Компаниеу «Россети Кубань» испециалистхэм Тэхъутэмыкъое районымкIэ поселкэу Инэм дэт район сымэджэщым къыщызэIуахыгъэ инфекционнэ госпиталым электроэнергиер икъоу IэкIэзыгъэхьащт, кВт 200 зилъэшыгъэ пкъыгъо щагъэуцугъ.

Шъолъырхэм къащызэIуахырэ госпитальхэм къыращэкIырэ, электроэнергиер аIэкIэзыгъахьэрэ пкъыгъохэр ащыгъэуцугъэнхэмкIэ энергетикхэм яшъыпкъэу Iофхэр лъагъэкIуатэх.

Шъугу къэтэгъэкIыжьы, компаниеу «Россети Кубань» Адыгэ республикэ клиникэ инфекционнэ сымэджэщэу Мые­къуапэ дэтым къыщызэIуахыгъэ госпиталым кВт 400 зилъэшыгъэ энергие къэкIуапIэ зэрэщигъэуцугъэр. Джащ фэдэу мы компанием ишIуагъэкIэ Адыгэ республикэ клиникэ сымэджэщми энергие къэкIопIакIэ иIэ хъугъэ.

ЫпэкIэ макъэ къызэрэдгъэIугъагъэу, мэлылъфэгъум и 16-м Адыгэ Респуб­ликэм и ЛIышъхьэу КъумпIыл Муратрэ компаниеу «Россети Кубань» игенеральнэ директорэу Сергей Сергеевымрэ телефонкIэ зызэдэгущыIэхэм, республикэм ит социальнэ, инфраструктурэ псэолъэ шъхьаIэхэм энергиер икъоу къаIэкIэхьан зэрэфаем игугъу ашIы­гъагъ, коронавирусым зыщыпэуцужьыхэрэ лъэхъаным язэдэлэжьэныгъэ агъэлъэшынэу зэзэгъыгъагъэх.

ПIалъэ горэкIэ шэпхъэ гъэнэфагъэхэм арыгъозэнхэ фаеу зэрэхъугъэм епхыгъэу электросетевой хъызмэтым ипсэуалъэхэм ягъэцэкIэжьынкIэ ыкIи техническэ фэIо-фашIэхэм язэхэщэнкIэ планхэм зэхъокIыныгъэхэр афэ­хъугъэхэми, санитар-эпидемиологие шапхъэхэм адиштэу энергетикхэм яIофшIэн непэ лъагъэ­кIуатэ.

Коронавирусым зызыщиушъомбгъурэ лъэхъаным Урысыем ишъолъыр­хэм электроэнергиер икъоу аIукIэныр компаниеу «Россети» ипащэу Павел Ливинскэм анахьэу гъунэ зылъифырэ лъэныкъохэм ащыщ. БлэкIыгъэ тхьэмафэм ащ къепхыгъэ компаниехэм пшъэрылъ афишIыгъ инвестиционнэ программэм къыщыдэлъытэгъэ гъэцэкIэжьынхэр игъом аухынхэу.