Къихьащт мазэм и 2-м нэс Адыгэкъалэ дэт сымэджэщэу К.Батмэным ыцIэ зыхьырэм карантин шIыкIэм тетэу Iоф ышIэщт — мыщ щылэжьэрэ нэбгырэ 18-мэ зэпахырэ узэу коронавирусыр къалъыIэсыгъ.

Сымэджэщым иврач шъхьаIэ Iэзэн IофымкIэ игуадзэу Ачэхъу Заур къызэрэтфиIотагъэмкIэ, зэкIэмкIи нэбгырэ 31-рэ (ахэм ащыщэу 14-р медицинэм иIофышIэх, 17-р ыпэкIэ къычIэфагъэхэр арых) мыщ джырэ уахътэм чIэубытагъэ хъугъэ — тхьамэфитIум къыкIоцI чIэ­кIынхэ фитхэп, зэпахырэ узыр къякIугъэмэ къэзыушыхьатыщт уплъэкIунхэр арагъэшIых. Тыгъуасэ ехъулIэу зыми коронавирусыр мыхэм ащыщэу къыхагъэщыгъэп, уахътэ зытешIэкIэ, джыри ауплъэкIущтых.

Зэпахырэ узым нэмыкI гумэкIыгъохэр зиIэхэри гум ра­нэ­хэрэп, ахэм Пэнэжьыкъуае дэт сымэджэщым зыфагъэзэн алъэ­кIыщт. Ачэхъу Заур къызэрэхигъэщыгъэмкIэ, анахьэу зыпылъхэр цIыфхэр яунэхэм къарамыгъэкIыхэу ящыкIэгъэ IэпыIэгъур арагъэгъотыныр ары. ГущыIэм пае, уз хэхыгъэ зиIэр зыгорэм егъэгумэкIымэ, Пэнэжьыкъое сымэджэщым ирегистратурэ теон ылъэкIыщт, ар зыуплъэ­кIущт врачыр унэм къыфэкIощт.

Уц Iэзэгъухэу къафыратхыкIыхэрэри къэзыушыхьатырэ тхылъхэми къалъыкIонхэу ищыкIагъэп — уц щапIэхэм зэзэгъы­ныгъэ адашIыгъэу ахэр аратых, уцхэм къалъыкIонхэ зэрэфаемкIэ аужырэхэм макъэ арагъэIу.

Елбэтэу IэпыIэгъу зищыкIагъэхэр Пэнэжьыкъое сымэджэщым къыращалIэх, зиIоф нахь хьылъэхэр Мыекъуапэ нагъэсых. Мыщ дэжьым къыхэгъэщыгъэн фае, къэбзэныгъэм ишапхъэхэр гъэлъэшыгъэу агъэцакIэх.

Тыгъосэрэ мафэм ехъулIэу Адыгэкъалэ щыщэу коронавирус къызэкIугъэ нэбгырэ 19 зэпахырэ узхэм зыщяIазэхэрэ респуб­ликэ сымэджэщым чIэлъ, унэм исхэу зэIазэхэрэм япчъагъэ нэбгыри 8 мэхъу.

Теуцожь районыр тштэмэ, яунэхэм арысхэу зэIазэхэрэр нэбгыритф, сымэджэщым чIэлъыр нэбгыритIу.

Шъугу къэдгъэкIыжьын, Адыгэкъалэ къыщысымэджагъэхэм япчъагъэ зэрэбэм къыхэкIэу, икIыгъэ тхьамафэм щызекIонхэмкIэ шапхъэхэу щагъэуцугъэ­хэр нахь щагъэпхъэшагъэх. Апэ IэзапIэр зэфашIыгъагъ ащ щылэжьэрэ врачыр къызэрэщысымэджагъэм фэшI, джы зэрэсымэджэщэу карантин Iоф­шIакIэм тырагъэхьагъ.

МэщлIэкъо Саид