Адыгэ Республикэм и ЛIышъхьэу КъумпIыл Мурат тыгъуасэ Тэхъутэмыкъое районым зыщэIэм Инэм район сымэджэщым екIолIагъ. Коронавирусыр къызпыхьагъэхэм зыщяIэзэнхэ алъэкIыщт госпиталь мыщ щагъэпсы, зэкIэмкIи ащ нэбгыри 100 чIэфэщт. IофшIэнхэр зэрэлъыкIуатэхэрэм республикэм ипащэ зыщигъэгъозагъ. Джырэ уахътэм медучреждением изэтегъэпсыхьанкIэ IофшIэнхэр ыкIэм фэкIуагъэх: хэушъхьафыкIыгъэ палатэхэр агъэпсыгъэх, ахэм кислородыр аращэлIагъ, реанимационнэ отделениер агъэхьазырыгъ, Iоф зышIэщт врачхэр, сымаджэхэр учреждением къызэзэрэчIащэщтхэ шIыкIэр агъэнэфагъэх. Тедзэу ащэфыгъэх: ЭКГ-м иаппаратхэр, рентген-аппаратхэр, биохимическэ ушэтынхэмкIэ лабораториер, тхьабылым Iоф езыгъэшIэрэ аппаратхэр, Iэзэгъу уцхэр, нэмыкIхэри. Охътэ благъэм госпиталым компьютернэ томограф къыIэкIэхьащт.

— Непэ пшъэрылъ шъхьаIэр — зэпахырэ узым зиушъомбгъуным ищынагъо къызыуцукIэ тищыкIэгъэщт чIыпIэхэр, оборудованиер ыкIи медикаментхэр IэпэчIэгъанэу тиIэнхэр ары. Iофхэм язытет зыфэдэщтыр къэшIэгъуае, арышъ зэкIэм тыфэхьазырын фае. ГоспиталыкIэм непэ ищыкIагъэр зэкIэ IэкIэлъ пIоми ухэукъощтэп ыкIи сымаджэхэр ыштэнхэм джырэблагъэ фэхьазырыщт. Iофхэр зыщы­къин лъэхъаным медицинэм иIофышIэхэм Iэпы­Iэгъу къафэхъухэрэ бизнес-сообществэм илIыкIохэм инэу сызэрафэразэр ясIомэ сшIоигъу. Анахь гущыIэ фабэхэр зыте­фэрэр Шъэумэн Хьазрэт Мэджыдэ ыкъор ары. Поселкэу Инэм дэт сымэджэщым ищыкIэгъэ оборудованием ыкIи госпиталым изэтегъэпсыхьан апэIухьэгъэ мылъкур зэкIэ мыщ ыпшъэ дэфагъ, — къы­Iуагъ Адыгеим и ЛIышъхьэ.

Коронавирусым пэшIуекIогъэнымкIэ пшъэ­дэкIыжьышхо зыхьыхэрэ медикхэм щынэгъон­чъэу Iоф ашIэн амал яIэным мэхьанэшхо зэриIэр, ахэм IэпыIэгъу афэхъугъэн зэрэфаер КъумпIыл Мурат къыхигъэщыгъ.