УФ-м и Конституцие гъэтэрэзыжьынхэр фэшIыгъэнхэм епхыгъэ предложение Урысыем и Президентэу Владимир Путиным къыхьыгъ. Ау мыщ фэгъэхьыгъэу цIыфхэм амакъэ атынэу зыщытыгъэ мафэр зэпахырэ узэу коронавирусым ыпкъ къикIыкIэ зэкIахьагъ. Ащ емылъытыгъэу зэлъа­шIэрэ цIыфхэм, шIэныгъэлэжьхэм, Iэ­натIэ зыIыгъхэм, социальнэ-эко­номикэ, гъэсэныгъэ лъэныкъо­хэм афэгъэзагъэу Iоф зышIы­хэрэм, нэмыкIхэми къэралы­гъом и Конституцие гъэтэрэзыжьынхэу фашIыщтхэм еплъыкIэу фыряIэм гъэзетэу «Адыгэ макъэм» зыщегъэгъуазэ.

Непэ гущыIэгъу тызыфэ­хъугъэр бзэшIэныгъэлэжьэу, филологие шIэныгъэхэмкIэ докторэу, профессорэу, кIэлэегъэджэ ыкIи социальнэ шIэныгъэхэмкIэ Урысые академием иакадемикэу Бырсыр Батырбый.

— Сыд фэдэрэ зэхъокIыныгъэхэми хъуни мыхъуни къызда­хьых, узэзэгъыни зыдемыгъэштэни къахэфэх. Конституцием епхыгъэ гъэтэрэзыжьынхэм цIыфхэр лъэшэу егъэгумэкIых. Ахэм ащыщэу сэ сызыщыгъозэ лъэныкъохэм ащыщхэм сакъыщыуцун.

Iо хэмылъэу сыгукIэ зыдезгъаштэхэрэм ащыщ лIышъхьэхэу, IэнатIэ, лъэкI зиIэхэу тихэгъэгу щыпсэухэрэм IэкIыбым гражданствэ щыряIэн зэрэфимытыщтхэр. Сыда пIомэ, уимылъкуи, уиакъыли уикъэралыгъо къинэнхэу, фэлэжьэнхэу щыт. IэнэтIэшхо зиIэхэм а лъэныкъомкIэ пшъэдэкIыжьышхо ахьын фае.

ПIуныгъэ-гъэсэныгъэм игугъу къэтшIымэ, нахьыбэм уигъэрэзэнэу щыт, ау зыдемыгъэштэн горэхэри хэтых, игъэкIотыгъэу а зэпстэуми сакъытегущыIэнэу уахътэ щыIэп. Ау хэзгъэунэфыкIымэ сшIоигъор гъэсэныгъэр, пIуныгъэр пстэуми апшъэжь, якъэкIуапI. Къэралыгъом ахэм ынаIэ атемытмэ, ежь къэралыгъори зэщыкъощт. Сыдигъуи къэралыгъор ыпэкIэ лъызгъэкIуа­тэрэр цIыфхэм шIэныгъэ куухэр яIэ зэрэхъурэр ары. Ахэр зэрагъэгъотынхэмкIэ Конституцием амалхэр къытыщтхэмэ, щэч хэлъэп зэхъокIыныгъэм ишIуагъэ къызэрэкIощтым. ПIуныгъэ-гъэсэ­ныгъэм пылъхэр непэрэ мафэм пыдзы ашIыгъэхэ фэдэу, ящы­IэкIэ-псэукIи къыщыкIэу щыт. ШIэныгъэ дэгъу зыIэкIэлъыбэхэр IэкIыб къэралыгъо зэфэшъхьаф­хэм кIожьыгъэхэу ащэлажьэх, сыда пIомэ уасэ къафашIы, щыIэкIэшIу къафагъэпсы. Джащ фэдэу шIэны­гъэм ылъэныкъокIэ тикъэралыгъо чIэнэгъэшхоу ышIыгъэхэр Конституцием игъэтэрэзыжьынхэм къащадалъытэхэмэ ишIуагъэ къэкIощт, ыпэкIэ тылъы­кIотэщт, тиамалхэм заушъом­бгъущт.

Iэшъынэ Сусан.