишустиным къыIуагъ.

Къэралыгъом сыдэущтэу ахъщэ къыIыпхыщта?

Бизнес цIыкIум ыкIи гурытым епхыгъэ компаниехэм яIофышIэхэм лэжьапкIэр аратынымкIэ ахъщэр къэралыгъом афызэкIигъэкIожьызэ ышIыщт, зы нэбгырэм телъытагъэу ар сомэ 12130-рэ мэхъу. Джащ фэдэу, компанием нэбгыри 100-мэ Iоф щашIэмэ, IэпыIэ-гъур мазэм сомэ 1213000-рэ хъущт. Мыр къыуатыным фэ­гъэхьыгъэ тхьапэхэр мэзитIуми, мэлылъфэгъумрэ жъоныгъуа­кIэмрэ, бгъэхьазырынхэ плъэ­кIыщт.

Мэлылъфэгъум телъытэгъэ ахъщэр жъоныгъуакIэм и 18-м къыщегъэжьагъэу компаниехэм ясчетхэм арыхьанэу ра­гъэжьэщт. ЖъоныгъуакIэм пае мэкъуогъум къаратыжьыщт.

Урысыем ихьакъулахь къулыкъу къеолIагъэм иунэе каби­неткIэ IэпыIэгъум кIэлъэIун фи­тыныгъэ иI. Ащ фэдэ амал жъоныгъуакIэм и 1-м къы­ще­гъэжьагъэу щыIэ хъущт.

Ащ шъущымытхыгъэмэ, джы ежъу­гъэжьэнышъ, регистрацие зыщышъушIын амал шъуиI:

федеральнэ хьакъулахь къулыкъум исайт унэе предпринимателым иунэе кабинет;

федеральнэ хьакъулахь къулыкъум исайт юридическэ лицом иунэе кабинет.

Бизнес цIыкIумрэ гурытымрэ IэпыIэгъур зэратыщтыр, мыщ хэхьэ унэе предпринимательхэри. Iоф ащызышIэрэр нэ- бгырэ 250-м мынахьыбэу ыкIи ахъщэу къыIэкIэхьагъэр сомэ миллиарди 2-м емыхъун фаеу шапхъэхэм къаIо. Къыхэгъэщыгъэн фае УФ-м и Президентэу Владимир Путиным бизнес цIы­кIум екIолIакIэу къыфагъоты­хэрэм зэхъокIыныгъэхэр фэ­шIы­гъэнхэр игъоу зэрилъыта­гъэр.

Ахъщэр къызэратыщтхэр

нахь зэрар зыхьыгъэ лъэны­къохэм ащыщ предприятиехэр ары. Мыгъомылэпхъэ продукци­ер зыщэхэрэр, культурэр, спортыр, хьакIэщ бизнесым хэтхэр, нэмыкIхэри мыщ хэхьэх.

Гъонэжьыкъо Сэтэнай.